ភាសាខ្មែរ
English
ឯកឧត្តមឧបនាយករដ្ឋមន្រ្តី ជា សុផារ៉ា អនុញ្ញាតឱ្យនិស្សិតជ័យលាភីអាហារូបករណ៍រដ្ឋាភិបាលអូស្រ្តាលី និងណូវែលហ្សេឡង់ចូលជួបសំណេះសំណាល និងទទួលអនុសាសន៍

September 21, 2020
និស្សិត​ជ័​យលាភី​អាហារូបករណ៍​រដ្ឋាភិបាល​អូស្រ្តាលី និង​ណូវែលហ្សេឡង់​ បាន​ទទួលការ​អនុញ្ញាត​ឱ្យ​ចូលជួប​សម្ដែង​ការគួរសម សំណេះ​សំណាល និង​ទទួលអនុសាសន៍​ ពីឯកឧត្តម​ឧបនាយករដ្ឋមន្រ្តី ជា សុផារ៉ា រដ្ឋមន្រ្តី​ក្រសួង​រៀបចំ​ដែនដី នគរូបនីយកម្ម និងសំណង់ មុនពេល​ដែល​ពួកគេ​នឹងចេញ​ដំណើរ​ទៅ​បន្តការសិក្សា​នៅប្រទេសអូស្រ្តាលី និង​ណូវែលហ្សេឡង់ នាខែមករា ឆ្នាំ២០២១ ខាងមុខនេះ។   តាមតំណាង​និស្សិត​ជ័យលាភី​អាហារូបករណ៍​រដ្ឋាភិបាល​អូស្រ្តាលី និង​ណូវែលហ្សេឡង់ បានឱ្យដឹងថា​ និស្សិត​អាហារូបករណ៍​ដែល​បានទទួលការ​អនុញ្ញាត​ឱ្យចូលជួបស្នើសុំអនុសាសន៍ពី ឯកឧត្តមឧបនាយករដ្ឋមន្រ្តី ជា សុផារ៉ា នាពេលនេះមាន ២៧នាក់ ក្នុងនោះនិស្សិត ដែលបានប្រលងជាប់អាហារូបករណ៍អូស្រ្តាលីមានចំនួន ១៨ នាក់ និងណូវែលហ្សេឡង់ មាន ៩ នាក់ ដែលនឹងត្រូវចេញដំណើរទៅបន្តការសិក្សានា ខែមករា ឆ្នាំ ២០២១ខាងមុខនេះ។ បើគិតមកទល់ពេលនេះ មាននិស្សិតកម្ពុជា សរុប ៨០០ នាក់ ហើយ ដែលបានទទួលអាហារូបករណ៍ Australia Awards នេះ ដើម្បីបន្តការសិក្សាថ្នាក់ក្រោយឧត្តមសិក្សា ក្នុងប្រទេសអូស្រ្តាលី លើជំនាញផ្សេងៗ ដើម្បីយកជំនាញចំណេះដឹងទាំងនោះ ត្រឡប់មកអភិវឌ្ឍប្រទេសកម្ពុជាវិញ និងរក្សាទំនាក់ទំនង កិច្ចសហប្រតិបត្តិការ រវាងប្រទេសកម្ពុជា និងអូស្រ្តាលី។ ដូចគ្នានេះដែរ អាហារូបករណ៍របស់រដ្ឋាភិបាលណូវែលហ្សេឡង់ មានគោលបំណងជំរុញឱ្យមានការអភិវឌ្ឍ ប្រកបដោយចីរភាព តាមរយៈរផ្តល់ឱកាសការសិក្សាថ្នាក់ក្រោយឧត្តមសិក្សានៅប្រទេសណូវែលហ្សេឡង់ លើជំនាញផ្សេងៗ ដល់និស្សិតកម្ពុជា ដើម្បីយកចំណេះដឹងទាំងនេះ មកចូលរួមអភិវឌ្ឍប្រទេសវិញ ក្រោយពេលបញ្ចប់ការសិក្សា។ ក្នុងជំនួបនេះ ឯកឧត្តមឧបនាយករដ្ឋមន្រ្តី ជា សុផារ៉ា បានជំរុញដល់យុវជន ក៏ដូចជានិស្សិតជ័យលាភីអាហារូបករណ៍ ដែលនឹងត្រូវទៅបន្តការសិក្សា នៅប្រទេសអូស្រ្តាលី និងណូវែលហ្សេឡង់ នោះ ត្រូវកសាងមូលដ្ឋានគ្រឹះរបស់ខ្លួន ដោយពង្រឹងចំណេះ ជំនាញរបស់ខ្លួន និងត្រូវមានឆន្ទៈច្បាស់លាស់ មុននឹងធ្វើអ្វីមួយដើម្បីសម្រេចគោលដៅរបស់ខ្លួនពិតប្រាកដ ប្រកបដោយប្រសិទ្ធភាព។ ឯកឧត្តមឧបនាយករដ្ឋមន្រ្តី បានលើកឡើងថា យុវជនជំនាន់នេះ មានជោគវាសនាជាងយុវជនជំនាន់មុនៗ កាលពីអតីតកាល ដែលរស់នៅក្នុងភ្លើងសង្រ្គាម គ្មានឱកាសបានទទួលការសិក្សាអប់រំខ្ពង់ខ្ពស់ ឬមានសិទ្ធិសេរីភាពគ្រប់បែបយ៉ាងនោះទេប៉ុន្តែបច្ចុប្បន្ននេះ យុវជនទាំងអស់បានរស់នៅក្នុងប្រទេសជាតិមានសុខសន្តិភាព មានសិទ្ធិសេរីភាព គ្រប់បែបយ៉ាង ដែលជាឱកាសដ៏ល្អប្រសើរ ក្នុងការអភិវឌ្ឍខ្លួនឱ្យក្លាយជាធនធានដ៏មានតំលៃសម្រាប់ចូលរួមអភិវឌ្ឍប្រទេសជាតិ និងរក្សាសុខសន្តិភាព ដែលកំពុងមានសព្វថ្ងៃនេះ កុំឱ្យបាត់បង់។ ជាមួយនេះ ឯកឧត្តមឧបនាយករដ្ឋមន្រ្តី បានណែនាំដល់និស្សិតជ័យលាភីអាហារូបករណ៍ទាំងអស់ នៅពេលចេញទៅបន្តការសិក្សានៅប្រទេសអូស្រ្តាលី និងណូវែលហ្សេឡង់នោះ គប្បីត្រូវចេះរក្សាសាមគ្គីភាព មិត្តភាព និងទំនាក់ទំនងល្អជាមួយគ្នា ដើម្បីសហការគ្នា ចែករំលែកចំណេះដឹង បទពិសោធន៍ល្អៗ ពីគ្នាទៅវិញទៅមក និងខិតខំប្រឹងប្រែងរៀនសូត្រឱ្យបានចប់ចុងចប់ដើម ជាកិត្តិយសសម្រាប់ខ្លួនឯង ស្ថាប័ន និងប្រទេសជាតិផងដែរ។ ម្យ៉ាងទៀត ឯកឧត្តមឧបនាយករដ្ឋមន្រ្តី បានធានាអះអាងថា នឹងបន្តរក្សាសុខសន្តិភាពនៅកម្ពុជាឱ្យបានស្ថិតស្ថេរគង់វង្ស ដោយរង់ការវិលត្រឡប់ ក្រោយពេលបញ្ចប់ការសិក្សារបស់និស្សិតទាំងអស់ មកចូលរួមចំណែកក្នុងការអភិវឌ្ឍប្រទេសជាតិជាមួយគ្នា និងសង្ឃឹមថា អាស្រ័យលើចំណេះដឹង ដែលបានសិក្សាមកនោះ ក្នុងចំណោមនិស្សិតទាំងអស់ គឺអាចនឹងបានក្លាយទៅជាថ្នាក់ដឹកនាំស្ថាប័នណាមួយនាពេលខាងមុខ ជាក់ជាមិនខាន។ ទន្ទឹមនេះ ឯកឧត្តមឧបនាយករដ្ឋមន្រ្តី ក៏បានលើកឡើងពីការអភិវឌ្ឍរីកចំរើន ក្នុងប្រទេសកម្ពុជា នាពេលបច្ចុប្បន្ន ក្រោមការដឹកនាំរបស់ប្រមុខរាជរដ្ឋាភិបាលកម្ពុជា ក្នុងនោះមានការអភិវឌ្ឍហេដ្ឋារចនាសម្ព័ន្ធគ្រប់ទីកន្លែងទូទាំងប្រទេស ជាពិសេសហេដ្ឋារចនាសម្ព័ន្ធផ្លូវថ្នល់នៅខេត្តព្រះសីហនុ និងការបើកការដ្ឋានស្ថាបនាផ្លូវក្រុងចំនួន ៣៨ខ្សែ នៅខេត្តសៀមរាប ដែលទាំងនេះមិនមែនសម្រាប់អ្នកណាម្នាក់ឡើយ គឺសម្រាប់ប្រជាពលរដ្ឋខ្មែរជំនាន់នេះ និងជំនាន់ក្រោយៗទៀត ទុកប្រើប្រាស់ជាប្រយោជន៍រួម ទាំងអស់គ្នាហើយ ឯកឧត្តមឧបនាយករដ្ឋមន្រ្តី ក៏បានជូនពរដល់និស្សិតអាហារូបករណ៍ទាំងអស់ ឱ្យទទួលបានជោគជ័យក្នុងការទៅបន្តការសិក្សា នៅប្រទេសអូស្រ្តាលី និងណូវែលហ្សេឡង់ នាពេលខាងមុខផងដែរ៕
សារស្វាគមន៍

ឯកឧត្តម​ ជា​ សុផារ៉ា

ឧបនាយករដ្ឋមន្រ្តី រដ្ឋមន្ត្រី​ក្រសួង​រៀបចំ​ដែនដី នគរូប​នីយកម្ម និង​សំណង់

អានបន្ត
អាជ្ញាប័ណ្ណវិស័យសំណង់
ទំនាស់ដីធ្លី
របាយការណ៍
ឯកសារវីឌីអូរ
» មើល​ទាំងអស់
ចំនួនអ្នកទស្សនា
ថ្ងៃនេះ :
002195
ម្សិលមិញ :
004305
សរុប :
8517194
ការអភិវឌ្ឍន៍វិស័យសំណង់លំនៅឋាននៅកម្ពុជា
ស្វែងយល់ពីអចលណទ្រព្យនៅកម្ពុជា
© រក្សាសិទ្ធិគ្រប់យ៉ាងដោយ ក្រសួងរៀបចំដែនដី នគរូបនីយកម្ម​ និងសំណង់ ឆ្នាំ ២០១៦
អាសយដ្ឋានៈ លេខ៧៧១-៧៧៣, មហាវិថីព្រះមុនីវង្ស, សង្កាត់បឹងត្របែក, ខណ្ឌចំការមន, រាជធានីភ្នំពេញ