ឯកឧត្តមឧបនាយករដ្ឋមន្ត្រី ជា សុផារ៉ា អញ្ជើញចុះពិនិត្យការអនុវត្តកម្មវិធីសម្បទានដីសង្គមកិច្ចជូនកងទ័ព និងនគរបាលជាតិឈរជើងតាមបណ្តោយព្រំដែនកម្ពុជា វៀតណាម ក្នុងភូមិសាស្ត្រខេត្តត្បូងឃ្មុំ

February 26, 2023

នារសៀលថ្ងៃទី ២៦ ខែកុម្ភៈ ឆ្នាំ ២០២៣ ឯកឧត្តមឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងប្រធានគណៈកម្មាធិការសម្បទានសង្គមកិច្ចថ្នាក់ជាតិ រួមនឹងគណៈប្រតិភូអន្តរក្រសួង បានអញ្ជើញចុះពិនិត្យមើលការអនុវត្តកម្មវិធីសម្បទានដីសង្គមកិច្ច ជូនកងទ័ព និងនគរបាលជាតិឈរជើងតាមបណ្ដោយព្រំដែនកម្ពុជាវៀតណាម ក្នុងភូមិសាស្ត្រខេត្តត្បូងឃ្មុំ ស្របតាមសេចក្ដីសម្រេចរបស់រាជរដ្ឋាភិបាលកម្ពុជា។

យោងតាមសេចក្តីជូនដំណឹងរបស់ទីស្តីការគណៈរដ្ឋមន្ត្រីលេខ: ១៩៥ សជណ.ដប បានឱ្យដឹងថា រាជរដ្ឋាភិបាលបានសម្រេចប្រគល់ដី ដែលកម្ពុជាទទួលបានបន្ទាប់ពីការបោះបង្គោលនិងខណ្ឌសីមាព្រំដែន ស្ថិតក្នុងភូមិសាស្ត្រខេត្តត្បូងឃ្មុំ និងខេត្តស្វាយរៀង ទំហំសរុប ១២៦៥ហិចតា ៩អា ក្នុងនោះផ្ទៃដីទំហំ ៦១១ ហិចតា ៨២ អា ស្ថិតនៅខេត្តត្បូងឃ្មុំនិងផ្ទៃដីទំហំ ៦៥៣ ហិកតា ២៧ អា ស្ថិតនៅខេត្តស្វាយរៀង ដែលបច្ចុប្បន្នស្ថិតក្រោមការគ្រប់គ្រងរបស់អាជ្ញាធរជាតិទទួលបន្ទុកកិច្ចការព្រំដែន ជូនគណៈកម្មាធិការសម្បទានដីសង្គមកិច្ចថ្នាក់ជាតិសម្រាប់អនុវត្តកម្មវិធីសម្បទានដីសង្គមកិច្ច ជូនកងទ័ព និងនគរបាលជាតិឈរជើងតាមព្រំដែនកម្ពុជាវៀតណាម អតីតកងកម្លាំងប្រដាប់អាវុធ និងគ្រួសារ និងប្រជាពលរដ្ឋក្រីក្រស៊ីវិលទូទៅ។

ក្នុងពេលចុះពិនិត្យមើលការអនុវត្តកម្មវិធីសម្បទានដីសង្គមកិច្ចជូនកងទ័ព និងនគរបាលជាតិឈរជើងតាមបណ្តោយព្រំដែនកម្ពុជាវៀតណាម ក្នុងភូមិសាស្រ្តខេត្តត្បូងឃ្មុំ ឯកឧត្តមឧបនាយករដ្ឋមន្រ្តី បានឱ្យដឹងថា ទីតាំងដែលមកជួបជុំគ្នានាពេលនេះ គឺនៅចន្លោះបង្គោលលេខ១១៦ និង១១៧ ដោយនៅក្នុងគោលដៅទី១ នេះយើងបែងចែកបាន ៩៧ ឡូត៍ ក្នុង ១ឡូត៍ ទំហំ ៣០ម x ៤០ម ស្ថិតក្នុងភូមិត្រពាំងផ្លុងទី ១ ឃុំត្រពាំងផ្លុង ស្រុកពញាក្រែក ខេត្តត្បូងឃ្មុំ ទី២ យើងរៀបចំនៅចន្លោះបង្គោលលេខ ១០៥/៦ និងបង្គោលលេខ ១០៣/២ ចំនួន២១៦ ឡូត៍ ក្នុង១ឡូត៍ទំហំ ៣០ម x ៤០ម ស្ថិតក្នុងភូមិព្រៃ ឃុំទ្រៀក ស្រុកមេមត់ ខេត្តត្បូងឃ្មុំ ទី៣ នៅចន្លោះបង្គោលលេខ ១០៤/៤ និងបង្គោលលេខ ១០៣/២ យើងរៀបចំបាន ៥៦ឡូត៍ ក្នុង១ឡូតិ៍ទំហំ ៣០ម x ៤០ម និងគោលដៅទី ៤ នៅចន្លោះបង្គោលលេខ ៩៨/១ និងបង្គោលលេខ ៩៥/១ ចំនួន ២៥០ ឡូត៍ ក្នុង១ឡូត៍ ទំហំ ៣០ម x ៤០ម ស្ថិតក្នុងភូមិចាន់មូល ឃុំចាន់មូល ស្រុកមេមត់ ខេត្តត្បូងឃ្មុំ។ ឯកឧត្តមឧបនាយករដ្ឋមន្រ្តី ជា សុផារ៉ា បានសំណូមពរឱ្យមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តត្បូងឃ្មុំ ត្រូវរៀបចំប្លង់គោលសម្រាប់បែងចែកដីធ្លីនៅក្នុងតំបន់គោលដៅទាំង ៤ នៅក្នុងខេត្តត្បូងឃ្មុំ ក្នុងភារកិច្ចរៀបចំបែងចែកដីឡូត៍ សរុប ៦១៩។ ឯកឧត្តមឧបនាយករដ្ឋមន្រ្តី បានបន្តថា ក្នុងការរៀបចំបែងចែកដីឡូត៍នេះ យើងបានបែងចែកដីឡូត៍សម្រាប់ដីសាលារៀន មណ្ឌលសុខភាព ផ្សារ ដីវត្ត ស្នាក់ការភូមិ រៀបចំដីសាលាខេត្ត សម្រាប់ច្រកចេញចូលតែមួយ រៀបចំប៉ុស្តិ៍ការពារព្រំដែន ដីសាខាវរៈការពារព្រំដែន និងប៉ុស្តិ៍ រៀបចំដីបម្រុងទុកសម្រាប់ការងារផ្សេងៗ ដីបម្រុងទុកសម្រាប់សមាគមនារី ដីសម្រាប់ទុកជាត្រពាំង ដីរួមសម្រាប់សហគមន៍ ហើយដីទាំងនេះត្រូវរក្សាទុកតាមគោលការណ៍នេះ ហើយបើពាក់ព័ន្ធជាមួយស្ថាប័នណាមួយនោះ គឺត្រូវធ្វើកម្មសិទ្ធិជាលក្ខណៈឯកត្តជនជានីតិបុគ្គលឈរឈ្មោះតំណាងឱ្យរដ្ឋ រីឯមន្ទីរអភិវឌ្ឍជនបទខេត្តត្បូងឃ្មុំ ត្រូវមានភារកិច្ចរៀបចំស្ថាបនាផ្លូវក្រាលគ្រួសក្រហម រៀបចំឱ្យមានទឹកស្អាតដូចជាការជីកអណ្តូង និងរៀបចំបង្គន់អនាម័យជូនដល់ប្រជាពលរដ្ឋសហគមន៍ ដោយឡែកមន្ទីរបរិស្ថានត្រូវរៀបចំការដាំដើមឈើក្នុងទំហំដីឡូត៍ រឺទីតាំងដែលនៅសេសសល់ជាដីសហគមន៍សាធារណៈនោះត្រូវរៀបចំដាំដើមឈើឱ្យទៅជាព្រៃសហគមន៍សម្រាប់ការជ្រកនៅជួបជុំគ្នារបស់ប្រជាពលរដ្ឋឱ្យស្របទៅនឹងបម្រែបម្រួលអាកាសធាតុ។ ចំពោះខាងក្រសួងមន្ទីរសង្គមកិច្ច ឯកឧត្តមឧបនាយករដ្ឋមន្រ្តី បានស្នើឱ្យជួយរើសមុខសញ្ញាអតីតយុទ្ធជន កងទ័ព និងនគរបាលជាតិឈរជើងតាមបណ្តោយព្រំដែនកម្ពុជាវៀតណាម ដើម្បីឱ្យចំគោលដៅក្នុងការអនុវត្តកម្មវិធីសម្បទានដីសង្គមកិច្ច នេះ ដោយឡែកអគ្គនាយកដ្ឋានលំនៅឋាន ត្រូវមានភារកិច្ចទទួលខុសត្រូវក្នុងការបញ្ជារៀបចំការសាងសង់លំនៅឋាន ស្របតាម បទដ្ឋានបច្ចេកទេសដោយធ្វើឱ្យបានមុនរដូវភ្លៀងមកដល់ រីឯស្ថាប័នជំនាញវិស័យសកម្មភាពមីនត្រូវចូលរួមជួយសម្អាតផ្ទៃដីទាំងអស់នេះ ដើម្បីធានាបានថាដីទាំងនេះ ជាដីសុវត្ថិភាពសម្រាប់ការរស់នៅ ដោយមិនមានគ្រាប់មីន ឬសំណល់ជាតិផ្ទុះពីសង្រ្គាម ដែលអាចប៉ះពាល់ដល់អាយុជីវិតរបស់ប្រជាពលរដ្ឋជាយថាហេតុនោះ៕