តាម ឯកឧត្តម កេង ប៊ុនណា អភិបាលរងខេត្តត្បូងឃ្មុំ តំណាង ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តត្បូងឃ្មុំ បានឱ្យដឹងថា វត្តមង្គលបូរី ហៅវត្តមង់ គឺស្ថិតក្នុងចំណោមវត្តទាំងពីរនៃឃុំមង់រៀវ ដែលត្រូវបានកសាងឡើងក្នុងអំឡុងឆ្នាំ ១៨០០ លើទីតាំងដីទំហំ ៤ ហិកតា ២៣ អា ដែលមកដល់បច្ចុប្បន្នមានអាយុកាល ២២៣ ឆ្នាំហើយ។ វត្តនេះក៏មិនខុសពីវត្តដទៃទៀត នៅទូទាំងប្រទេសដែរ គឺបានរងការបំផ្លិចបំផ្លាញខ្ទេចខ្ទីអស់គ្មានសល់នៅក្នុងរបបកម្ពុជាប្រជាធិបតេយ្យ។ ក្រោយថ្ងៃរំដោះ ៧ មករា ឆ្នាំ ១៩៧៩ វិស័យនានា ត្រូវបានរស់ឡើងវិញរួមទាំងវិស័យពុទ្ធចក្រ ផងដែរ ដូច្នេះទើបប្រជាពុទ្ធបរិស័ទ បានមូលមតិគ្នាផ្ដើមកសាងវត្តនេះឡើងវិញ សម្រាប់ទុកជាទីសក្ការៈបូជារបស់ពុទ្ធបរិស័ទ។ ដោយឡែកសមិទ្ធិផលក្នុងវត្ត ដែលត្រូវសម្ពោធឆ្លងដាក់ឱ្យប្រើប្រាស់នាពេលនេះ រួមមានផ្លូវបេតុង ១ខ្សែ មានទទឹង ៨,៣០ម ប្រវែង ២ ០០០ ម ស្ពានថ្មចំនួន ៤ កុដិថ្ម ១ខ្នង កម្ពស់ ៣ជាន់ ជួសជុលដំបូលកុដិ ចាក់សាបបេតុងក្នុងវត្តដែលមានផ្ទៃក្រឡា ៥ ២៨០ ម៉ែត្រការ៉េ ចេតិយចំនួន ៦ ក្លោងទ្វារ ១ ជួសជុលក្លោងទ្វារចាស់ចំនួន ១ សរុបថវិកាចំណាយក្នុងការសាងសង់អស់ ៨១៦ ៣០០ ដុល្លារអាមេរិក ជាថវិកា ដែលទទួលបានការឧបត្ថម្ភគាំទ្រ ពីឯកឧត្តមឧបនាយករដ្ឋមន្ត្រី ជា សុផារ៉ា និងលោកជំទាវ ឯកឧត្តម ទេព ធន និងលោកជំទាវ អ្នកឧកញ៉ាម៉ក់ គឹមហុង និងលោកជំទាវ លោកឧកញ៉ា សៀក ពិសិដ្ឋ និង លោកជំទាវ ឯកឧត្តម លឹម ស៊ុនលាង និងលោកជំទាវ លោកឧកញ៉ា សុខ សាម និងលោកជំទាវ រួមនឹងសប្បុរសជនក្នុងនិងក្រៅប្រទេស ព្រមទាំងពុទ្ធបរិស័ទចំណុះជើងវត្តផងដែរ។
ក្នុងឱកាសនោះ ឯកឧត្តមឧបនាយករដ្ឋមន្ត្រី ជា សុផារ៉ា បាននាំមកនូវការផ្ដាំផ្ញើសាកសួរសុខទុក្ខប្រកបដោយក្តីនឹករលឹកពី សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានិងសម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ប្រគេនដល់ព្រះសង្ឃ និងជូនចំពោះប្រជាពលរដ្ឋទាំងអស់ ដែលជានិច្ចកាល សម្ដេចតេជោ តែងតែបានខិតខំបំពេញតាមបំណងប្រាថ្នារបស់ប្រជាពលរដ្ឋ លើគ្រប់វិស័យទាំងវិស័យអាណាចក្រ និងពុទ្ធចក្រ និងដោះស្រាយរាល់បញ្ហាប្រឈមនានា របស់ប្រជាពលរដ្ឋ សំដៅធ្វើយ៉ាងណាឱ្យពួកគាត់មានសេចក្តីសុខសុភមង្គលរីកចម្រើនទៅមុខទៀតដល់កូនចៅជំនាន់ក្រោយ និងបានជួយលើកស្ទួយជីវភាពរបស់ប្រជាពលរដ្ឋឱ្យប្រសើរឡើង ដូច្នេះហើយទើបពួកគាត់អាចមានលទ្ធភាពចូលរួមចំណែកក្នុងការកសាងសមិទ្ធផលនានា បម្រើឱ្យវិស័យពុទ្ធចក្របាន។ ឯកឧត្តមឧបនាយករដ្ឋមន្ត្រី ជា សុផារ៉ា បានថ្លែងអំណរគុណ និងកោតសរសើរចំពោះការខិតខំប្រឹងប្រែងរបស់ព្រះគ្រូចៅអធិការវត្តមង្គលបូរី ហៅវត្តមង់ ក៏ដូចជាអាចារ្យ គណៈកម្មការវត្ត ពុទ្ធបរិស័ទ ជិតឆ្ងាយ និងពុទ្ធបរិស័ទចំណុះជើងវត្ត រួមនឹងសប្បុរសជនទាំងអស់ ដែលបានចូលរួមដោយសទ្ធាជ្រះថ្លាក្នុងការកសាងសមិទ្ធផលនានាក្នុងវត្តនេះ ដែលចាត់ទុកថានេះ គឺជាសមិទ្ធផលដ៏ធំធេងនៅក្នុងវត្តមង្គលបូរី ហៅវត្តមង់នេះ ដើម្បីឱ្យសាកសមជាទីសក្ការៈបូជារបស់ពុទ្ធបរិស័ទផង និងឧទ្ទិសដោយវិស័យព្រះពុទ្ធសាសនាផង។ ឯកឧត្តមក៏បានកោតសរសើរ ដល់ ឯកឧត្តម ទេព ធន និងលោកជំទាវ រួមនិងក្រុមការងារទាំងអស់ ដែលតែងតែបានផ្សារភ្ជាប់បង្កលក្ខណៈផ្ដល់ភាពកក់ក្តៅជូនដល់ប្រជាពលរដ្ឋ នៅក្នុងឃុំមង់រៀវ ដែលក្រុមការងារទាំងអស់ បានខិតខំប្រឹងប្រែងឆ្លើយតបតាមសំណូមពររបស់ប្រជាពលរដ្ឋ និងព្រះសង្ឃ ធ្វើឱ្យប្រជាពលរដ្ឋក្នុងឃុំមង់រៀវ ទទួលបាននូវភាពកក់ក្តៅ និងផ្ដល់ជំនឿទុកចិត្តដល់ក្រុមការងារ។ ដោយឡែកការកសាងសមិទ្ធផលនាពេលនេះ បានបង្ហាញឱ្យឃើញថាប្រទេសកម្ពុជា មានសុខសន្តិភាព ដែលបង្កលក្ខណៈ និងផ្ដល់ឱកាសឱ្យយើងទាំងអស់គ្នាអាចឆ្លើយតបនឹងការអភិវឌ្ឍ ដូច្នេះយើងទាំងអស់គ្នាត្រូវរួមគ្នាថែរក្សាសុខសន្តិភាពនេះឱ្យបានគង់វង្សទើបយើងអាចបន្តនូវសេចក្តីសង្ឃឹមក្នុងភាពកក់ក្តៅ និងការរស់នៅប្រកបដោយសុភមង្គលនៅក្នុងគ្រួសារក៏ដូចជាសង្គមជាតិទាំងមូល។ ប្រជាពលរដ្ឋទាំងអស់អាចមានអ្វីៗគ្រប់បែបយ៉ាង ដូចថ្ងៃនេះបានក៏អាស្រ័យ ដោយមានការដឹកនាំរបស់ប្រមុខរាជរដ្ឋាភិបាលកម្ពុជា គឺ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ដែលជាមគ្គុទ្ទេសក៍ដ៏ប៉ិនប្រសប់ក្នុងការនាំ នាវាកម្ពុជា ឱ្យឈានឆ្ពោះទៅរកវឌ្ឍនភាពបង្កលក្ខណៈឱ្យប្រជាពលរដ្ឋទទួលបាននូវភាពសុខដុមរមនា និងភាពរីកចម្រើនគ្រប់បែបយ៉ាង។ ឯកឧត្តមឧបនាយករដ្ឋមន្ត្រី ជា សុផារ៉ា ក៏បានអំពាវនាវដល់ប្រជាពលរដ្ឋទាំងអស់នៅទូទាំងប្រទេសក៏ដូចជាប្រជាពលរដ្ឋនៅក្នុងខេត្តត្បូងឃ្មុំ ឱ្យបន្តផ្ដល់ការគាំទ្រដល់រាជរដ្ឋាភិបាលកម្ពុជា ក្រោមការដឹកនាំរបស់សម្ដេចអគ្គមហាសេនាបតីតេជោ ហ៊ុន សែន ដើម្បីនាំប្រទេសជាតិឈានឆ្ពោះទៅរកការអភិវឌ្ឍរីកចម្រើនប្រកបដោយប្រសិទ្ធភាពពិតប្រាកដ តាមរយៈការបោះឆ្នោតជ្រើសតាំងតំណាងរាស្ត្រនីតិកាលទី ៧ នាថ្ងៃទី២៣ ខែកក្កដាឆ្នាំ២០២៣ ខាងមុខនេះឱ្យទទួលបានអាសនៈសរុប ៨ អាសនៈនៅក្នុងខេត្តត្បូងឃ្មុំ នេះ និងផ្ដល់ការគាំទ្រដល់ឯកឧត្តមបណ្ឌិត ហ៊ុន ម៉ាណែត ជាបេក្ខភាពនាយករដ្ឋមន្ត្រី សម្រាប់អនាគត ផងដែរ។
ក្នុងឱកាសនោះដែរ ឯកឧត្តមឧបនាយករដ្ឋមន្ត្រី ជា សុផារ៉ា បាននាំយកថវិការបស់ សម្ដេចអគ្គមហាសេនាបតីតេជោ ហ៊ុន សែន ទៅប្រគេនដល់ព្រះចៅអធិការវត្តមង្គលបូរី ហៅវត្តមង់ ចំនួន ១ម៉ឺន ដុល្លារអាមេរិក ផ្ដល់ជូនតាជីយាយជី ១០០ នាក់ ម្នាក់ៗក្រណាត់ស ១ដុំ ថវិកា ១ ម៉ឺនរៀល គ្រូពេទ្យ ២០ នាក់ និងលោកគ្រូអ្នកគ្រូ ៥០ នាក់ ព្រមទាំងយុវជនកាកបាទក្រហម កាយរិទ្ធ យុវជន ស.ស.យ.ក ១៥០ នាក់ ម្នាក់ៗទទួលបានក្រម៉ា ១ថវិកា ១ម៉ឺនរៀល និងសិស្សានុសិស្ស ២៣៨ នាក់ ម្នាក់ៗទទួលបានសម្ភារៈសិក្សានិងថវិកា១ចំនួនផងដែរ៕
សារស្វាគមន៍
ឯកឧត្តម ជា សុផារ៉ា
ឧបនាយករដ្ឋមន្រ្តី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់
សេវាសាធារណៈ
អាជ្ញាប័ណ្ណវិស័យសំណង់
ទំនាស់ដីធ្លី
របាយការណ៍
ចំនួនអ្នកទស្សនា
ថ្ងៃនេះ :
001813
ម្សិលមិញ :
010110
សរុប :
18211951
ការអភិវឌ្ឍន៍វិស័យសំណង់លំនៅឋាននៅកម្ពុជា
ស្វែងយល់ពីអចលនទ្រព្យនៅកម្ពុជា