តាម ឯកឧត្តមបណ្ឌិត ជាម ច័ន្ទសោភណ្ឌ អភិបាលនៃគណៈអភិបាលខេត្តត្បូងឃ្មុំ បានឱ្យដឹងថា បន្ទាប់ពីបានដំណើរការអស់រយៈពេល ១ថ្ងៃ កន្លះរួចមកសន្និបាតបូកសរុបការងាររបស់រដ្ឋបាលខេត្តក៏៏ត្រូវបានបិទបញ្ចប់ដោយទទួលបានលទ្ធផលល្អប្រសើរ ក្នុងនោះឯកឧត្តមបានឱ្យដឹងអំពីលទ្ធផលការងារជោគជ័យលើគ្រប់វិស័យប្រចាំឆ្នាំ ២០២២ ដែលរដ្ឋបាលខេត្តសម្រេចបាន និងទិសដៅភារកិច្ច ដែលត្រូវអនុវត្តបន្តសម្រាប់ឆ្នាំ ២០២៣ នេះ ក្នុងគោលដៅ ដើម្បីឱ្យខេត្តត្បូងឃ្មុំ កាន់តែមានការអភិវឌ្ឍរីកចំរើនបន្ថែមទៀតនិងផ្តល់ភាពកក់ក្តៅ និងសេចក្ដីសុខសុវត្ថិភាពជូនប្រជាពលរដ្ឋក្នុងខេត្ត។ ឯកឧត្តមបានថ្លែងអំណរគុណដល់ឯកឧត្តមឧបនាយករដ្ឋមន្រ្តី ជា សុផារ៉ា ដែលបានចូលរួមជាអធិបតីក្នុងសន្និបាតនេះ ដើម្បីផ្តល់អនុសាសន៍តម្រង់ទិសដល់អង្គសន្និបាតបានបំពេញតួនាទីភារកិច្ច របស់ខ្លួនប្រកបដោយផ្លែផ្កាក្នុងការរួមចំណែកអនុវត្តការងារយ៉ាងសកម្មស្របតាមគោលនយោបាយ និងយុទ្ធសាស្រ្តចតុកោណរបស់រាជរដ្ឋាភិបាល ក្រោមម្លប់សន្តិភាពដឹកនាំដោយភាពប៉ិនប្រសប់របស់ សម្តេចអគ្គមហាសេនាបតីតេជោ ហ៊ុន សែននាយករដ្ឋមន្រ្តីនៃព្រះរាជាណាចក្រកម្ពុជា។
ក្នុងឱកាសនោះ ឯកឧត្តមឧបនាយករដ្ឋមន្រ្តី ជា សុផារ៉ា បានមានប្រសាសន៍ថាផ្អែកតាមរបាយការណ៍របស់ឯកឧត្តមបណ្ឌិត ជាម ច័ន្ទសោភណ្ឌ អភិបាលនៃគណៈអភិបាលខេត្តត្បូងឃ្មុំ អំពីលទ្ធផលនៃការគ្រប់គ្រងដឹកនាំកិច្ចការរដ្ឋបាល និងការអភិវឌ្ឍលើគ្រប់វិស័យ ការថែរក្សាសន្តិសុខសណ្តាប់ធ្នាប់សាធារណៈ ការអនុវត្តគោលនយោបាយភូមិ ឃុំ សង្កាត់ មានសុវត្ថិភាព និងការផ្តល់សេវាសាធារណៈនានា ជូនដល់ប្រជាពលរដ្ឋក្នុងភូមិសាស្រ្តខេត្តត្បូងឃ្មុំ នាឆ្នាំ ២០២២ កន្លងមក ក្នុងនាមរាជរដ្ឋាភិបាលកម្ពុជា ឯកឧត្តមឧបនាយករដ្ឋមន្រ្តី បានកោតសរសើរ និងវាយតម្លៃខ្ពស់ចំពោះថ្នាក់ដឹកនាំ មន្រ្ដីរាជការ កងកម្លាំងប្រដាប់អាវុធទាំង៣ប្រភេទ ដែលមានសមត្ថកិច្ចពាក់ព័ន្ធគ្រប់លំដាប់ថ្នាក់ រដ្ឋបាលខេត្តគ្រប់លំដាប់ថ្នាក់ ព្រមទាំងក្រុមការងាររាជរដ្ឋាភិបាលចុះមូលដ្ឋានខេត្តត្បូងឃ្មុំ ដែលបានខិតខំរួមគ្នាយ៉ាងសកម្មក្នុងការបំពេញតួនាទីភារកិច្ចបានយ៉ាងល្អប្រសើរប្រកបដោយស្មារតីទទួលខុសត្រូវ សម្រេចបាននូវសមិទ្ធផលនានា ជាច្រើនគួរឱ្យកត់សម្គាល់។ ការខិតខំប្រឹងប្រែងរួមគ្នាយ៉ាងសកម្មទាំងនេះបានរួមចំណែកក្នុងការថែរក្សាសន្តិភាព ស្ថិរភាពនយោបាយនិងសន្តិសុខសណ្តាប់ធ្នាប់សាធារណៈ និងសុវត្ថិភាពសង្គម ការលើកកម្ពស់លទ្ធិប្រជាធិបតេយ្យសេរីពហុបក្ស ការពង្រឹងនីតិរដ្ឋ និងការអភិវឌ្ឍសេដ្ឋកិច្ចសង្គមឱ្យកាន់តែរឹងមាំប្រកបដោយចីរភាព និងបរិយាប័ន្ន។ ឯកឧត្តមឧបនាយករដ្ឋមន្រ្តី ជា សុផារ៉ា បានលើកឡើងថាក្រោមការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី ប្រទេសកម្ពុជាបានដាក់ចេញនូវវិធានការគ្រប់គ្រងឆ្លើយតបនឹងវិបត្តិ ក៏ដូចជាបញ្ហាប្រឈមនានា ប្រកបដោយប្រសិទ្ធភាព និងទាន់ពេលវេលា ដើម្បីស្តារផលប៉ះពាល់នានា មកលើសេដ្ឋកិច្ចសង្គម និងជីវភាពរស់នៅរបស់ប្រជាពលរដ្ឋ ដែលបណ្ដាលមកពីការឆ្លងរាតត្បាតពីជំងឺកូវីត ១៩ ការប្រែប្រួលអាកាសធាតុ ដែលបង្កឱ្យមានគ្រោះទឹកជំនន់ទឹកភ្លៀង និងវិបត្តិនានាជាសកលធ្វើឱ្យសេដ្ឋកិច្ចជាតិស្ទុះងើបឡើងវិញយ៉ាងឆាប់រហ័សក្នុងអត្រាកំណើន ៥,២% ក្នុងឆ្នាំ២០២២ ហើយរំពឹងថានឹងមានកំណើនក្នុងរង្វង់ ៥,៦% ក្នុងឆ្នាំ ២០២៣ នេះ។ សមិទ្ធផលទាំងនេះបានបង្ហាញច្បាស់អំពីសមត្ថភាពរបស់រាជរដ្ឋាភិបាល ក្រសួង ស្ថាប័ន នានា និងរដ្ឋបាលថ្នាក់ក្រោមជាតិ ក្នុងការគ្រប់គ្រងឆ្លើយតបទៅនឹងវិបត្តិ និងបញ្ហាប្រឈមនានា សំដៅជំរុញការអភិវឌ្ឍប្រទេសជាតិ ឱ្យមានការរីកចំរើនលើគ្រប់វិស័យជាបន្តបន្ទាប់ទៀត។ ឯកឧត្តមឧបនាយករដ្ឋមន្រ្តី ជា សុផារ៉ា បានផ្តល់អនុសាសន៍មួយចំនួនដូចជា ត្រូវពង្រឹងសន្តិភាព ស្ថិរភាពនយោបាយ និងការពង្រឹងការគ្រប់គ្រងសន្តិសុខសណ្តាប់ធ្នាប់សាធារណៈ និងសុវត្ថិភាពសង្គម ត្រូវបន្តខិតខំរួមគ្នាថែរក្សាការពារសន្តិភាព ស្ថិរភាពនយោបាយ ការការពារឱ្យបានគត់មត់នូវបូរណភាពទឹកដី អធិបតេយ្យភាពជាតិ ការពារព្រះមហាក្សត្រ ការពាររបបរាជានិយមអាស្រ័យរដ្ឋធម្មនុញ្ញ ការពាររាជរដ្ឋាភិបាល ស្របច្បាប់ ដែលកើតចេញពីការបោះឆ្នោត និងបន្តលើកកម្ពស់លទ្ធិប្រជាធិបតេយ្យ សេរីពហុបក្ស ការការពារលើកកម្ពស់សិទ្ធិសេរីភាព របស់ប្រជាពលរដ្ឋឱ្យដើរទន្ទឹមនឹងការពង្រឹងនីតិរដ្ឋស្របតាមរដ្ឋធម្មនុញ្ញ នៃព្រះរាជាណាចក្រកម្ពុជា ដើម្បីបន្តអភិវឌ្ឍប្រទេសជាតិ ឱ្យមានការរីកចំរើនលើគ្រប់វិស័យជាបន្តទៀត បង្កើនការថែរក្សាពង្រឹងសន្តិសុខដោយត្រូវសហការទប់ស្កាត់ និងបង្រ្កាបឱ្យបានទាន់ពេលវេលា និងមានប្រសិទ្ធភាពនូវអំពើភេរវកម្មឧក្រិដ្ឋកម្មឆ្លងដែនគ្រប់ប្រភេទបទល្មើសបច្ចេកវិទ្យា និងបទល្មើសនានា ដែលមានការវិវត្តន៍ប្រែប្រួលកាន់តែស្មុគស្មាញ អាជ្ញាធរ និងកងកម្លាំងមានសមត្ថកិច្ចគ្រប់ថ្នាក់ត្រូវបន្តអនុវត្តជាប្រព័ន្ធក្នុងការស្រាវជ្រាវស៊ើបអង្កេត និងចាត់វិធានការឱ្យបានម៉ឺងម៉ាត់ចំពោះការលាងសម្អាតប្រាក់ ដើម្បីលើកកម្ពស់មុខមាត់ជាតិ ក៏ដូចជាជំរុញការអភិឌ្ឍប្រទេសឱ្យកាន់តែរីកចំរើនថែមទៀត ត្រូវបន្តអនុវត្តឱ្យកាន់តែសកម្មនូវយុទ្ធនាការបង្កើនការប្រយុទ្ធប្រឆាំងអំពើជួញដូរមនុស្សគ្រប់ទម្រង់ បង្រ្កាបល្បែងស៊ីសងខុសច្បាប់គ្រប់ប្រភេទ និងការជួញដូរចែកចាយប្រើប្រាស់គ្រឿងញៀនខុសច្បាប់ក្នុងមូលដ្ឋាន អំពើហិង្សាក្នុងគ្រួសារ និងបង្រ្កាបក្មេងទំនើង ដើម្បីជំរុញអនុវត្តគោលនយោបាយភូមិ ឃុំ សង្កាត់ មានសុវត្ថិភាព រួមនឹងការងារសំខាន់ៗជាច្រើនផ្សេងទៀតផងដែរ៕
សារស្វាគមន៍
ឯកឧត្តម ជា សុផារ៉ា
ឧបនាយករដ្ឋមន្រ្តី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់
សេវាសាធារណៈ
អាជ្ញាប័ណ្ណវិស័យសំណង់
ទំនាស់ដីធ្លី
របាយការណ៍
ចំនួនអ្នកទស្សនា
ថ្ងៃនេះ :
021466
ម្សិលមិញ :
022981
សរុប :
20488541
ការអភិវឌ្ឍន៍វិស័យសំណង់លំនៅឋាននៅកម្ពុជា
ស្វែងយល់ពីអចលនទ្រព្យនៅកម្ពុជា