ឯកឧត្ដមឧបនាយករដ្ឋមន្ត្រី ជា សុផារ៉ា អនុញ្ញាតឱ្យ ឯកឧត្តម Justin Whyatt ឯកអគ្គរាជទូត វិសាមញ្ញ និងពេញសមត្ថភាពថ្មី នៃប្រទេសអូស្រ្តាលី ប្រចាំនៅព្រះរាជាណាចក្រកម្ពុជា ចូលជួបសម្តែងការគួរសម និងពិភាក្សាការងារ

March 28, 2023

នាព្រឹកថ្ងៃអង្គារ ៧កើត ខែចេត្រ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី ២៨ ខែមីនា ឆ្នាំ ២០២៣ នៅទីស្តីការក្រសួង ឯកឧត្ដម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានអនុញ្ញាតឱ្យ ឯកឧត្តម Justin Whyatt ឯកអគ្គរាជទូតវិសាមញ្ញ និងពេញសមត្ថភាពថ្មីនៃប្រទេសអូស្រ្តាលីប្រចាំនៅព្រះរាជាណាចក្រកម្ពុជាចូលជួបសម្តែងការគួរសមនិងពិភាក្សាការងារ។
ក្នុងជំនួបនេះ ឯកឧត្តមឧបនាយករដ្ឋមន្រ្តី ជា សុផារ៉ា បានបង្ហាញពីក្តីរីករាយ និងស្វាគមន៍ចំពោះបេសកកម្មការទូតនៅក្នុងព្រះរាជាណាចក្រកម្ពុជានៅក្នុងអាណត្តិរបស់ ឯកឧត្តម Justin Whyatt ក្នុងនាមជាឯកអគ្គរាជទូតវិសាមញ្ញ និងពេញសមត្ថភាពថ្មីនៃប្រទេសអូស្រ្តាលីប្រចាំកម្ពុជា ដែលចាត់ទុកថាបេសកកម្មនេះ គឺជាការរួមចំណែកក្នុងការអភិវឌ្ឍសេដ្ឋកិច្ចសង្គម និងធនធានមនុស្សនៅកម្ពុជា។ ឯកឧត្តមឧបនាយករដ្ឋមន្រ្តី បានលើកឡើងថា ចាប់តាំងពីឆ្នាំ ១៩៩៣ មក ការងារការទូតរបស់អូស្រ្តាលី ដែលបានបោះទីតាំងឡើងវិញនៅក្នុងព្រះរាជាណាចក្រកម្ពុជា បានធ្វើឱ្យកម្ពុជាមានការវិវត្តន៍ ហើយក្នុងបេសកកម្មអ៊ុនតាក់ គឺអូស្រ្តាលីនៅឈរជួរមុខក្នុងការរៀបរយអនុវត្តនូវកិច្ចព្រមព្រៀងទីក្រុងប៉ារីសឆ្នាំ១៩៩៣ ដែលចាប់តាំងពីនោះមកកម្ពុជាបានទទួលសុខសន្តិភាព និងមានលទ្ធភាពក្នុងការអភិវឌ្ឍលើគ្រប់វិស័យរហូតមកដល់បច្ចុប្បន្ននេះ។ ឯកឧត្តមឧបនាយករដ្ឋមន្រ្តី ចាត់ទុកថានេះជាផ្លែផ្កានៃកិច្ចសហប្រតិបត្តិការដ៏គួរឱ្យមានមោទនភាព។ ឯកឧត្តមឧបនាយករដ្ឋមន្រ្តី បញ្ជាក់ថាបញ្ហាសុវត្ថិភាព ដើម្បីឱ្យមានសន្តិភាព គឺជាបញ្ហាចំបងសម្រាប់ប្រទេសកម្ពុជាដែលធ្លាប់ខ្ទេចខ្ទាំដោយសារសង្រ្គាមស៊ីវិលអស់រយៈពេលជាច្រើនឆ្នាំ ដោយនៅពេលនោះយើងទទួលបានការគាំទ្រពីអូស្រ្តាលី ហើយបញ្ហាបន្តទៀត គឺការគាំទ្រឱ្យមានសន្តិសុខស្បៀង និងបញ្ហាហេដ្ឋារចនាសម្ព័ន្ធហើយយើងក៏ចាប់ផ្តើមជាបណ្តើរៗក្នុងការអភិវឌ្ឍធនធានមនុស្សរហូតមកដល់បច្ចុប្បន្ននេះ ដែលមាននិស្សិតកម្ពុជាតែងតែទទួលបានអាហារូបករណ៍ជាច្រើនពីប្រទេសអូស្រ្តាលីជារៀងរាល់ឆ្នាំ។ ចំពោះបញ្ហាសុខាភិបាលក៏ខាងអូស្រ្តាលីបានជួយគាំទ្ររៀបចំយន្តការក្នុងការជួយទ្រទ្រង់សុខភាពរបស់ប្រជាពលរដ្ឋ។ ឯកឧត្តមបានកត់សម្គាល់ថាចំពោះភ្ញៀវទេសចរណ៍បរទេស ដែលបានមកកម្សាន្តនៅប្រទេសកម្ពុជាក្នុងនោះក៏មានភ្ញៀវទេសចរអូស្រ្តាលីជាច្រើន និងមានអ្នកវិនិយោគអូស្រ្តាលីមកបណ្តាក់ទុនវិនិយោគក្នុងវិស័យទេសចរណ៍នៅកម្ពុជា ជាច្រើនផងដែរ។ ម្យ៉ាងទៀតអូស្រ្តាលីក៏បានជួយគាំទ្រដល់កម្ពុជាក្នុងការទប់ស្កាត់ការឆ្លងរាតត្បាតពីវីរុសកូវីត ១៩ កន្លងមក។ ឯកឧត្តមឧបនាយករដ្ឋមន្រ្តី សង្ឃឹមជឿជាក់ថា ឯកឧត្តម Justin Whyatt ដែលជាឯកអគ្គរាជទូតវិសាមញ្ញ និងពេញសមត្ថភាពថ្មីនៃប្រទេសអូស្រ្តាលីប្រចាំកម្ពុជានឹងបន្តគាំទ្រគម្រោងនានា ដែលឯកអគ្គរាជទូតអូស្រ្តាលីចាស់បានបញ្ចប់អាណត្តិបេសកកម្មនៅកម្ពុជានោះបានឯកភាពជាមួយ ឯកឧត្តមឧបនាយករដ្ឋមន្ត្រី ជាបន្តទៀត ដើម្បីជាការបង្កើនទំនាក់ទំនងមិត្តភាពសាមគ្គីភាពរវាងកម្ពុជានិងអូស្រ្តាលី ក្នុងចំណងការទូតរយៈពេល ៧១ ឆ្នាំ មកនេះ។
ជាការឆ្លើយតប ឯកឧត្តម Justin Whyatt បានមានប្រសាសន៍ថាចំណងទាក់ទងការទូតរវាងកម្ពុជា និងអូស្រ្តាលី គឺមានរយៈពេលជាយូរណាស់មកហើយ ហើយឯកឧត្តមមានក្តីរីករាយ ដែលបានមកកម្ពុជា ដើម្បីបន្តពង្រឹងបន្ថែមទៀតនូវកិច្ចសហប្រតិបត្តិការ និងមិត្តភាពដែលធ្លាប់មានពីមុនមក និងរីករាយក្នុងការធ្វើការងារជាមួយរាជរដ្ឋាភិបាលកម្ពុជា ក៏ដូចជា ឯកឧត្តមឧបនាយករដ្ឋមន្រ្តី ជា សុផារ៉ា ក្នុងកិច្ចសហប្រតិបត្តិការ ដែលធ្លាប់អនុវត្តកន្លងមក ក៏ដូចជាកិច្ចសហប្រតិបត្តិការផ្សេងៗទៀត ទាំងនៅក្នុងតំបន់អាស៊ាន ក៏ដូចជានៅក្នុងរបត់ផ្សេងៗនៅក្នុងពិភពលោក ផងដែរ៕