ឯកឧត្តមឧបនាយករដ្ឋមន្រ្តី ជា សុផារ៉ា រួមជាមួយថ្នាក់ដឹកនាំ និងមន្រ្តីរាជការនៃក្រសួងរៀបចំដែនដី នគរូបនីយកម្ម និងសំណង់ និមន្តព្រះសង្ឃសូត្រមន្តលើករាសីត្រៀមទទួលអំណរសាទរទេវតាឆ្នាំថ្មីឆ្នាំ២០២៣

April 05, 2023

ក្នុងឱកាសដែលឆ្នាំថ្មីប្រពៃណីជាតិ ឆ្នាំថោះ បញ្ចស័ក ព.ស២៥៦៧ គ.ស២០២៣ ជិតឈានចូលមកដល់នោះនៅរសៀលថ្ងៃពុធ ១៥កើត ខែចេត្រ ឆ្នាំខាល ចត្វាស័ក ព.ស.២៥៦៦ ត្រូវថ្ងៃទី ៥ ខែមេសា ឆ្នាំ២០២៣ ឯកឧត្តមឧបនាយករដ្ឋមន្រ្តី ជា សុផារ៉ា រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ រួមនិងថ្នាក់ដឹកនាំ និងមន្រ្តីរាជការនៃក្រសួងរៀបចំដែនដី នគរូបនីយកម្ម និងសំណង់ បានមកជួបជុំគ្នានៅទីស្តីការក្រសួង និមន្តព្រះសង្ឃសូត្រមន្តប្រោសព្រំជ័យមង្គលវិបុលសុខ លើករាសី ដើម្បីទទួលពរជ័យ និងជ័យជម្នះ គ្រប់ប្រការក្នុងការបន្តដឹកនាំ និងរួមគ្នាបំពេញកិច្ចការងារ ដែលរាជរដ្ឋាភិបាលបានប្រគល់ជូនឱ្យកាន់តែទទួលបានលទ្ធផលល្អប្រសើរថែមទៀត។
ពិធីសូត្រមន្តលើករាសីនេះបានប្រព្រឹត្តទៅតាមគន្លងប្រពៃណីព្រះពុទ្ធសាសនា ដោយមានការជួបជុំថ្នាក់ដឹកនាំ និងមន្រ្តីរាជការទាំងអស់ធ្វើបទនមស្ការព្រះរតនត្រ័យ សម្មាទានសីល និងនិមន្តព្រះសង្ឃចម្រើនព្រះបរិត្ត សូត្រមន្តលើករាសីចម្រើនសិរីសួស្តីក្នុងឆ្នាំថ្មីប្រពៃណីជាតិឆ្នាំថោះ បញ្ចស័ក ព.ស ២៥៦៧ ជូនដល់ថ្នាក់ដឹកនាំ និងបុគ្គលិកមន្រ្តីរាជការទាំងអស់ក្រោមឱវាទក្រសួងរៀបចំដែនដី នគរូបនីយកម្ម និងសំណង់ឱ្យទទួលបានជោគជ័យលើរាល់ការបំពេញភារកិច្ចថ្មីៗថែមទៀតក្នុងឆ្នាំថ្មីនេះ។
ក្នុងពិធីដ៏សិរីមង្គលប្រសើរថ្លៃថ្លានៃការត្រៀមទទួលអំណរសាទរនេះដែរ ឯកឧត្តមឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានបួងសួងដល់ទេវតាឆ្នាំថ្មី ដែលនឹងមកគ្រប់គ្រងភពផែនដីនេះ សូមប្រោសព្រំសព្វសាធុការពរបវរមហាប្រសើរ ជូនដល់ប្រមុខរាជរដ្ឋាភិបាលកម្ពុជា ដើម្បីបន្តដឹកនាំនាវាកម្ពុជា ឆ្ពោះទៅរកត្រើយសុខសន្តិភាព និងការអភិវឌ្ឍ ប្រជាពលរដ្ឋរស់នៅក្នុងភាពសុខដុមរមនា សម្បូរសប្បាយជារៀងរហូត និងសូមទេវតាឆ្នាំថ្មី ជួយតាមថែរក្សាការពារ ផ្តល់ពរជ័យដល់ថ្នាក់ដឹកនាំ និងមន្រ្តីរាជការទាំងអស់របស់ក្រសួងរៀបចំដែនដី នគរូបនីយកម្ម និងសំណង់ ឱ្យមានសុខភាពល្អ និងទទួលបានជោគជ័យថ្មីៗថែមទៀត ក្នុងការបំពេញតួនាទីភារកិច្ចរៀងៗខ្លួន សំដៅរួមគ្នាជំរុញឱ្យក្រសួងមានលទ្ធភាពអាចផ្តល់សេវាសាធារណៈ ជូនប្រជាពលរដ្ឋបានឆាប់រហ័ស និងទាន់ពេលវេលាឆ្លើយតបតាមសេចក្តីត្រូវការរបស់ពួកគាត់ ស្របតាមគោលនយោបាយរបស់រាជរដ្ឋាភិបាលកម្ពុជា និងរួមចំណែកយ៉ាងសកម្មសម្រាប់ការអភិវឌ្ឍសង្គមជាតិ ការបង្កើតកិត្យានុភាព គុណធម៌ សីលធម៌ និងឥរិយាបថដ៏ល្អប្រពៃក្នុងសង្គម ដែលមិនអាចខ្វះបាន។
ក្នុងរយៈពេលជាបន្តបន្ទាប់មកនេះ ថ្នាក់ដឹកនាំ មន្រ្ដីរាជការគ្រប់លំដាប់ថ្នាក់នៃក្រសួងរៀបចំដែនដី នគរូបនីយកម្ម និងសំណង់ ក្រោមការដឹកនាំរបស់ ឯកឧត្តមឧបនាយករដ្ឋមន្រ្តី ជា សុផារ៉ា បានរួមសហការសាមគ្គីគ្នាយកចិត្តទុកដាក់ប្រឹងប្រែងបំពេញភារកិច្ចយ៉ាងសកម្មរហូតទទួលបានលទ្ធផលយ៉ាងត្រចះត្រចង់ ហើយកិច្ចខិតខំប្រឹងប្រែងទាំងនេះ គឺដើម្បីរួមចំណែកក្នុងផែនការ និងសកម្មភាពរបស់រាជរដ្ឋាភិបាលក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី សំដៅធ្វើយ៉ាងណាស្តារ និងអភិវឌ្ឍប្រទេសជាតិឱ្យកាន់តែរីកចម្រើនរឹងមាំទ្វេរទៀត៕