ឯកឧត្តមឧបនាយករដ្ឋមន្ត្រី ជា សុផារ៉ា អញ្ជើញសម្ពោធឆ្លងមហាកុដិ និងសមិទ្ធផលនានា ក្នុងវត្តនិគ្រោធារាម ហៅវត្តប៉ើស ស្ថិតក្នុងស្រុកក្រូចឆ្មារ ខេត្តត្បូងឃ្មុំ

April 27, 2023

មហាកុដិ និងសមិទ្ធផលនានាក្នុងវត្តនិគ្រោធារាម ហៅវត្តប៉ើស ស្ថិតនៅក្នុងភូមិប៉ើស ឃុំប៉ើស២ ស្រុកក្រូចឆ្មារ ខេត្តត្បូងឃ្មុំ ត្រូវបានសម្ពោធឆ្លងដាក់ឱ្យប្រើប្រាស់ជាផ្លូវការ នាព្រឹកព្រហស្បតិ៍ ៨កើត ខែពិសាខ ឆ្នាំថោះ បញ្ចស័ក ព.ស.២៥៦៦ ត្រូវនឹងថ្ងៃទី ២៧ ខែមេសា ឆ្នាំ២០២៣ ក្រោមអធិបតីភាព ឯកឧត្តមឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តត្បូងឃ្មុំ តំណាងដ៏ខ្ពង់ខ្ពស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន។

តាមឯកឧត្តមបណ្ឌិត ជាម ច័ន្ទសោភ័ណ្ឌ អភិបាលនៃគណៈអភិបាលខេត្តត្បូងឃ្មុំ បានឱ្យដឹងថា វត្តនិគ្រោធារាម ហៅវត្តប៉ើស ជាវត្តបុរាណមួយដ៏ចំណាស់បង្កើតឡើងនៅឆ្នាំ ១៨០១ លើផ្ទៃដី ៦១ ០០០ ម៉ែត្រការ៉េ រហូតមកទល់បច្ចុប្បន្នមានអាយុកាល ២២២ ឆ្នាំហើយ។ វត្តវនេះក៏មិនខុសពីវត្តដទៃទៀតនៅទូទាំងប្រទេសដែរ គឺបានរងនូវវិនាសកម្មក្នុងរបបកម្ពុជាប្រជាធិបតេយ្យ ដែលបានធ្វើឱ្យវត្តនេះខូចខាតខ្ទេចខ្ទីគ្មានសល់។ ក្រោយថ្ងៃរំដោះ ៧ មករា ឆ្នាំ ១៩៧៩ វត្តនិគ្រោធារាម ហៅវត្តប៉ើស ត្រូវបានរៀបចំកសាងឡើងវិញជាបន្តបន្ទាប់ មកទល់បច្ចុប្បន្នវត្តនេះមានព្រះសង្ឃគង់នៅចំនួន ៣អង្គ ក្នុងនោះមានភិក្ខុ ១អង្គ សាមណេរ២អង្គ និងមានព្រះចៅអធិការវត្តព្រះនាម ស្រូយ គីមហ៊ង បានបន្តអភិវឌ្ឍន៍ហេដ្ឋារចនាសម្ព័ន្ធជាច្រើន ដើម្បីបម្រើឱ្យវិស័យព្រះពុទ្ធសាសនាគួរជាទីមោទនៈ។ ដោយឡែកសមិទ្ធផលនានា ក្នុងវត្តដែលត្រូវសម្ពោធឆ្លងនាពេលនេះ រួមមាន មហាកុដិចំនួន ២ខ្នង គឺ ១ខ្នងមានទំហំ ៨x២៥ម៉ែត្រ និង១ខ្នងទៀតមានទំហំ ៧x៣៥ម៉ែត្រ រួមជាមួយនឹងសមិទ្ធផលនានា ដែលចំណាយថវិកាសរុប ៦៤៧ ២២៥ ដុល្លារអាមេរិក ជាថវិកាដែលបានមកពីសទ្ធាដ៏ថ្លៃថ្លារបស់ សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ព្រមទាំងឯកឧត្តមឧបនាយករដ្ឋមន្ត្រី ជា សុផារ៉ា រួមនឹងសប្បុរសជន និងពុទ្ធបរិស័ទជិតឆ្ងាយផងដែរ។

ក្នុងឱកាសនោះ ឯកឧត្តមឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តត្បូងឃ្មុំ បានសង្កេតឃើញថាការរីកចម្រើនឥតឈប់ឈរនូវសមិទ្ធផលជាបន្តបន្ទាប់នៅក្នុងវត្តនិគ្រោធារាម ហៅវត្តប៉ើស នេះ គឺដោយសារតែព្រះចៅអធិការវត្ត និងអាចារ្យ គណៈកម្មការវត្ត តែងតែមានការខិតខំប្រឹងប្រែងផ្សារភ្ជាប់រវាងពុទ្ធបរិស័ទចំណុះជើងវត្ត និងសប្បុរសជនជិតឆ្ងាយ ដែលនេះគឺជាធាតុដ៏សកម្មក្នុងការអភិវឌ្ឍន៍វត្តអារាមនៅគ្រប់ទីកន្លែងទូទាំងប្រទេស។ ឯកឧត្តមឧបនាយករដ្ឋមន្ត្រី បានចាត់ទុកមហាកុដិ និងសមិទ្ធផលនានាក្នុងវត្តនិគ្រោធារាម ហៅវត្តប៉ើស ដែលត្រូវសម្ពោធឆ្លងនាពេលនេះថាជាសមិទ្ធផលដ៏ធំសឹ្កមស្កៃ ១ សម្រាប់ទុកជាសម្បត្តិគរុភ័ណ្ឌក្នុងវិស័យព្រះពុទ្ធសាសនា និងជាមោកនភាពដែលសប្បុរសជន និងពុទ្ធបរិស័ទជិតឆ្ងាយបានរួមចំណែកក្នុងការកសាងដោយសទ្ធាជ្រះថ្លា ដើម្បីឱ្យវត្តនេះមានគ្រប់រចនាសម្ព័ន្ធសាកសមជាទីសក្ការៈបូជារបស់ពុទ្ធបរិស័ទគ្រប់ទិសទី។ ឯកឧត្តមឧបនាយករដ្ឋមន្ត្រី ជា សុផារ៉ា បានសំណូមពរដល់ប្រជាពលរដ្ឋទាំងអស់នៅក្នុងឃុំប៉ើស ២ ក៏ដូចជាពុទ្ធបរិស័ទជិតឆ្ងាយទាំងអស់ឱ្យចូលរួមថែរក្សាសមិទ្ធផលនានា ក្នុងវត្តនិគ្រោធារាម ហៅវត្តប៉ើស នេះ ឱ្យបានគង់វង្ស ដើម្បីលើកស្ទួយវិស័យព្រះពុទ្ធសាសនាពីព្រោះសមិទ្ធផលទាំងនេះ គឺជាមោទកភាពរបស់ប្រជាពលរដ្ឋ ជាពុទ្ធបរិស័ទទាំងអស់ ក៏ដូចជាប្រជាពលរដ្ឋក្នុងឃុំប៉ើស ២ផ្ទាល់ ដែលបានរួមចំណែកបរិច្ចាគធនធានផ្ទាល់ខ្លួន ដើម្បីឱ្យសមិទ្ធផលដ៏ល្អទាំងនេះ លេចចេញជារូបរាងបាន។ ឯកឧត្តមឧបនាយករដ្ឋមន្ត្រី ក៏បានលើកឡើងផងដែរ អំពីសុខដុមនីយកម្មសាសនានៅក្នុងព្រះរាជាណាចក្រកម្ពុជា ក្រោមការដឹកនាំរបស់សម្ដេចតេជោនាយករដ្ឋមន្រ្តី ដែលបានផ្ដល់សេរីភាពខាងជំនឿសាសនា និងអាចធ្វើឱ្យសាសនាទាំងអស់នៅកម្ពុជា ទាំងព្រះពុទ្ធសាសនា អ៊ីស្លាមសាសនា ឬសាសនា ដទៃទៀតអាចរួមរស់នៅជាមួយគ្នាបានប្រកបដោយភាពសុខដុមរមនា ជួយគ្នាទៅវិញទៅមក ដើម្បីទូន្មានមនុស្សឱ្យប្រព្រឹត្តតែអំពើល្អ និងចូលរួមអភិវឌ្ឍន៍សង្គមជាតិជាមួយគ្នា។ ទន្ទឹមនេះ ឯកឧត្តមឧបនាយករដ្ឋមន្ត្រី បានអំពាវនាវដល់ប្រជាពលរដ្ឋគ្រប់រូបឱ្យបន្តផ្ដល់ការគាំទ្រខ្លាំងក្លាថែមទៀត ដល់ សម្ដេចអគ្គមហាសេនាបតីតេជោ ហ៊ុន សែន នៅ ក្នុងការបោះឆ្នោតជ្រើសតាំងតំណាងរាស្ត្រនីតិកាលទី ៧ ដែលនឹងប្រព្រឹត្តទៅនៅថ្ងៃទី ២៣ ខែកក្កដា ឆ្នាំ ២០២៣ ខាងមុខនេះ។

បន្ទាប់មក ឯកឧត្តមឧបនាយករដ្ឋមន្ត្រី ជា សុផារ៉ា ក៏បាននាំយកថវិការបស់ សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប្រគេនដល់ព្រះចៅអធិការវត្តនិគ្រោធារាម ហៅវត្តប៉ើស ចំនួន ១០ ០០០ ដុល្លារអាមេរិក ទុកសម្រាប់ចាត់ចែងប្រើប្រាស់តាមតម្រូវការក្នុងវត្តផងដែរ៕