ពិធីចែកប័ណ្ណសម្គាល់ម្ចាស់អចលនវត្ថុ របស់កម្មវិធីសម្បទានដីសង្គមកិច្ចជូនយោធិន នគរបាល និងគ្រួសារដែលកំពុងឈរជើងការពារបូរណភាពទឹកដីនៅតំបន់ទិសខាងលិច និងខាងជើងនៃព្រះរាជាណាចក្រកម្ពុជា

March 05, 2016

នាថ្ងៃទី០៥ ខែមីនា ឆ្នាំ២០១៦ វេលាម៉ោង ៨ម៉៣០នាទីព្រឹក ក្នុងទីតាំងបញ្ជាការដ្ឋានកងពលតូចអន្តរាគមន៍លេខ ៩ ស្រុកជាំក្សាន្ត ខេត្តព្រះវិហារ ឯកឧត្តមទេសរដ្ឋមន្រ្តី អឹុម ឈុនលឹម រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណៈកម្មាធិការសម្បទានដីសង្គមកិច្ចថ្នាក់ជាតិ បានអញ្ជើញជាអធិបតីក្នុងពិធីចែកប័ណ្ណសម្គាល់ម្ចាស់អចលនវត្ថុ របស់កម្មវិធីសម្បទានដីសង្គមកិច្ចជូនយោធិន នគរបាល និងគ្រួសារដែលកំពុងឈរជើងការពារបូរណភាពទឹក ដីនៅតំបន់ទិសខាងលិច និងខាងជើងនៃព្រះរាជាណាចក្រកម្ពុជានៅភូមិសែនរុងរឿង២ សែនរុងរឿង៣ សែនរុងរឿង៤ និង ភូមិតេជោមរកត ឃុំមរកត ស្រុកជាំក្សាន្ត ខេត្តព្រះវិហារ ដោយមានការអញ្ជើញចូលរួមពី ឯកឧត្តម អ៊ុំ ម៉ារ៉ា អភិបាល នៃគណៈអភិបាលខេត្តព្រះវិហារ ឯកឧត្តមនាយឧត្តមសេនីយ៍ បណ្ឌិត គន់ គីម អគ្គមេបញ្ជាការរង ជានាយសេនាធិការ ចម្រុះនៃកងយោធពលខេមរភូមិន្ទ ឯកឧត្តមនាយឧត្តមសេនីយ៍ឯក ស្រី ឌឹក នាយរងសេនាធិការចម្រុះ ជាមេបញ្ជា ការកងពលធំអន្តរាគមន៍លេខ៣ ឯកឧត្តមឧត្តមសេនីយ៍ទោ ដួង ច័ន្ទ មេបញ្ជាការកងពលតូចអន្តរាគមន៍លេខ៩ ឯកឧត្តម រដ្ឋលេខាធិការ អនុរដ្ឋលេខាធិការ អគ្គលេខាធិការ អគ្គលេខាធិការរងក្រសួងរៀបចំដែនដី នគរូបនីយកម្ម និង សំណង់ អភិបាលរងខេត្ត អភិបាលស្រុក ប្រធាន អនុប្រធានមន្ទីរជំនាញ អាជ្ញាធរមូលឋាន នាយទាហាន នាយទាហានរង យោធិន និងគ្រួសារ ដែលទទួលបានសម្បទានដីសង្គមកិច្ច សរុបជាងប្រមាណ ៨០០នាក់។ តាមរបាយការណ៍របស់ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត និងមតិចាប់អារម្មណ៍ របស់ ឯកឧត្តម អ៊ុំ ម៉ារ៉ា បានបញ្ជាក់ថា ទីតាំងនេះជាការអនុវត្តកម្មវិធីសម្បទានដីសង្គមកិច្ចជូនយោធិន នគរបាល និងគ្រួសារដែលកំពុងឈរជើងការពារបូរណភាពទឹកដីតាមបណ្តោយព្រំដែនទិសខាងលិច និងខាងជើងនៃព្រះរាជាណាចក្រកម្ពុជា ដោយមានការសាងសង់ហេដ្ឋារចនាសម្ព័ន្ធចាំបាច់មួយចំនួនដូចជា អណ្តូងទឹកស្អាត ផ្លូវ សាលារៀន ប៉ុស្តិ៍សុខភាព និងផ្ទះ ព្រមទាំងបានជួយភ្ជួរដីសម្រាប់កសិកម្មផងដែរ។ ចំនួនប័ណ្ណកម្មសិទ្ធិដីធ្លីដែលត្រូវចែកនាថ្ងៃនេះមាន ៦៦៧ប័ណ្ណស្មើនឹងផ្ទៃដីទំហំ ២៦៦,២៧ហិកតា ជូនដល់យោធិន និងគ្រួសារចំនួន ៦៥៨គ្រួសារ។ ក្នុងឱកាសនេះ ឯកឧត្តមទេសរដ្ឋមន្រ្តី អ៊ឹម ឈុនលឹម បានថ្លែងកោតសរសើរចំពោះគណៈកម្មការអន្តរក្រសួងដើម្បីសម្របសម្រួលរៀបចំនិងអនុវត្តគម្រោងអភិវឌ្ឍន៍នៅតាមបណ្តោយព្រំដែនទិសខាងលិច និងខាងជើងនៃព្រះរាជា ណាចក្រកម្ពុជា ដឹកនាំដោយឯកឧត្តមរដ្ឋមន្រ្តីក្រសួងអភិវឌ្ឍន៍ជនបទ ក្រុមការងារបច្ចេកទេសគ្រប់លំដាប់ថ្នាក់ ក្រុមការងារចុះបញ្ជីដីធ្លី អង្គភាពយោធា នគរបាល ដែលបានសហការគ្នាអនុវត្តការងារទទួលបានលទ្ធផលល្អប្រសើររហូតមកដល់ ពេលនេះ។ ឯកឧត្តមទេសរដ្ឋមន្រ្តី បានរំលឹកឡើងវិញថាចាប់តាំងពីឆ្នាំ២០០៨មក ដើម្បីរក្សាការពារ គ្រប់គ្រងបូរណភាពទឹកដី និងដើម្បីអភិវឌ្ឍន៍តាមតំបន់បន្ទាត់ព្រំដែន រាជរដ្ឋាភិបាលបានបង្កើតគម្រោងកសាងភូមិថ្មីជូនកងកម្លាំងប្រដាប់អាវុធ និងគ្រួសារ ដើម្បីឈរជើង និងរស់នៅជាអចិន្រ្តៃយ៍ក្នុងតំបន់នេះ គឺធានាភាពកក់ក្តៅដល់កងកម្លាំងប្រដាប់អាវុធអាចរស់នៅជាមួយគ្រួសាររបស់ខ្លួនក្បែរទីតាំងឈរជើង។ លទ្ធផលសម្រេចបាន និងធ្វើពិធីចែកបណ្ណ័នៅថ្ងៃនេះ គឺជាចំណែកមួយនៃគម្រោងកសាងភូមិថ្មីតាមតំបន់ព្រំដែនទាំង២ខេត្ត ព្រះវិហារ និងឧត្តរមានជ័យ ដែលសរុបលទ្ធផលទាំងអស់សម្រេចបាន ផ្តល់ផ្ទះ ៣០៩២ខ្នង ដល់ ៣០៩២ គ្រួសារលើផ្ទៃដី ១២២២០ហិកតា។ ក្រៅពីគម្រោងនៅតំបន់ព្រំដែន ឯកឧត្តមទេសរដ្ឋមន្រ្តី ក៏បានផ្តល់ព័ត៌មានផងដែរថា ដោយការយកចិត្តទុកដាក់ដ៏ខ្ពង់ខ្ពស់របស់ សម្តេចតេជោនាយករដ្ឋមន្រ្តី ដែលជានិច្ចកាលតែងគិតគូរដល់សុខទុក្ខជីវភាពរស់នៅរបស់កងកម្លាំងប្រដាប់អាវុធ ដោយបានផ្តល់ផ្ទះ ១៥៦០ខ្នង ដីលំនៅឋាន និងដីកសិកម្ម ៤៥៣០ហិកតា ដល់អតីតកងកម្លាំងប្រដាប់អាវុធ និងគ្រួសារចំនួន ៣៣០១គ្រួសារ។ ដូច្នេះសរុបលទ្ធផលការផ្តល់ជូនរបស់រាជរដ្ឋាភិបាលដល់កងកម្លាំងប្រដាប់អាវុធ ទាំងកម្លាំងកំពុងបំពេញភារៈកិច្ចសកម្ម និងកម្លាំងចូលនិវត្ត គឺបានផ្តល់ផ្ទះចំនួន ៤៦៥២ខ្នង ដីលំនៅឋាន និងដីកសិកម្ម ១៦៧៥០ហិកតា ដល់ ៦៣៩៣គ្រួសារ។ ក្នុងឱកាសនោះដែរ ឯកឧត្តមទេសរដ្ឋមន្រ្តី អ៊ឹម ឈុនលឹម ក៏បានផ្ដល់អាវយឺតម៉ាកល្អ តម្លៃ ៦៥ដុល្លារ ដល់គ្រួសារគ្រួសារកងទ័ព។ ទន្ទឹមនេះ ឯកឧត្តមទេសរដ្ឋមន្រ្តី ក៏បានចុះពិនិត្យមើលការរស់នៅ និងការបង្កបង្កើនផល របស់បងប្អូនយោធា និងគ្រួសារផងដែរ ។