ឯកឧត្តមទេសរដ្ឋមន្ត្រី ជា សុផារ៉ា អនុញ្ញាតឲ្យ ឯកឧត្តម Yuji KUMAMARU ឯកអគ្គរដ្ឋទូតជប៉ុន ប្រចាំព្រះរាជាណាចក្រកម្ពុជាចូលជួបសំដែងការគួរសម

May 10, 2016

ថ្ងៃអង្គារ ១២ រោច ខែពិសាខ ឆ្នាំវក ព.ស. ២៥៥៩ ត្រូវនឹងថ្ងៃទី ១០ ខែឧសភា គ.ស. ២០១៦ ឯកឧត្តម ជា សុផារ៉ា ទេសរដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានអនុញ្ញាតឲ្យ ឯកឧត្តម Yuji KUMAMARUឯកអគ្គរដ្ឋទូតជប៉ុន ប្រចាំព្រះរាជាណាចក្រកម្ពុជាចូលជួបសំដែងការគួរសម ។ នៅក្នុងជំនួបនេះ ឯកឧត្តមទេសរដ្ឋមន្ត្រី ជា សុផារ៉ា បានសំដែងនូវការថ្លែងអំណរគុណចំពោះរដ្ឋាភិបាលជប៉ុន ដែលតែងតែផ្តល់នូវកិច្ចសហប្រតិបត្តិការល្អជាមួយកម្ពុជាកន្លងមក និងបានជួយជ្រោមជ្រែងក្នុងការជួសជុលប្រាសាទអង្គរវត្តក្នុងខេត្តសៀមរាប ពិសេសការគាំទ្រយ៉ាងពេញទំហឹងក្នុងការដាក់បញ្ចូលប្រាសាទព្រះវិហារ ជាបេតិកភ័ណ្ឌពិភពលោក ។ ជាមួយគ្នានេះដែរ ឯកឧត្តមទេសរដ្ឋមន្ត្រី ជា សុផារ៉ា បានស្នើឲ្យរដ្ឋាភិបាលជប៉ុនជួយបន្ថែមនូវការបង្កើតវគ្គបណ្តុះបណ្តាលលើវិស័យសំណង់សម្រាប់មន្ត្រីរាជការ ដើម្បីពង្រឹងចំណេះដឹង និងផ្លាស់ប្តូរបទពិសោធន៍ផងដែរ ។ លើសពីនេះ ឯកឧត្តមទេសរដ្ឋមន្ត្រី នឹងពង្រឹងកិច្ចសហប្រតិបត្តិការរវាងក្រសួងរៀបចំដែនដី នគរូបនីយកម្ម និងសំណង់ នៃព្រះរាជាណាចក្រកម្ពុជា ជាមួយក្រសួងដែនដី ហេដ្ឋារចនាសម្ព័ន្ធ គមនាគមន៍ និងទេសចរណ៍របស់ប្រទេសជប៉ុន ។ ឆ្លើយតបនឹងចំណាប់អារម្មណ៍អំពីបញ្ហាដីធ្លីក្នុងព្រះរាជាណាចក្រកម្ពុជាដែលជាបញ្ហារស៊ើប ឯកឧត្តមទេសរដ្ឋមន្ត្រី បានបញ្ជាក់អំពីការខិតខំប្រឹងប្រែងរបស់រដ្ឋាភិបាលកម្ពុជា ក្រោមការដឹកនាំរបស់ សម្តេចតេជោនាយករដ្ឋមន្ត្រី ក្នុងការដោះស្រាយបញ្ហាដីធ្លីក្នុងព្រះរាជាណាចក្រកម្ពុជា ពិសេសគឺការចុះបញ្ជីដីធ្លីជូនប្រជាពលរដ្ឋ ការជម្រុញការអនុវត្តច្បាប់សំណង់ និងមានចំណាត់ការភ្លាមៗចំពោះបុគ្គល ឬមន្ត្រីរាជការប្រព្រឹត្តបទល្មើសដែលស្ថិតក្រោមសមត្ថកិច្ចរបស់ក្រសួង ដោយជឿជាក់យ៉ាងមុតមាំថា នៅចុងឆ្នាំ ២០១៧ បញ្ហាដីធ្លីក្នុងព្រះរាជាណាចក្រកម្ពុជានឹងមានភាពប្រសើរឡើង ។

កិច្ចប្រជុំបានបញ្ចប់នៅវេលាម៉ោង ៤ រសៀល នៅថ្ងៃខែឆ្នាំដដែល ក្នុងបរិយាកាសរីករាយ និងទទួលខុសត្រូវខ្ពស់ ។