ឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ ទទួលជួបពិភាក្សាការងារជាមួយលោកស្រី Kim Shomi តំណាងវិទ្យាស្ថានអភិវឌ្ឍន៍បៃតងសកលប្រចាំកម្ពុជា Global Green Growth Institute (GGGI)

លោកស្រី Kim Shomi សម្តែងការអបអរសាទរយ៉ាងកក់ក្តៅជូនចំពោះ ឯកឧត្តមឧបនាយករដ្ឋមន្ត្រី ដែលត្រូវបានតែងតាំងជា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់។ លោកស្រី បានថ្លែងអំណរគុណសម្រាប់ការគាំទ្រជាបន្តបន្ទាប់ ចំពោះគម្រោងនិងកម្មវិធីរបស់វិទ្យាស្ថាន GGGI សម្រាប់ប្រទេសកម្ពុជា ព្រមទាំងអនុសាសន៍ណែនាំកន្លងមកក្នុងអំឡុងពេល ឯកឧត្តម មានតួនាទីជារដ្ឋមន្ត្រីក្រសួងបរិស្ថាន។

លោកស្រី Kim Shomi បានធ្វើការបង្ហាញ និងស្នើសុំទិសដៅយុទ្ធសាស្ត្រលើគម្រោងការផ្លាស់ប្តូរកាបូនទាបនៅអាស៊ី (ALCBT) និងស្នើសុំការណែនាំលើវិធីសាស្ត្រអនុវត្តគម្រោងដើម្បីស្របតាមអាទិភាពរបស់រាជរដ្ឋាភិបាល។ លើសពីនេះ លោកស្រីបានស្នើសុំបន្ទប់ការិយាល័យសម្រាប់វិទ្យាស្ថាន GGGI នៅក្រសួងរៀបចំដែនដី នគរូបនីយកម្ម និងសំណង់ ដែលអាចឱ្យអ្នកជំនាញបច្ចេកទេសសំណង់បៃតងរបស់វិទ្យាស្ថាន ធ្វើការយ៉ាងជិតស្និទ្ធជាមួយអង្គភាពបច្ចេកទេសរបស់ក្រសួងលើចំណុចផ្តោតទាំងនោះ។

ជាការឆ្លើយតប ឯកឧត្តមឧបនាយករដ្ឋមន្ត្រី បានស្វាគមន៍យ៉ាងកក់ក្តៅចំពោះវិទ្យាស្ថាន GGGI និងលើកអំពីចក្ខុវិស័យសំខាន់ៗពាក់ព័ន្ធការបន្តការកែលម្អការរៀបចំនគរូបនីយកម្ម និងការរៀបចំក្រុង ស្របតាមបរិបទនៃការរស់នៅបច្ចុប្បន្ន និងទៅអនាគត។ ឯកឧត្តម សាយ សំអាល់ គាំទ្រចំពោះកិច្ចសហប្រតិបត្តិការជាមួយ GGGI ពិសេសលើទស្សនទានពាក់ព័ន្ធអគារបៃតង (green building) និងការរៀបចំក្រុងដែលមានការបំភាយកាបូនទាបបំផុត (low carbon urban design) ដោយផ្តើមចេញពីគម្រោងតូចៗ ដើម្បីការរស់នៅប្រកបដោយសុខដុមក្នុងទីក្រុងទំនើប ស្អាត ឆ្លាត នៃសង្គមសហសម័យក្រោមម្លប់សន្តិភាព។

ឯកឧត្តមឧបនាយករដ្ឋមន្ត្រី បានលើកទឹកចិត្តក្នុងកាស្វែងរកប្រភពហិរញ្ញប្បទានបៃតង (Green finance) ដើម្បីរួមចំណែកក្នុងការរៀបចំនគរូបនីយកម្មប្រកបដោយនិរន្តរភាព។

ឯកឧត្តមឧបនាយករដ្ឋមន្ត្រី បានអនុញ្ញាតឱ្យក្រុមការងាររបស់ GGGI ប្រើប្រាស់បន្ទប់ការិយាល័យក្នុងអគារក្រសួងរៀបចំដែនដី នគរូបនីយកម្ម និងសំណង់ដើម្បីធ្វើការជិតស្និតជាមួយក្រសួង។

ក្រសួងរៀបចំដែនដី នគរូបនីយកម្ម និងសំណង់

២៣ តុលា ២០២៣