និយមន័យនៃពាក្យ «សហកម្មសិទ្ធិពិសេស,សហកម្មសិទ្ធិករពិសេស,កម្មសិទ្ធិអវិភាគពិសេស និងឡូត៍»

តោះ! មកស្វែងយល់បន្តនូវនិយមន័យនៃពាក្យ «សហកម្មសិទ្ធិពិសេស,សហកម្មសិទ្ធិករពិសេស,កម្មសិទ្ធិអវិភាគពិសេស និងឡូត៍» ដែលប្រើនៅក្នុងច្បាប់ស្ដីពីការផ្តល់សិទ្ធិលើចំណែកឯកជននៃអគារសហកម្មសិទ្ធិដល់ជនបរទេស។

តើពាក្យខាងលើនេះមានន័យយ៉ាងដូចម្តេច?
oសហកម្មសិទ្ធិពិសេស៖ គឺសំដៅដល់សិទ្ធិរបស់បុគ្គលច្រើនរូបជាជនបរទេស និងជាពលរដ្ឋខ្មែរលើអគារសហកម្មសិទ្ធិតែមួយ ដែលក្នុងនោះជនបរទេស និងពលរដ្ឋខ្មែរមានសិទ្ធិកម្មសិទ្ធិលើចំណែកឯកជន និងមានសិទ្ធិកម្មសិទ្ធិអវិភាគពិសេសលើចំណែករួមនៃអគារសហកម្មសិទ្ធិ។
oសហកម្មសិទ្ធិករពិសេស៖ គឺសំដៅដល់ជនបរទេសដែលមានសិទ្ធិសហកម្មសិទ្ធិពិសេស។
oកម្មសិទ្ធិអវិភាគពិសេស៖ គឺសំដៅដល់សិទ្ធិរបស់បុគ្គលច្រើនរូបលើចំណែករួមនៃអគារសហកម្មសិទ្ធិ ដែលក្នុងនោះជនបរទេសមានសិទ្ធិប្រើប្រាស់ និងអាស្រ័យផលលើចំណែករួម ហើយពលរដ្ឋខ្មែរមានសិទ្ធិកម្មសិទ្ធិអវិភាគលើចំណែករួម ដោយសារមានកម្មសិទ្ធិលើចំណែកឯកជន។
oឡូត៍៖ គឺសំដៅដល់ចំណែកឯកជនដែលភ្ជាប់ទៅនឹងចំណែករួមនៃអគារសហកម្មសិទ្ធិ។ ឡូត៍នីមួយៗ មានតម្លៃខុសៗគ្នាទៅតាមទំហំតូច ឬធំ នៃចំណែកឯកជន ហើយការគណនាត្រូវគិតទៅតាមផ្ទៃក្រឡានៃចំណែកឯកជនរបស់សហកម្មសិទ្ធិករនីមួយៗ។
(ប្រភព៖ច្បាប់ស្ដីពីការផ្តល់សិទ្ធិលើចំណែកឯកជននៃអគារសហកម្មសិទ្ធិដល់ជនបរទេស ដកស្រង់ចេញពី៖មាត្រា៤)