ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ ចាត់ទុកការអភិវឌ្ឍន៍សួនកសិ-ឧស្សាហកម្មថាជាអណ្ដូងមាសសម្រាប់ប្រទេសជាតិ និងប្រជាជនកម្ពុជា

(ភ្នំពេញ)៖ ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ បានចាត់ទុកការអភិវឌ្ឍន៍សួនកសិ-ឧស្សាហកម្មថាជាអណ្ដូងមាសសម្រាប់ប្រជាជនកម្ពុជាដែលអាចបង្កើតការងារ និងប្រាក់ចំណូលជូនដល់ប្រជាពលរដ្ឋ និងបង្កើនសេដ្ឋកិច្ចជាតិឱ្យកាន់តែប្រសើរឡើងថែមទៀត។

ថ្លែងក្នុងកិច្ចប្រជុំពិនិត្យ និងផ្ដល់យោបល់លើក្របខណ្ឌគាំទ្រសម្រាប់អភិវឌ្ឍន៍សួនកសិ-ឧស្សាហកម្មនៅកម្ពុជា ដែលបានធ្វើឡើងនៅទីស្ដីការក្រសួង នាព្រឹកថ្ងៃទី១៦ ខែសីហា ឆ្នាំ២០២៤។

ឯកឧត្តមឧបនាយករដ្ឋមន្ត្រី សាយ សំអាល់ បានបញ្ជាក់ថាការអភិវឌ្ឍន៍សួនកសិ-ឧស្សាហកម្មនៅកម្ពុជាអាចដំណើរការទៅបានលុះត្រាតែប្រជាពលរដ្ឋកម្ពុជាមានលទ្ធភាពធនធាននិងសមត្ថភាពគ្រប់គ្រាន់ មានភាពវាងវៃ រហ័សរហួន ឧស្សាហ៍ព្យាយាម និងមានទីផ្សារសម្រាប់នាំចេញ។

នាឱកាសនោះ ឯកឧត្តម បានស្នើឱ្យសមាជិកអង្គប្រជុំចូលរួមគិតពិចារណាផ្ដល់មតិយោបល់ដើម្បីប្រមូលបានធាតុចូលល្អៗក្នុងក្របខ័ណ្ឌគាំទ្រសម្រាប់អភិវឌ្ឍន៍សួនកសិ-ឧស្សាហកម្មនៅកម្ពុជា ដែលនឹងត្រូវរៀបចំបង្កើតសួនកសិ-ឧស្សាហកម្មនេះនៅក្នុងខេត្ត រាជធានីឬទីតាំងណាមួយដែលមានសក្តានុពលខ្លាំង៕