ឯកឧត្តមឧបនាយករដ្ឋមន្ត្រី សាយ សំអាល់យកចិត្តទុកដាក់ជួបសំណេះសំណាលជាមួយនិវត្តន៍ជននិងមន្ត្រីដែលបម្រើការងារនៅទីស្ដីការក្រសួងរៀបចំដែនដី នគរូបនីយកម្ម និងសំណង់ ក្នុងឱកាសពិធីបុណ្យកាន់បិណ្ឌ ភ្ជុំបិណ្ឌ

(ភ្នំពេញ)៖ ឯកឧត្តមឧបនាយករដ្ឋមន្ត្រី សាយ សំអាល់ បានឱ្យដឹងថា ការជួបជុំគ្នានាពេលនេះគឺតែងតែធ្វើឡើងជារៀងរាល់ឆ្នាំក្នុងឱកាសពិធីបុណ្យកាន់បិណ្ឌ ភ្ជុំបិណ្ឌ ដែលជាពិធីបុណ្យប្រពៃណីព្រះពុទ្ធសាសនារបស់ព្រះរាជាណាចក្រកម្ពុជា ដែលនេះជាឱកាសដ៏ល្អ ដើម្បីបង្ហាញពីការយកចិត្តទុកដាក់គិតគូរក្នុងនាមជាក្រុមគ្រួសារតែមួយនៃក្រសួងរៀបចំដែនដី នគរូបនីយកម្ម និងសំណង់ និងជាទំនៀមទម្លាប់របស់ខ្មែរ ជាកាយវិការរាប់អានញាតិមិត្ត ដែលគប្បីត្រូវប្រកាន់យកដើម្បីជ្រោងទង់ថែរក្សាវប្បធម៌នេះបានគង់វង្ស។

ឯកឧត្តមឧបនាយករដ្ឋមន្ត្រី ថ្លែងក្នុងពេលជួបសំណេះសំណាលជាមួយនិវត្តន៍ជនចំនួន ៧៤៨រូប មន្ត្រីនគរបាលការពារទីស្ដីការក្រសួងចំនួន ១២រូប បុគ្គលិកអនាម័យចំនួន ២២រូប អ្នកថែសួនចំនួន ៧រូប និងមន្ត្រីជាប់កិច្ចសន្យាចំនួន ១១៦រូប ដែលបម្រើការងារនៅទីស្ដីការក្រសួង នារសៀលថ្ងៃទី២៣ ខែកញ្ញា ឆ្នាំ២០២៤។

ជាមួយគ្នានេះ ឯកឧត្តមឧបនាយករដ្ឋមន្ត្រី យល់ឃើញថា នេះមិនគ្រាន់តែជាការជួបជុំសំណេះសំណាលគ្នាប៉ុណ្ណោះទេ ប៉ុន្តែក៏ជាការចូលរួមកសាងសង្គមជាតិសារជាថ្មីម្ដងទៀត ពីព្រោះក្រោយឆ្លងកាត់របបខ្មែរក្រហមរួចមក ខ្មែរក្រហមបានសម្លាប់មនោសញ្ចេតនារបស់ប្រជាជនអស់គ្មានសល់ ដូច្នេះបច្ចុប្បន្ននេះ គឺជាពេលវេលាដ៏សំខាន់សម្រាប់យើងក្នុងការកសាងមនោសញ្ចេតនារបស់ប្រជាជនជាថ្មីឡើងវិញ និងបោះជំហានទៅមុខទៀត។

ឯកឧត្តម បន្ថែមថា នេះក៏ជាពេលវេលាដ៏ល្អ និងសមស្របបំផុត ដើម្បីជម្នះខ្លួនឯងក្នុងការជ្រោងទង់សាមគ្គីឯកភាពផ្ទៃក្នុង បន្តនិរន្តរភាព បន្តដំណើរការរបស់ក្រសួង ទាំងការគ្រប់គ្រងក្រសួង គ្រប់គ្រងធនធានមនុស្សនិងហិរញ្ញវត្ថុ ទ្រទ្រង់នូវវប្បធម៌សាមគ្គីភាពមួយក្នុងជួរមន្ត្រីរាជការស៊ីវិល ពីព្រោះឯកឧត្តមយល់ឃើញថា ការដែលមិនបន្តនិរន្តរភាពនេះហើយ ទើបធ្វើឱ្យកម្ពុជាមានភាពទន់ខ្សោយ និងបែកបាក់ក្នុងប្រវត្តិសាស្ត្រ។

នាឱកាសនោះ ឯកឧត្តមឧបនាយករដ្ឋមន្ត្រី សាយ សំអាល់ បានបញ្ជាក់ថា ពាក្យថា “កសាងជាតិ” មានន័យថាធ្វើឱ្យប្រាក់សន្សំរបស់ប្រជាជនម្នាក់ៗមានការកើនឡើងក្នុងសង្គមជាតិ ក៏ដូចជាក្នុងគ្រួសារ ដូច្នេះទើបរាជរដ្ឋាភិបាលកម្ពុជាខិតខំប្រឹងប្រែងដាក់ចេញនូវយុទ្ធសាស្ត្រនានាសំដៅបង្កើនជីវភាពរបស់ប្រជាពលរដ្ឋឱ្យប្រសើរឡើង និងកែប្រែមុខមាត់ប្រទេសជាតិឱ្យមានការវិវត្តរីកចម្រើនបន្ថែមទៀត៕