ឯកឧត្តមឧបនាយករដ្ឋមន្ត្រី សាយ សំអាល់ លើកទឹកចិត្តដល់និវត្តន៍ជន និងមន្ត្រីរាជការដែលមានពិការភាព បន្តចូលរួមកសាងអភិវឌ្ឍប្រទេសជាតិតទៅមុខ និងបន្តរក្សាគុណតម្លៃក្នុងនាមជាមន្ត្រីរាជការស៊ីវិល

(ភ្នំពេញ)៖ ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា ការចូលរួមរបស់និវត្តន៍ជន និងមន្ត្រីរាជការដែលមានពិការភាពក្នុងការកសាងអភិវឌ្ឍប្រទេសជាតិ គឺពិតជាមានសារសំខាន់មិនអាចខ្វះបាន ពីព្រោះពួកគាត់សុទ្ធតែជាអ្នកមានស្នាដៃល្អ បានខិតខំប្រឹងប្រែងបំពេញការងារទទួលបានលទ្ធផលល្អប្រសើរជាប្រយោជន៍សម្រាប់ស្ថាប័ន និងសង្គមជាតិនារយៈកាលកន្លងមក និងសុទ្ធសឹងជាអ្នកដែលមានបទពិសោធន៍ច្រើនក្នុងការបំពេញការងារ។

ឯកឧត្តមឧបនាយករដ្ឋមន្ត្រី ថ្លែងបែបនេះ ក្នុងឱកាសជួបសំណេះសំណាលជាមួយនិវត្តន៍ជន និងមន្ត្រីរាជការដែលមានពិការភាព រួមនិងក្រុមការងារសកម្មភាពជនពិការក្រសួងឆ្នាំ២០២៣ នាថ្ងៃទី១៥ ខែធ្នូ។

ជាមួយគ្នានេះ ឯកឧត្តមឧបនាយករដ្ឋមន្ត្រីបានឱ្យដឹងថា ការជួបជុំគ្នានាពេលនេះគឺដើម្បីថ្លែងអំណរគុណចំពោះការលះបង់អស់ពីកម្លាំងកាយចិត្តក្នុងការបំពេញការងារនារយៈកាលកន្លងមករបស់និវត្តន៍ជន និងមន្ត្រីរាជការដែលមានពិការភាព រួមចំណែកបម្រើដល់ប្រជាពលរដ្ឋនិងអភិវឌ្ឍស្ថាប័ន និងប្រទេសជាតិ ឱ្យមានការរីកចម្រើនរហូតមកទល់បច្ចុប្បន្ននេះ។

ក្នុងឱកាសនោះ ឯកឧត្តមឧបនាយករដ្ឋមន្ត្រី សាយ សំអាល់ បានលើកឡើងពីសភាពការណ៍នយោបាយទាំងក្នុងតំបន់ និងពិភពលោក បញ្ហាសង្គ្រាមរវាងរុស្ស៊ីនិងអ៊ុយក្រែន រួមនិងសច្ចភាពប្រវត្តិសាស្ត្ររបស់ព្រះរាជាណាចក្រកម្ពុជា ដែលបានឆ្លងកាត់សង្គ្រាមជាច្រើនដំណាក់កាលទាំងលំបាកលំបិន រហូតមកមានសន្តិភាពពេញលេញ និងមានអ្វីៗគ្រប់យ៉ាងដូចសព្វថ្ងៃនេះ ដែលម្លប់សុខសន្តិភាពនេះបានមកពីគំនិតផ្ដួចផ្ដើមរបស់សម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបន្តមរតកសន្តិភាពដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីក្នុងនីតិកាលទី៧នេះ ដើម្បីជាគតិសម្រាប់និវត្តន៍ជននិងមន្ត្រីរាជការដែលមានពិការភាពបានស្ដាប់ និងស្វែងយល់អំពីបទពិសោធន៍ល្អៗ និងអ្វីដែលគួរជៀសវាងព្រមទាំងយល់ដឹងអំពីសភាពការណ៍នយោបាយទូទៅទាំងក្នុងប្រទេស តំបន់និងពិភពលោក។

រាជរដ្ឋាភិបាលកម្ពុជា តាមរយៈក្រសួងរៀបចំដែនដី នគរូបនីយកម្ម និងសំណង់ បានខិតខំប្រឹងប្រែងបង្ខិតគម្លាតរវាងជនបទ និងទីក្រុងឱ្យខិតជិតគ្នា និងប្រែក្លាយជនបទទៅជាទីក្រុងដែលមានភាពរីកចម្រើនលើគ្រប់វិស័យមានហេដ្ឋារចនាសម្ព័ន្ធគ្រប់បែបយ៉ាង ដើម្បីធ្វើយ៉ាងណាឱ្យប្រជាពលរដ្ឋរស់នៅដោយភាពសុខដុមរមនា និងបង្កើនជីវភាពរស់នៅរបស់ប្រជាពលរដ្ឋ ឱ្យមានភាពល្អប្រសើរដូចគ្នានៅគ្រប់ទីកន្លែងទូទាំងប្រទេស៕