ឯកឧត្តមឧបនាយករដ្ឋមន្ត្រី ចាត់ទុកជប៉ុនជាមិត្តដ៏ជិតស្និទ្ធដែលបានជួយកម្ពុជាក្នុងការស្វែងរកសន្តិភាព កសាង និងស្ដារប្រទេសកម្ពុជាឡើងវិញ និងស្នើដល់ភាគីជប៉ុនឱ្យបន្តការសហការជួយលើផ្នែកសុរិយោដី និងលំនៅឋានបន្តទៀត

(ភ្នំពេញ)៖ ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បញ្ជាក់ថាជប៉ុនជាមិត្តដ៏ជិតស្និទ្ធរបស់កម្ពុជា និងបានជួយដល់កម្ពុជាយ៉ាងច្រើនក្នុងការស្វែងរកសន្តិភាព ជួយស្តារលើគ្រប់វិស័យ ពិសេសផ្សារភ្ជាប់ហេដ្ឋារចនាសម្ព័ន្ធរូបវន្តក្នុងតំបន់តាមរយៈការស្ថាបនាផ្លូវជាតិលេខ ៥ ដែលតភ្ជាប់បណ្ដាខេត្តជាច្រើននៅកម្ពុជាក៏ដូចជាប្រទេសជិតខាង។ ជាមួយគ្នានេះ ឯកឧត្តមឧបនាយករដ្ឋមន្ត្រី បានស្នើដល់ភាគីជប៉ុនបន្តសហការជួយលើផ្នែកសុរិយោដី និងលំនៅឋានបន្តទៀត។

ឯកឧត្តមឧបនាយករដ្ឋមន្ត្រី ថ្លែងនាឱកាសទទួលជួបសម្ដែងការគួរសម និងពិភាក្សាការងារជាមួយឯកឧត្តម ISHIBASHI Rintaro អនុរដ្ឋមន្ត្រីក្រសួងដីធ្លី ហេដ្ឋារចនាសម្ព័ន្ធ ដឹកជញ្ជូននិងទេសចរណ៍នៃប្រទេសជប៉ុន និងឯកឧត្តម UENO Atsushi ឯកអគ្គរាជទូតជប៉ុនប្រចាំកម្ពុជានាព្រឹកថ្ងៃទី២១ ខែធ្នូ ឆ្នាំ២០២៣ នៅទីស្តីការក្រសួង។

ឯកឧត្តមឧបនាយករដ្ឋមន្ត្រី បានស្វាគមន៍ចំពោះដំណើរទស្សនកិច្ចរបស់ឯកឧត្តម ISHIBASHI Rintaro មកកាន់ទឹកដីនៃព្រះរាជាណាចក្រកម្ពុជានាពេលនេះ ស្របពេលដែលសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ទើបតែបញ្ចប់ទស្សនកិច្ចប្រកបដោយជោគជ័យនៅប្រទេសជប៉ុនថ្មីៗនេះ។ នេះសបញ្ជាក់យ៉ាងច្បាស់អំពីចំណងមិត្តភាពដ៏ជិតស្និទ្ធ និងចំណងមិត្តភាពជាយុទ្ធសាស្ត្រគ្រប់ជ្រុងជ្រោយរវាងកម្ពុជា និងជប៉ុន។

ឯកឧត្តមឧបនាយករដ្ឋមន្ត្រី សាយ សំអាល់ លើកឡើងថា ក្រសួងរៀបចំដែនដី នគរូបនីយកម្ម និងសំណង់គ្រោងនឹងដាក់ចេញគោលនយោបាយនាពេលសមស្រប ដើម្បីឱ្យប្រជាជនកម្ពុជាមានលំនៅឋានសមរម្យ ហើយគ្រួសាររស់នៅប្រកបដោយភាពសុខដុមរមនា ដោយសារបច្ចុប្បន្នប្រទេសជាតិមានសុខសន្តិភាព ហើយជីវភាពរស់នៅរបស់ប្រជាពលរដ្ឋក៏មានភាពល្អប្រសើរជាងមុន។

ទន្ទឹមនេះ ក្រសួងរៀបចំដែនដីនឹងប្រែក្លាយគ្រឿងបង្គុំសំណង់ឱ្យទៅជាឧស្សាហកម្មមួយនៅកម្ពុជាដែលមានតម្លៃសមរម្យ និងអាចបង្កើតការងារ និងបង្កើតប្រាក់ចំណូលដល់ប្រជាពលរដ្ឋកម្ពុជា ដូច្នេះឯកឧត្តមឧបនាយករដ្ឋមន្ត្រី សង្ឃឹមថានឹងមានក្រុមហ៊ុនជប៉ុនជាច្រើននឹងចូលរួមផ្ដល់ជាជំនាញការ ចំណេះដឹងក៏ដូចជាហិរញ្ញវត្ថុដែលមានអត្រាការប្រាក់ទាប។

ជាការឆ្លើយតប ឯកឧត្តមអនុរដ្ឋមន្ត្រីក្រសួងដីធ្លីជប៉ុន ISHIBASHI Rintaro បានមានប្រសាសន៍ថា ឆ្នាំ២០២៣ នេះគឺជាខួបនៃចំណងការទូតលើកទី៧០រវាងកម្ពុជានិងជប៉ុន ហើយជប៉ុនសង្ឃឹមថាឆ្នាំនេះគឺជាឆ្នាំដ៏សំខាន់នៃភាពជាដៃគូយុទ្ធសាស្ត្រគ្រប់ជ្រុងជ្រោយដោយរឹតបន្តឹងចំណងមិត្តភាពនេះឱ្យកាន់តែរឹងមាំបន្ថែមទៀត។

នាពេលកន្លងមក ក្រសួងដីធ្លីជប៉ុនក៏ធ្លាប់បានធ្វើកិច្ចសហការជាមួយក្រសួងរៀបចំដែនដីកម្ពុជាក្នុងការរួមចំណែកជួយដល់វិស័យជំនាញជាច្រើន ហើយជប៉ុននឹងបន្តផ្ដល់កិច្ចសហការលើការអនុវត្តនូវគម្រោងនានាបន្ថែមទៀត៕