ឯកឧត្តមឧបនាយករដ្ឋមន្ត្រី សាយ សំអាល់៖ វិស័យអប់រំ ជាវិស័យសំខាន់មួយដែលប្រែក្លាយខេត្តព្រះសីហនុទៅជាខេត្តដែលសម្បូរទៅដោយធនធានមនុស្សប្រកបដោយសក្តានុពល សម្រាប់ចូលរួមអភិវឌ្ឍប្រទេសជាតិ

(ព្រះសីហនុ)៖ ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ចាត់ទុកវិស័យអប់រំជាវិស័យដ៏សំខាន់មួយដែលអាចប្រែក្លាយខេត្តព្រះសីហនុទៅជាខេត្តដែលសម្បូរទៅដោយធនធានមនុស្សប្រកបដោយសក្តានុពលសម្រាប់ចូលរួមអភិវឌ្ឍប្រទេសជាតិ។ ឯកឧត្តមថ្លែងក្នុងឱកាសជួបសំណេះសំណាលជាមួយសិស្សានុសិស្សជាប់និទ្ទេស A ក្នុងការប្រឡងសញ្ញាបត្រមធ្យមសិក្សាទុតិយភូមិប្រចាំឆ្នាំ២០២៣ ដែលធ្វើឡើងនៅខេត្តព្រះសីហនុ នាថ្ងៃទី២២ ខែធ្នូ ឆ្នាំ២០២៣។

ឆ្លៀតក្នុងឱកាសនេះ ឯកឧត្តមផ្ដល់នូវគន្លឹះមួយចំនួនសម្រាប់ត្រិះរិះពិចារណាក្នុងការប្រែក្លាយខេត្តព្រះសីហនុឱ្យទៅជាខេត្តដែលពោរពេញដោយសិស្សានុសិស្សវៃឆ្លាត ប៉ិនប្រសប់ និងមានទេពកោសល្យ ចេះបត់បែនក្នុងសង្គម និងជាខេត្តដែលមានសិស្សបានរៀនចប់ចុងចប់ដើម ដោយរួមមាន៖

១. លោកគ្រូអ្នកគ្រូដែលបង្រៀននៅតាមសាលារៀននានាក្នុងខេត្តព្រះសីហនុ ព្រមទាំងសិស្សានុសិស្ស និងឪពុកម្ដាយ អាណាព្យាបាលសិស្ស ត្រូវបើកចិត្តឱ្យទូលាយក្នុងការទទួលយកនូវគំនិត ឬមតិយោបល់ថ្មីៗជាប្រយោជន៍ក្នុងការអប់រំ។

២. សម្ដេចអគ្គមហាសេនាបតីតេជោ ហ៊ុន សែន និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នឹងបន្ដកសាងសាលារៀនបន្ថែមទៀត ដែលនេះជាយុទ្ធសាស្ត្រសម្រាប់ទាំងអស់គ្នាមិនត្រឹមតែសម្រាប់ខេត្តព្រះសីហនុប៉ុណ្ណោះទេ ដូច្នេះសិស្សានុសិស្ស និងលោកគ្រូអ្នកគ្រូ គប្បីចូលរួមដាំដើមឈើ ដើម្បីបានជាម្លប់បៃតង និងសម្អាតក្នុងបរិវេណសាលារៀនឱ្យបានស្អាត មានអនាម័យ ក៏ដូចជាបរិស្ថានល្អ។

៣. សាលារៀនជាថ្នាលអប់រំដ៏វិសេសវិសាល ដូច្នេះបើសាលារៀនស្អាតនោះនឹងបង្កើតផ្នត់គំនិតដល់ប្រជាពលរដ្ឋខេត្តព្រះសីហនុថាជាប្រជាពលរដ្ឋដែលរស់នៅស្អាត។

៤. ទម្លាប់នៃការហូបចុកឱ្យបានត្រឹមត្រូវ ដែលនាំឱ្យមានសុខភាពល្អ កាយសម្បទាមាំមួន នោះទើបការរៀនសូត្រ និងបង្រៀនអាចសម្រេចបាននូវលទ្ធផលល្អប្រសើរ។

ទន្ទឹមនេះ ឯកឧត្តមកោតសរសើរ និងវាយតម្លៃខ្ពស់ចំពោះថ្នាក់ដឹកនាំ មន្ត្រីរាជការ បុគ្គលិកសិក្សានៃមន្ទីរអប់រំ យុវជន និងកីឡាខេត្តព្រះសីហនុ គណៈគ្រប់គ្រងវិទ្យាល័យ លោកគ្រូ អ្នកគ្រូទាំងគ្រឹះស្ថានសាធារណៈ និងឯកជន ដែលបានខិតខំបង្ហាត់បង្រៀនសិស្សានុសិស្សឱ្យទទួលបានលទ្ធផលយ៉ាងត្រចះត្រចង់ក្នុងការប្រលងសញ្ញាបត្រមធ្យមសិក្សាទុតិយភូមិ សម័យប្រលង ថ្ងៃទី០៦ ខែវិច្ឆិកា ឆ្នាំ២០២៣។

សិស្សឆ្នើមនិទ្ទេស A ចំនួន ៤០នាក់ ក្នុងម្នាក់ៗ ទទួលបានម៉ូតូ Suzuki Nex ចំនួន ១គ្រឿងជារង្វាន់លើកទឹកចិត្ត ខណៈដែលនាយកវិទ្យាល័យដែលមានសិស្សជាប់និទ្ទេស A ចំនួន១នាក់ នឹងទទួលបានថវិកាចំនួន ២លានរៀល ហើយទទួលបានថវិកា ៤លានរៀល បើមានសិស្សជាប់និទ្ទេស A ចំនួន ២នាក់។

គួរបញ្ជាក់ថា បេក្ខជនដែលបានដាក់ពាក្យប្រលងសញ្ញាបត្រមធ្យមសិក្សាទុតិយភូមិឆ្នាំ២០២៣ ក្នុងខេត្តព្រះសីហនុមានចំនួនសរុប១,៩១៥នាក់ និងបានប្រឡងជាប់ជាស្ថាពរចំនួន ១,៥២៣នាក់ ស្មើនឹង ៨០,៥០% ដោយក្នុងនោះមានបេក្ខជនជាប់និទ្ទេស A ចំនួន ៤០នាក់ និទ្ទេស B ចំនួន ១២២នាក់ និទ្ទេស C មានចំនួន ២៨៧នាក់ និទ្ទេស D ចំនួន ៥៤៨នាក់ និងនិទ្ទេស E ចំនួន ៥២៦នាក់។ នេះបើយោងតាមរបាយការណ៍របស់ឯកឧត្តម គួច ចំរើន អភិបាលនៃគណៈអភិបាលខេត្តព្រះសីហនុ៕