គណៈកម្មការសុរិយោដីថ្នាក់ជាតិ អាជ្ញាធរទន្លេសាប អាជ្ញាធរមូលដ្ឋាន និងក្រសួងស្ថាប័នពាក់ព័ន្ធ  បានឯកភាពគ្នាកំណត់យកតំបន់បឹងទន្លេសាបទាំងមូលដើម្បីចុះបញ្ជីដីធ្លីមានលក្ខណៈជាប្រព័ន្ធ

(ភ្នំពេញ)៖ គណៈកម្មការសុរិយោដីថ្នាក់ជាតិ អាជ្ញាធរទន្លេសាប អាជ្ញាធរមូលដ្ឋាន និងក្រសួង ស្ថាប័ន ពាក់ព័ន្ធ  បានឯកភាពគ្នាកំណត់យកតំបន់បឹងទន្លេសាបទាំងមូលដើម្បីចុះបញ្ជីដីធ្លីមានលក្ខណៈជាប្រព័ន្ធ។

ការឯកភាពនេះធ្វើឡើងនាកិច្ចប្រជុំអន្តរក្រសួង ដើម្បីជំរុញការងារចុះបញ្ជីដីធ្លីនៅតំបន់បឹងទន្លេសាប នាព្រឹកថ្ងៃទី៣០ ខែមករា ឆ្នាំ ២០២៤ នៅក្រសួងរៀបចំដែនដី នគរូបនីយកម្ម និងសំណង់។

ឯកឧត្តមឧបនាយករដ្ឋមន្ត្រី សាយ សំអាល់ ថ្លែងថាការជួបជុំគ្នានាពេលនេះ គឺដើម្បីជំរុញការប្រើប្រាស់កម្លាំងសរុបរបស់ក្រសួង ស្ថាប័ន ពាក់ព័ន្ធ កម្លាំងរបស់ខេត្តទាំង ៦ នៅជុំវិញបឹងទន្លេសាប រួមទាំងអាជ្ញាធរ ទន្លេសាប ពន្លឿនការងារចុះបញ្ជីដីធ្លីក្នុងតំបន់បឹងទន្លេសាបឱ្យបានឆាប់រហ័ស ប្រកបដោយប្រសិទ្ធភាព និងស័ក្តិសិទ្ធិភាព ព្រមទាំងរៀបចំធ្វើបច្ចុប្បន្នភាពផែនទី ដើម្បីគ្រប់គ្រង អភិរក្ស និងអភិវឌ្ឍតំបន់បឹងទន្លេសាបប្រកបដោយចីរភាព៕