ក្រសួងរៀបចំដែនដី នគរូបនីយកម្ម និងសំណង់ ជំរុញស្ថាបត្យករកម្ពុជាឱ្យមានភាពជឿជាក់ក្នុងការបង្ហាញគំនិតច្នៃប្រឌិត និងទេពកោសល្យរបស់ខ្លួន ដើម្បីរួមគ្នាកសាងសង្គមកម្ពុជាឱ្យកាន់តែរីកលូតលាស់

(ភ្នំពេញ)៖ ថ្នាក់ដឹកនាំនៃក្រសួងរៀបចំដែនដី នគរូបនីយកម្ម និងសំណង់ បានណែនាំ និងជំរុញដល់ស្ថាបត្យករកម្ពុជាត្រូវមានភាពជឿជាក់ក្នុងការបង្ហាញនូវគំនិតច្នៃប្រឌិត និងទេពកោសល្យរបស់ខ្លួន ដើម្បីរួមគ្នាកសាងសង្គមកម្ពុជាឱ្យកាន់តែរីកលូតលាស់ឈានឆ្ពោះទៅមុខបន្ថែមទៀត។

ឯកឧត្តមឧបនាយករដ្ឋមន្ត្រី សាយ សំអាល់ ថ្លែងក្នុងពិធីចែកពានរង្វាន់ស្នាដៃស្ថាបត្យករកម្ពុជាឆ្នាំ២០២៤ ក្រោមប្រធានបទ “ដង្ហើមទីក្រុង Breath of the City” ធ្វើឡើងនៅទីស្ដីការក្រសួង នារសៀលថ្ងៃទី១៥ ឧសភា ឆ្នាំ២០២៤។

ឯកឧត្តម បានបង្ហាញពីក្តីរំភើប កោតសរសើរ និងអបអរសាទរចំពោះទេពកោសល្យស្នាដៃរបស់ស្ថាបត្យករកម្ពុជាដែលទទួលបានពានរង្វាន់នាពេលនេះ ចំពោះពេលវេលា និងកម្លាំងកាយចិត្តចូលរួមប្រកួតប្រជែងក្នុងកម្មវិធីស្នាដៃស្ថាបត្យករកម្ពុជាឆ្នាំ ២០២៤ និងថ្លែងអំណរគុណដល់គណៈស្ថាបត្យករកម្ពុជាដែលជារឿយៗតែងតែបង្ហាញអំពីគំនិតច្នៃប្រឌិតដ៏គួរឱ្យភ្ញាក់ផ្អើល។

ឯកឧត្តម សាយ សំអាល់ ថ្លែងថាសង្គមកម្ពុជាកំពុងតែត្រេកអរ និងទទួលយកនូវគំនិតច្នៃប្រឌិតថ្មីៗប្លែកៗផ្នែកស្ថាបត្យកម្ម ដើម្បីចូលរួមកសាងកម្ពុជាឱ្យមានការវិវឌ្ឍឈានឡើងទៅមុខ។ យើងចាប់ផ្ដើមដើរលើមាគ៌ារួម ទទួលយកភាពច្នៃប្រឌិតដ៏អស្ចារ្យរបស់សហការីផ្នែកស្ថាបត្យកម្មរបស់យើង ហើយយើងត្រូវជឿជាក់លើសមត្ថភាពរបស់ខ្លួនដោយមិនត្រូវមានការរាថយឡើយ។ ទេពកោសល្យដែលយើងមើលឃើញនាថ្ងៃនេះ គឺជាមោទនភាពរបស់យើង ហើយវានឹងមានការលូតលាស់រីកចម្រើនបន្ថែមទៀតនាពេលខាងមុខ៕