ក្រសួងរៀបចំដែនដី នគរូបនីយកម្ម និងសំណង់ បើកកិច្ចប្រជុំផ្សព្វផ្សាយផែនការសកម្មភាព និងផែនការយុទ្ធសាស្ត្ររបស់ក្រុមការងាររៀបចំផែនការយុទ្ធសាស្ត្រអភិវឌ្ឍន៍តំបន់ប៉ូលសេដ្ឋកិច្ចនៃព្រះរាជាណាចក្រកម្ពុជា

(ភ្នំពេញ)៖ ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ បានជំរុញក្រុមការងាររៀបចំផែនការយុទ្ធសាស្ត្រអភិវឌ្ឍន៍តំបន់ប៉ូលសេដ្ឋកិច្ចនៃព្រះរាជាណាចក្រកម្ពុជាឱ្យគិតគូរពីសក្តានុពលតាមតំបន់ កត្តាភូមិសាស្ត្រ ធនធានធម្មជាតិ និងហេដ្ឋារចនាសម្ព័ន្ធរូបវ័ន្ត ស្របតាមគោលនយោបាយ និងច្បាប់ លិខិតបទដ្ឋានគតិយុត្តជាតិ និងក្របខណ្ឌតំបន់ និងអន្តរជាតិ ដើម្បីអភិវឌ្ឍសេដ្ឋកិច្ចសង្គម មូលធនមនុស្ស ដែលមានសុខដុមនីយកម្មជាមួយបរិស្ថានរស់នៅល្អប្រសើរ។

ឯកឧត្តមឧបនាយករដ្ឋមន្ត្រី សាយ សំអាល់ ថ្លែងនាកិច្ចប្រជុំផ្សព្វផ្សាយផែនការសកម្មភាពនិងផែនការយុទ្ធសាស្ត្ររបស់ក្រុមការងាររៀបចំផែនការយុទ្ធសាស្ត្រអភិវឌ្ឍន៍តំបន់ប៉ូលសេដ្ឋកិច្ចនៃព្រះរាជាណាចក្រកម្ពុជា នាព្រឹកថ្ងៃទី២០ ខែឧសភា ឆ្នាំ២០២៤ នៅទីស្តីការក្រសួង។

ឯកឧត្តមបានបន្ថែមថា កម្ពុជាបានប្រែក្លាយខ្លួនពីប្រទេសក្រីក្រមកជាប្រទេសមានចំណូលមធ្យមកម្រិតទាប មានចក្ខុវិស័យប្រែក្លាយទៅជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។ ដូច្នេះគោលបំណងនៃការរៀបចំផែនការយុទ្ធសាស្ត្រអភិវឌ្ឍន៍តំបន់ប៉ូលសេដ្ឋកិច្ចនេះ គឺដើម្បីកំណត់ទិសដៅប្រើប្រាស់ដីធ្លីនៅកម្ពុជាឱ្យកាន់តែមានប្រសិទ្ធភាព ចីរភាព និងបរិយាបន្ន អនុលោមតាមគោលនយោបាយយុទ្ធសាស្ត្រ និងឯកសារគតិយុត្តនានា ក្នុងគោលដៅជំរុញកំណើនសេដ្ឋកិច្ចជាតិ លើកស្ទួយជីវភាពប្រជាពលរដ្ឋ និងរួមចំណែកសម្រេចចក្ខុវិស័យកម្ពុជាឆ្នាំ២០៥០ ជាប្រទេសមានប្រាក់ចំណូលខ្ពស់។

សម្រាប់នីតិកាលទី៧ នៃរដ្ឋសភា រាជរដ្ឋាភិបាលបានដាក់ចេញនូវយុទ្ធសាស្ត្របញ្ចកោណ ដំណាក់កាលទី១ ដើម្បី កំណើន ការងារ សមធម៌ ប្រសិទ្ធភាព និងចីរភាព សំដៅកសាងមូលដ្ឋានគ្រឹះទៅសម្រេចបាននូវចក្ខុវិស័យកម្ពុជាឆ្នាំ២០៥០ ដោយកំណត់យកអាទិភាពគន្លឹះចំនួន ៥ រួមមាន «មនុស្ស ផ្លូវ ទឹក ភ្លើង និងបច្ចេកវិទ្យា»។

ដើម្បីរួមចំណែកសម្រេចចក្ខុវិស័យ និងកម្មវិធីនយោបាយដូចបានរៀបរាប់ខាងលើ ក្រសួងរៀបចំដែនដី នគរូបនីយកម្ម និងសំណង់ បានគិតគូររៀបចំផែនការយុទ្ធសាស្ត្រអភិវឌ្ឍន៍តំបន់ប៉ូលសេដ្ឋកិច្ចនៃព្រះរាជាណាចក្រកម្ពុជា ដើម្បីសិក្សាកំណត់ប៉ូលសេដ្ឋកិច្ច រៀបចំអភិវឌ្ឍរបៀងសេដ្ឋកិច្ច (Economic Corridors) ចម្បងៗនៅកម្ពុជា ដើម្បីគាំទ្រ និងតម្រង់ទិសការអភិវឌ្ឍសង្គមសេដ្ឋកិច្ច ការគ្រប់គ្រងបរិស្ថាននិងធនធានធម្មជាតិ ការធានាបាននូវសន្តិសុខស្បៀង ការលើកស្ទួយវប្បធម៌ និងអត្តសញ្ញាណជាតិ សំដៅធានាបានចីរភាព តុល្យភាព និងធ្វើឱ្យប្រសើរឡើងនូវភាពប្រកួតប្រជែងផ្នែកសេដ្ឋកិច្ច៕