ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ណែនាំដល់ក្រុមការងារឱ្យពិនិត្យឱ្យបានច្បាស់លាស់លើសំណើសុំដីសម្បទានសង្គមកិច្ចសំរាប់សាងសង់លំនៅឋាន និងធ្វើកសិកម្មលក្ខណៈគ្រួសារនៅខេត្តស្ទឹងត្រែង និងខេត្តកំពត
(ភ្នំពេញ)៖ នារសៀលថ្ងៃទី១២ ខែមិថុនា ឆ្នាំ២០២៤ នៅទីស្ដីការក្រសួង ឯកឧត្តមឧបនាយករដ្ឋមន្ត្រីសាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានដឹកនាំកិច្ចប្រជុំករណីសំណើសុំដីសម្បទានសង្គមកិច្ចសម្រាប់សាងសង់លំនៅឋាន និងធ្វើកសិកម្មលក្ខណៈគ្រួសាររបស់តំណាងប្រជាពលរដ្ឋក្នុងភូមិសាស្ត្រខេត្តស្ទឹងត្រែង និងខេត្តកំពត និងកិច្ចប្រជុំករណីគម្រោង LASED III ។
ចំពោះការងារដីសម្បទានសង្គមកិច្ច ឯកឧត្តមបានមានប្រសាសន៍ក្នុងកិច្ចប្រជុំថា រាជរដ្ឋាភិបាលកម្ពុជាបានរៀបចំផ្តល់ដីសម្បទានសង្គមកិច្ចក្នុងគោលដៅជួយដល់ប្រជាពលរដ្ឋ កាត់បន្ថយភាពក្រីក្រ ដូច្នេះឯកឧត្តមបានណែនាំដល់ក្រុមការងារឱ្យពិនិត្យឱ្យបានច្បាស់លាស់លើសំណើរសុំដីសម្បទានសង្គមកិច្ចសម្រាប់សាងសង់លំនៅឋាន និងធ្វើកសិកម្មលក្ខណៈគ្រួសារនៅខេត្តស្ទឹងត្រែង និងខេត្តកំពត ដើម្បីបញ្ជៀសនូវបញ្ហាដែលជនទុច្ចរិតមួយចំនួនឆ្លៀតឱកាសស្នើសុំដីសម្បទានសង្គមកិច្ចនេះដែរ និងត្រូវបង្ហាញប្រាប់ប្រជាពលរដ្ឋអំពីបញ្ហានេះ ត្រូវពិនិត្យមើលតំបន់ដែលមានសក្តានុពលសម្រាប់រៀបចំដីសម្បទានសង្គមកិច្ច ហើយត្រូវរៀបចំដីសម្បទានសង្គមកិច្ចឱ្យនៅកៀកនឹងទីប្រជុំជនដោយប្រមូលផ្ដុំមនុស្សឱ្យទៅរស់នៅតាមទីប្រជុំជនដើម្បីជំរុញកំណើនសេដ្ឋកិច្ច។
ជាមួយនេះ ឯកឧត្តម បានបញ្ជាក់ថា មន្ត្រីរាជការត្រូវស្គាល់ពីខ្លួនឯង ស្គាល់ពីតំបន់ និងពិភពលោក ហើយចេះតាក់តែងនូវគោលនយោបាយសាធារណៈ មានន័យថាចេះធ្វើនយោបាយឱ្យត្រូវចិត្ត ឬបំណងប្រាថ្នារបស់ប្រជាពលរដ្ឋ និងស្របតាមស្ថានភាពជាក់ស្ដែង គ្រប់គ្រងរដ្ឋបាលសាធារណៈបែបទំនើបនិងហិរញ្ញវត្ថុសាធារណៈ ប្រើប្រាស់ថវិកាតាមកម្មវិធី ឬថវិកាសម្រាប់បម្រើឱ្យការងារស្នូលរបស់ក្រសួង។
នាឱកាសនោះ ឯកឧត្តម បានលើកឡើងថា សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា មានគោលដៅក្នុងការរៀបចំប្រទេសជាតិឱ្យបានល្អប្រសើរ ដើម្បីឱ្យប្រជាពលរដ្ឋងាយស្រួលរស់នៅ និងរស់នៅប្រកបដោយមោទនភាព ហើយមន្ត្រីរាជការគឺជាស្នូលដ៏សំខាន់ក្នុងការចូលរួមជំរុញកិច្ចការនេះ៕
![](https://asset.cambodia.gov.kh/mlmupc/wp-content/uploads/2024/06/photo_2024-06-13_09-58-51-1024x682.jpg)
![](https://asset.cambodia.gov.kh/mlmupc/wp-content/uploads/2024/06/photo_2024-06-13_09-58-12-1024x682.jpg)
![](https://asset.cambodia.gov.kh/mlmupc/wp-content/uploads/2024/06/photo_2024-06-13_09-58-20-1024x682.jpg)
![](https://asset.cambodia.gov.kh/mlmupc/wp-content/uploads/2024/06/photo_2024-06-13_09-58-35-1024x682.jpg)
![](https://asset.cambodia.gov.kh/mlmupc/wp-content/uploads/2024/06/photo_2024-06-13_10-00-43-1024x682.jpg)
![](https://asset.cambodia.gov.kh/mlmupc/wp-content/uploads/2024/06/photo_2024-06-13_10-00-50-1024x682.jpg)