ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ ចាត់ទុកធនាគារ មីក្រូហិរញ្ញវត្ថុនិងភ្នាក់ងារហិរញ្ញវត្ថុទាំងអស់ជាដៃគូយុទ្ធសាស្ត្រដ៏សំខាន់មួយក្នុងការទ្រទ្រង់ខឿនសេដ្ឋកិច្ចកម្ពុជា

(ភ្នំពេញ)៖ ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ បានចាត់ទុកធនាគារ មីក្រូហិរញ្ញវត្ថុ និងភ្នាក់ងារហិរញ្ញវត្ថុទាំងអស់ ជាដៃគូយុទ្ធសាស្រ្តដ៏សំខាន់មួយក្នុងការទ្រទ្រង់ឧស្សាហកម្មហិរញ្ញវត្ថុ ឧស្សាហកម្មអចលនទ្រព្យ និងឧស្សាហកម្មគ្រឿងបង្គុំសំណង់ ដែលបានរួមចំណែកយ៉ាងសំខាន់ក្នុងការកសាង និងទ្រទ្រង់ខឿនសេដ្ឋកិច្ចកម្ពុជា។

ថ្លែងក្នុងកិច្ចប្រជុំជាមួយសមាគមធនាគារកម្ពុជា និងសមាគមមីក្រូហិរញ្ញវត្ថុកម្ពុជា នារសៀលថ្ងៃទី២១ ខែមិថុនា ឆ្នាំ២០២៤  នៅទីស្ដីការក្រសួង ឯកឧត្តមឧបនាយករដ្ឋមន្ត្រី សាយ សំអាល់ បានលើកឡើងថា ក្រសួងត្រូវការការគាំទ្រ និងកិច្ចសហការពីធនាគារ មីក្រូហិរញ្ញវត្ថុ និងភ្នាក់ងារហិរញ្ញវត្ថុទាំងអស់ដើម្បីឱ្យវិស័យឧស្សាហកម្មអចលនទ្រព្យ និងឧស្សាហកម្មគ្រឿងបង្គុំសំណង់មានការរីកចម្រើនបន្ថែមទៀតស្របតាមការវិវត្តន៍របស់សង្គមជាតិ។ ក្នុងន័យនេះ ឯកឧត្តមបានស្នើដល់សមាគមធនាគារកម្ពុជា និងសមាគមមីក្រូហិរញ្ញវត្ថុកម្ពុជា កំណត់នូវទិសដៅរួមជាក់លាក់មួយ ដើម្បីក្រសួងងាយស្រួលក្នុងការឆ្លើយតប និងធ្វើកិច្ចសហប្រតិបត្តិការពាក់ព័ន្ធនឹងវិស័យជំនាញរបស់ក្រសួង សំដៅជួយជំរុញកំណើនសេដ្ឋកិច្ចជាតិរួមគ្នា។

ឯកឧត្តមបានរំលេចថាចក្ខុវិស័យរបស់រាជរដ្ឋាភិបាលកម្ពុជា នីតិកាលទី៧ គឺធ្វើយ៉ាងណាឱ្យប្រជាពលរដ្ឋមានជីវភាពធូរធារ មានការងារធ្វើ មានប្រាក់ចំណូល មានលំនៅឋានរស់នៅសមរម្យក្នុងភូមិឋានក្សេមក្សាន្ត សុខសុវត្ថិភាព មានអាហារហូបចុកគ្រប់គ្រាន់ ទទួលបានការសិក្សាអប់រំគ្រប់ៗគ្នា រស់នៅមានសេចក្តីសុខសុភមង្គលក្នុងក្រុមគ្រួសារ និងក្នុងសង្គមជាតិ និងរស់នៅប្រកបដោយមោទនភាពនៅលើទឹកដីរបស់ខ្លួន៕