រាជរដ្ឋាភិបាលកម្ពុជានឹងនៅរួមសុខរួមទុក្ខជាមួយប្រជាពលរដ្ឋទាំងអស់ ដើម្បីឱ្យប្រជាពលរដ្ឋមានភាពកក់ក្តៅ មានទំនុកចិត្ត និងទទួលបានដំណោះស្រាយសមស្របចំពោះបញ្ហាអសកម្មក្នុងគម្រោងអភិវឌ្ឍន៍ផ្សារ TCC
(ភ្នំពេញ)៖ ថ្នាក់ដឹកនាំនៃក្រសួងរៀបចំដែនដី នគរូបនីយកម្ម និងសំណង់ បានបញ្ជាក់ថា ក្រសួង ក៏ដូចជារាជរដ្ឋាភិបាលកម្ពុជា នឹងនៅរួមសុខរួមទុក្ខជាមួយប្រជាពលរដ្ឋទាំងអស់ ដើម្បីឱ្យប្រជាពលរដ្ឋមានភាពកក់ក្តៅ មានទំនុកចិត្ត និងទទួលបានដំណោះស្រាយសមស្របចំពោះបញ្ហាអសកម្មក្នុងគម្រោងអភិវឌ្ឍន៍ផ្សារ TCC។
ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ថ្លែងក្នុងកិច្ចប្រជុំណែនាំ និងសំណេះសំណាលជាមួយអាជីវករផ្សារ TCC នារសៀលថ្ងៃទី២៥ ខែមិថុនា ឆ្នាំ២០២៤ នៅទីស្ដីការក្រសួង។
ឯកឧត្តមឧបនាយករដ្ឋមន្ត្រី បានស្នើឱ្យតំណាងអាជីវករកត់ត្រានូវរាល់បញ្ហា និងសំណូមពរដែលអាជីវករបានលើកឡើងដាក់ចូលក្នុងបញ្ជីនូវឈ្មោះអាជីវករ ប្រភេទតូប ដែលអាជីវករបានទិញ និងការបង់ប្រាក់ ព្រមទាំងសំណូមពរដែលពួកគាត់ចង់បាន។ ឯកឧត្តម បញ្ជាក់ថាក្រសួងរៀបចំដែនដី នគរូបនីយកម្ម និងសំណង់ នឹងធ្វើកិច្ចសហការជាមួយសាលារាជធានីភ្នំពេញ និងអ្នកពាក់ព័ន្ធ ដើម្បីតាមដាននិងដោះស្រាយការងារនេះជាមួយគ្នា ហើយនឹងស្នើឱ្យប្រធានក្រុមហ៊ុនចិនដែលជាម្ចាស់សំណង់ផ្សារ TCC នោះ មកជួបប្រជុំដោះស្រាយ និងសួរនាំអំពីបញ្ហានេះ។
នាឱកាសនោះ ឯកឧត្តមឧបនាយករដ្ឋមន្ត្រី បានបន្ថែមថា ឯកឧត្តមនឹងពិគ្រោះយោបល់ជាមួយក្រសួងសេដ្ឋកិច្ច និងហិរញ្ញវត្ថុ កំពង់ផែស្វយ័តភ្នំពេញ សាលារាជធានីភ្នំពេញ និងអាជីវករ ដើម្បីស្វែងរកដំណោះស្រាយ ព្រោះអ្វីដែលរាជរដ្ឋាភិបាលចង់បាននោះ គឺចង់ឱ្យប្រជាពលរដ្ឋមានជីវភាពរស់នៅធូរធារប្រសើរឡើង មិនចង់ឃើញប្រជាពលរដ្ឋរងគ្រោះពីអំពើបោកប្រាស់ទំនុកចិត្តណាមួយឡើយ ដូច្នេះដំណោះស្រាយលើបញ្ហានេះមិនត្រឹមតែធ្វើយ៉ាងណាឱ្យដំណើរការសាងសង់ផ្សារ TCC បញ្ចប់រួចរាល់ឆាប់រហ័សនោះទេ តែក៏ត្រូវគិតគូរថាក្រោយពេលសាងសង់រួច តើផ្សារនេះអាចទាក់ទាញឱ្យការធ្វើអាជីវកម្មលក់ដូរទំនិញផ្សេងៗមានភាពល្អប្រសើរឬយ៉ាងណា។
ចក្ខុវិស័យរបស់រាជរដ្ឋាភិបាលកម្ពុជានីតិកាលទី៧ គឺធ្វើយ៉ាងណាឱ្យប្រជាពលរដ្ឋមានជីវភាពធូរធារ មានការងារធ្វើ មានប្រាក់ចំណូល មានលំនៅឋានរស់នៅសមរម្យក្នុងភូមិឋានក្សេមក្សាន្ត សុខសុវត្ថិភាព មានអាហារហូបចុកគ្រប់គ្រាន់ ទទួលបានការសិក្សាអប់រំគ្រប់ៗគ្នា រស់នៅមានសេចក្តីសុខសុភមង្គលក្នុងក្រុមគ្រួសារ និងក្នុងសង្គមជាតិ និងរស់នៅប្រកបដោយមោទនភាពនៅលើទឹកដីរបស់ខ្លួន។
គួរបញ្ជាក់ផងដែរថា ផ្សារ TCC ជាអគារសហកម្មសិទ្ធិ ស្ថិតនៅលើផ្ទៃដីទំហំ ៩៣ ៩៤៩ម៉ែត្រក្រឡា ក្នុងភូមិបឹងសាឡាងសង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ ដោយមានអគារធំចំនួនមួយអគារ ភ្ជាប់ចេញពីអគារ A B C D មានតូបសរុបប្រមាណ ៥២៦៤ តូប និង ២៥២ហាងទំនិញ ជាគម្រោងអភិវឌ្ឍន៍របស់ក្រុមហ៊ុនចិន។ ក្នុងកិច្ចសន្យាបានបញ្ជាក់ថា គម្រោងនេះនឹងសាងសង់រួចរាល់ ហើយប្រគល់តូបជូនអាជីវករនាថ្ងៃទី៣១ ខែធ្នូ ឆ្នាំ២០១៩ ប៉ុន្តែត្រូវបានខកខាន និងពន្យារពេលរហូតមកទល់បច្ចុប្បន្ន៕
