ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ ជំរុញឱ្យអន្តរក្រសួងពាក់ព័ន្ធ និងរដ្ឋបាលខេត្តកំពង់ឆ្នាំងត្រូវរួមគ្នាគិត រួមគ្នាសម្រេចចិត្តនិងរួមគ្នាទទួលខុសត្រូវចំពោះការថែរក្សាបឹងទន្លេសាបដែលជាធនធានធម្មជាតិដ៏មានតម្លៃឱ្យបានគង់វង្សសម្រាប់មនុស្សជំនាន់ក្រោយ

(ភ្នំពេញ)៖ ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថាដោយអនុវត្តតាមគោលនយោបាយរបស់រាជរដ្ឋាភិបាលកម្ពុជា ក្រសួងបានអនុវត្តផែនការចុះបញ្ជីដីនៅតំបន់បឹងទន្លេសាប រួមនឹងខេត្តកំពង់ឆ្នាំងទាំងមូល និងត្រៀមអនុវត្តតាមសំណូមពរមួយចំនួនរបស់រដ្ឋបាលខេត្ត ស្រុកផងដែរ។ កិច្ចការបឹងទន្លេសាបគឺជាកិច្ចការមួយដែលយើងទាំងអស់គ្នាត្រូវហ៊ានសម្រេចចិត្តក្នុងការកំណត់គោលការណ៍នៃការដឹកនាំគ្រប់គ្រងបឹងទន្លេសាបនេះឱ្យបានជាក់លាក់ដោយមិនអាចបណ្ដែតបណ្ដោយបាននោះទេជៀសវាងប្រឈមនឹងការបាត់បង់។

ថ្លែងក្នុងកិច្ចប្រជុំអន្តរក្រសួងស្ដីពីការពិភាក្សាការងារគ្រប់គ្រងដីនៅតំបន់បឹងទន្លេសាបនៃខេត្តកំពង់ឆ្នាំង នារសៀលថ្ងៃទី១០ ខែកុម្ភៈ ឆ្នាំ២០២៥។

ឯកឧត្តមឧបនាយករដ្ឋមន្ត្រី សាយ សំអាល់ បានស្នើឱ្យពិនិត្យពិច្ច័យឱ្យបានច្បាស់លាស់នៅតំបន់ខ្លះក្នុងតំបន់បឹងទន្លេសាបដើម្បីឈានទៅកំណត់ឡើងវិញនិងមិនត្រូវអោយមានការកាត់ឆ្វៀលដីធ្វើជាកម្មសិទ្ធរបស់ខ្លួនទៀតទេ។

ឯកឧត្តមឧបនាយករដ្ឋមន្ត្រី បានបញ្ជាក់ថាយើងទាំងអស់គ្នាត្រូវរួមគ្នាគិត រួមគ្នាសម្រេចចិត្តនិងរួមគ្នាទទួលខុសត្រូវចំពោះមនុស្សជំនាន់ក្រោយក្នុងការថែរក្សាបឹងទន្លេសាបដែលជាធនធានធម្មជាតិដ៏មានតម្លៃនេះឱ្យបានស្ថិតស្ថេរគង់វង្ស ពីព្រោះបឹងទន្លេសាបមានផលប្រយោជន៍យ៉ាងមហាសាលសម្រាប់ប្រទេសជាតិដែលអាចជួយទ្រទ្រង់សេដ្ឋកិច្ច សង្គមនិងវប្បធម៌របស់ប្រជាជនខ្មែរគ្រប់រូប៕