ក្រសួងរៀបចំដែនដី នគរូបនីយកម្មនិងសំណង់ បានប្រគល់ទំនួលខុសត្រូវថ្មីជូនថ្នាក់ដឹកនាំក្រសួង ដើម្បីលើកកម្ពស់ប្រសិទ្ធិភាពការងារ និងពង្រឹងខឿនសេដ្ឋកិច្ចជាតិឱ្យកាន់តែរឹងមាំ

(ភ្នំពេញ)៖ ថ្លែងក្នុងកិច្ចប្រជុំជីវភាពការងារថ្នាក់ដឹកនាំរបស់ក្រសួងរៀបចំដែនដី នគរូបនីយកម្មនិងសំណង់ ដែលបានធ្វើឡើងនៅទីស្ដីការក្រសួង នារសៀលថ្ងៃទី១៩ ខែមីនា ឆ្នាំ២០២៥ ឯកឧត្តមឧបនាយករដ្ឋមន្ត្រី សាយ សំអាល់ បានបញ្ជាក់ថា ថ្នាក់ដឹកនាំនិងមន្ត្រីរាជការក្រោមឱវាទក្រសួងបានឆ្លងផុតនូវសមរភូមិទី១ របស់ខ្លួន នោះគឺ ការរៀបចំផ្ទះសម្បែងឱ្យបានរៀបរយដោយធានាឱ្យបាននូវការបន្តនិរន្តរភាពការងារ និងដំណើរការរបស់ស្ថាប័ន រក្សាស្មារតី និងសតិអារម្មណ៍ឱ្យបាននឹងនរ រក្សាសាមគ្គីភាពឯកភាពផ្ទៃក្នុង កសាងជំនឿ និងទំនុកចិត្តលើការដឹកនាំជារួមរបស់ក្រសួង ដែលសមរភូមិទី១នេះ យើងសម្រេចបាននូវលទ្ធផលល្អនិងអាចទទួលយកបាន។

ចំពោះការបង្កើតនូវបរិយាកាសគ្មានវិវាទសម្រាប់សង្គមជាតិ ឯកឧត្តម ចាត់ទុកថានេះគឺជាកិច្ចការយុទ្ធសាស្ត្រហើយក៏ជាកិច្ចការចាំបាច់ដែលយើងត្រូវធ្វើមុនពេលដែលយើងឈានទៅអនុវត្តកិច្ចការងារផ្សេងទៀត ដែលក្នុងនោះមានការចុះបញ្ជីដីបង្ហើយ ហើយប្រែក្លាយអ្វីដែលយើងមាននៅក្នុងដៃឱ្យក្លាយជាខឿនសេដ្ឋកិច្ចរឹងមាំនាពេលខាងមុខ។

នាឱកាសនោះ ឯកឧត្តម ក៏បានជំរុញឱ្យថ្នាក់ដឹកនាំក្រសួងផ្លាស់ប្ដូរផ្នត់គំនិតគិតគូរដល់អនាគតប្រទេសជាតិ និងរួមគ្នារិះរកវិធីសាស្រ្តធ្វើយ៉ាងណាកសាងជីវភាពប្រជាជនឱ្យកាន់តែប្រសើរឡើង និងអភិវឌ្ឍជាតិឱ្យកាន់តែរីកចម្រើន។

ជាមួយនេះ ឯកឧត្តមឧបនាយករដ្ឋមន្ត្រី បានកំណត់ និងប្រគល់ទំនួលខុសត្រូវថ្មីចំពោះថ្នាក់ដឹកនាំក្រសួង លើវិស័យរដ្ឋបាលនិងហិរញ្ញវត្ថុ, លើកិច្ចការរៀបចំដែនដី និងនគរូបនីយកម្ម, លើកិច្ចការសំណង់, លើកិច្ចការលំនៅឋាន, លើកិច្ចការយុវជនក្រសួង ដើម្បីអនុវត្តការចងសម្ព័ន្ធមេត្រីភាពជាមួយក្រសួង គ្រឹះស្ថាន អង្គភាពរដ្ឋ ដៃគូអភិវឌ្ឍន៍ និងវិស័យឯកជន និងលើគម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ច ដំណាក់កាលទី៣ (LASED III) ព្រមទាំងបន្តបង្រួមបញ្ហាលើការរៀបចំ និងប្រព្រឹត្តទៅរបស់ក្រសួងរៀបចំដែនដី នគរូបនីយកម្ម និងសំណង់ផងដែរ។