ក្រសួងរៀបចំដែនដី នគរូបនីយកម្ម និងសំណង់ បើកកិច្ចប្រជុំពិភាក្សាស្ដីពីការកំណត់បែបបទ និងបរិបថនៃការផ្ដល់លិខិតអនុញ្ញាតសាងសង់ដោយរដ្ឋមន្ត្រី

(ភ្នំពេញ)៖ ក្នុងកិច្ចប្រជុំពិភាក្សាស្ដីពីការកំណត់បែបបទ និងបរិបថនៃការផ្ដល់លិខិតអនុញ្ញាតសាងសង់ដោយរដ្ឋមន្ត្រីក្រសួងរៀបចំដែនដីនគរូបនីយកម្មនិងសំណង់ ដែលបានធ្វើឡើងនៅទីស្ដីការក្រសួង នារសៀលថ្ងៃទី២៨ ខែឧសភា ឆ្នាំ២០២៥ ឯកឧត្តមឧបនាយករដ្ឋមន្ត្រី សាយ សំអាល់ បានឱ្យដឹងថាកិច្ចប្រជុំនាពេលនេះធ្វើឡើងក្នុងគោលបំណងដើម្បីប្រមូលធាតុចូលសំរាប់ជាជំនួយខ្លឹមសារនៃសេចក្តីព្រាងស្ដីពីបែបបទ និងបរិបថនៃការផ្ដល់លិខិតអនុញ្ញាតសាងសង់ដោយរដ្ឋមន្ត្រី អោយមានសង្គតិភាពគ្រប់ជ្រុងជ្រោយប្រកបដោយស្មារតីទទួលខុសត្រូវ សាមគ្គីភាព និងឯកភាពផ្ទៃក្នុងក្រសួង។

ឯកឧត្តម បានបញ្ជាក់ថា ការកំណត់បែបបទ និងបរិបថនៃការផ្ដល់លិខិតអនុញ្ញាតសាងសង់នេះអាចធ្វើទៅបានលុះត្រាតែយើងត្រូវមានការឯកភាពផ្ទៃក្នុងគ្នាជាមុនសិន ទើបយើងអាចបន្តទៅពិគ្រោះពិភាក្សាជាមួយសមាគមអ្នកអភិវឌ្ឍន៍លំនៅឋាន និងសមាគមអ្នកសាងសង់បាន។

ទន្ទឹមនេះ ឯកឧត្តម មានបំណងចង់ឱ្យសមាជិកទាំងអស់នៃកិច្ចប្រជុំនាពេលនេះ ក្លាយជាសមាជិកចូលរួមសកម្មក្នុងកិច្ចការកំណត់បែបបទ និងបរិបថនៃការផ្ដល់លិខិតអនុញ្ញាតសាងសង់នេះ។

នាឱកាសនោះ ឯកឧត្តមឧបនាយករដ្ឋមន្ត្រីក៏បានជំរុញឱ្យគ្រប់ស្ថាប័នទាំងអស់ចូលរួម ដើម្បីស្តាប់អំពីបញ្ហាប្រឈម និងបង្កើតគំនិតថ្មីៗក្នុងការរៀបចំបែបបទ និងបទបញ្ញត្តិនានាសំរាប់ការផ្ដល់លិខិតអនុញ្ញាតសាងសង់ឱ្យបានត្រឹមត្រូវ មានលក្ខណៈល្អប្រសើរនិងគ្រប់ជ្រុងជ្រោយបន្ថែមទៀត។

គួរបញ្ជាក់ផងដែរថា តាមរយៈបរិបថថ្មី រាល់លិខិតស្នើសុំសាងសង់ទាំងចូលមកតាមអនឡាញ ឬចូលមកដោយផ្ទាល់ ឬតាមច្រកចេញចូលតែមួយក្តី អគ្គនាយកដ្ឋានរដ្ឋបាល និងហិរញ្ញវត្ថុ ត្រូវមានភារកិច្ចធ្វើចរន្តការឯកសារដោយពិនិត្យផ្ទៀងផ្ទាត់លើឯកសារទាំងនោះ និងបញ្ជូនទៅខាងអគ្គនាយកដ្ឋានសុរិយោដីនិងភូមិសាស្ត្រ អគ្គនាយកដ្ឋានរៀបចំដែនដី និងអគ្គនាយកដ្ឋានលំនៅដ្ឋាន ដើម្បីពិនិត្យបន្ត។ បន្ទាប់មកត្រូវបញ្ជូនសំណុំឯកសារទាំងនោះទៅការិយាល័យច្រកចេញចូលតែមួយ ហើយការិយាល័យនឹងបញ្ជូនសំណុំឯកសារទាំងនោះមកអគ្គនាយកដ្ឋានសំណង់ ដើម្បីបូកសរុបបច្ចេកទេស និងព្រាងលិខិតអនុញ្ញាតសាងសង់ រួចត្រូវបញ្ជូនសំណុំឯកសារទាំងនោះទៅការិយាល័យច្រកចេញចូលតែមួយវិញ ដើម្បីស្នើសុំគោលការណ៍ពីឯកឧត្តមឧបនាយករដ្ឋមន្ត្រី និងក្រុមការងារជំនាញ ហើយការិយាល័យច្រកចេញចូលតែមួយត្រូវបើកកិច្ចប្រជុំ ធ្វើរបាយការណ៍និងស្នើសុំការពិនិត្យសម្រេចពីឯកឧត្តមឧបនាយករដ្ឋមន្ត្រី។