គម្រោងកសាងហេដ្ឋារចនាសម្ព័ន្ធគាំទ្រសេវាទេសចរណ៍និងនេសាទលើជីវភាពរស់នៅរបស់សហគមន៍ត្រពាំងសង្កែ ស្រុកទឹកឈូបានដំណើរការដោយជោគជ័យ និងត្រូវបានក្លាយជាគំរូមួយសម្រាប់រៀបចំគម្រោងអភិវឌ្ឍន៍សហគមន៍ជាច្រើនទៀតក្នុងខេត្តកំពត

(កំពត)៖ ក្រសួងរៀបចំដែនដី នគរូបនីយកម្ម និងសំណង់ បានប្រែក្លាយគម្រោងបែងចែកដីសម្បទានសង្គមកិច្ច(LASED) មកជាគម្រោងសម្បទានដើម្បីសង្គមនិងសេដ្ឋកិច្ច ក្នុងនោះក្រសួងបានផ្តួចផ្តើម និងជ្រើសយកសហគមន៍ត្រពាំងសង្កែជាសហគមន៍គំរូក្នុងការរៀបចំក្រុង ដោយធ្វើការរៀបចំកសាងហេដ្ឋារចនាសម្ព័ន្ធគាំទ្រដល់សេវាទេសចរណ៍ និងនេសាទ ឱ្យមានផាសុកភាព សោភណភាព និងស្របតាមយុទ្ធសាស្ត្ររបស់គណកម្មាធិការជាតិគ្រប់គ្រងនិងអភិវឌ្ឍន៍តំបន់ឆ្នេរសមុទ្រកម្ពុជា មុននឹងឈានទៅរៀបចំសហគមន៍ទាំងអស់នៅតំបន់ឆ្នេរ និងសហគមន៍ដទៃទៀតនៅកម្ពុជា ដើម្បីលើកស្ទួយជីវភាពរស់នៅរបស់ប្រជាពលរដ្ឋឱ្យកាន់តែប្រសើរឡើង។ ជាលទ្ធផលក្រោយការចាប់ផ្តើមរៀបចំនេះ សហគមន៍ត្រពាំងសង្កែបានប្រែមុខមាត់ និងទាក់ទាញភ្ញៀវទេសចរមកកំសាន្តប្រមាណមួយពាន់នាក់ក្នុងមួយសប្តាហ៍ ដែលបានជួយលើកស្ទួយជីវភាពពលរដ្ឋ និងសហគមន៍បានប្រសើរឡើងមួយកម្រិតធំ។

ក្នុងកិច្ចប្រជុំអន្តរក្រសួងពិភាក្សាស្ដីពីលទ្ធផលនៃការកសាងហេដ្ឋារចនាសម្ព័ន្ធគាំទ្រសេវាទេសចរណ៍និងនេសាទលើជីវភាពរស់នៅរបស់សហគមន៍ត្រពាំងសង្កែ ស្រុកទឹកឈូ ខេត្តកំពត ដោយមានការចូលរួមពីឯកឧត្តម ហួត ហាក់ រដ្ឋមន្ត្រីក្រសួងទេសចរណ៍, ឯកឧត្តម ឆាយ ឬទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ, លោក ស៊ឹម ហ៊ីម ប្រធានសហគមន៍នេសាទត្រពាំងសង្កែ និងមន្ត្រីជំនាញព្រមទាំងអាជ្ញាធរខេត្តកំពត កែបនិងខេត្តព្រះសីហនុ រួមនិងប្រជាពលរដ្ឋសហគមន៍ត្រពាំងសង្កែ នាព្រឹកថ្ងៃទី១៣ ខែកក្កដាឆ្នាំ២០២៥។ ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានបញ្ជាក់ថា ផ្តើមចេញពីគម្រោងដំបូងតូចមួយនៅទីនេះ យើងបានកសាងហេដ្ឋារចនាសម្ព័ន្ធគាំទ្រសេវាទេសចរណ៍និងនេសាទសម្រាប់សហគមន៍ត្រពាំងសង្កែ ស្រុកទឹកឈូ ក្នុងនោះបានកសាងផ្លូវបេតុង, ចំណតរថយន្ត និងបន្ទប់ទឹក ដោយបច្ចុប្បន្នយើងឃើញថាគម្រោងនេះបានដំណើរការយ៉ាងល្អនិងអាចក្លាយជាគំរូមួយសម្រាប់សហគមន៍ដទៃទៀត។

ដោយទទួលបានជោគជ័យលើគម្រោងសម្រាប់សហគមន៍នេសាទត្រពាំងសង្កែនេះហើយនោះ ឯកឧត្តមឧបនាយករដ្ឋមន្ត្រី ក៏បានបន្តស្នើសុំកិច្ចសហការពីក្រសួងអភិវឌ្ឍន៍ជនបទ ក្រសួងទេសចរណ៍និងអភិបាលខេត្តកំពត ដើម្បីរៀបចំគម្រោងកសាងហេដ្ឋារចនាសម្ព័ន្ធគាំទ្រសម្រាប់សហគមន៍ដទៃជាច្រើនទៀតក្នុងខេត្តនេះផងដែរ។ ផ្ដើមចេញពីនេះឯកឧត្តមឧបនាយករដ្ឋមន្ត្រី សាយ សំអាល់ មានបំណងចង់ស្នើសុំក្រសួងសេដ្ឋកិច្ច និងហិរញ្ញវត្ថុដើម្បីកែប្រែគម្រោងLASED ដោយកាលពីមុនគម្រោងនេះសំដៅត្រឹមតែចែកដីដល់ប្រជាពលរដ្ឋខ្មែរដែលមិនមានដីប៉ុណ្ណោះ ប៉ុន្តែពេលនេះឯកឧត្តមស្នើសុំឱ្យមានការកែប្រែមួយផ្នែកនៃគម្រោងLASEDនេះ មកវិនិយោគលើហេដ្ឋារចនាសម្ព័ន្ធដូចជាផ្លូវ, ចំណតរថយន្ត, បន្ទប់ទឹកនៅតាមបណ្ដាសហគមន៍ និងទីស្នាក់ការសហគមន៍ មានន័យថា យើងមិនមែនផ្ដោតត្រឹមតែការចែកដីប៉ុណ្ណោះទេប៉ុន្តែថែមទាំងផ្ដោតលើការវិនិយោគហេដ្ឋារចនាសម្ព័ន្ធដែលសហគមន៍មិនមានលទ្ធភាពធ្វើដោយខ្លួនឯង ដូច្នេះ នេះគឺជាយុទ្ធសាស្ត្រដែលរដ្ឋវិនិយោគឱ្យទៅសហគមន៍ដើម្បីឱ្យសហគមន៍មានជីវិតដោយខ្លួនឯង គឺធ្វើយ៉ាងណាឱ្យសហគមន៍មានការងារធ្វើ មានប្រាក់ចំណូល។

ឯកឧត្តម ក៏បានគូសបញ្ជាក់ថាអ្វីដែលយើងខិតខំប្រឹងប្រែងធ្វើទាំងអស់នេះគឺដើម្បីឱ្យជីវភាពរបស់ប្រជាពលរដ្ឋក្នុងសហគមន៍មានភាពរីកចម្រើន, ហើយបំណុលឯកជនរបស់ប្រជាពលរដ្ឋក្នុងសហគមន៍និមួយៗក៏ត្រូវបានធ្លាក់ចុះជាបន្តបន្ទាប់ផងដែរ៕