ក្រសួងរៀបចំដែនដី នគរូបនីយកម្ម និងសំណង់ ចាត់ទុកថា ការពង្រឹងជីវភាពធ្វើឱ្យជីវភាពប្រជាជនកាន់តែប្រសើរឡើង គឺជាស្នូលនៃបេសកកម្ម ដែលផ្តោតសំខាន់លើផ្លូវ ទឹក ភ្លើង និងពង្រឹងដង្ហើមសេដ្ឋកិច្ចដែលមានជាក់ស្តែង

(ភ្នំពេញ)៖ ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ បានបញ្ជាក់ថា ក្រសួង ជាមួយនឹងភាគីពាក់ព័ន្ធ បាននិងកំពុងត្រួតពិនិត្យឡើងវិញនូវគោលនយោបាយសម្បទានដីសង្គមកិច្ច ដោយបានពិនិត្យលទ្ធភាពប្រែក្លាយមកជាគោលនយោបាយសម្បទានដើម្បីសង្គមនិងសេដ្ឋកិច្ច ដែលផ្តោតសំដៅលើការកសាងខឿនសេដ្ឋកិច្ចនៅតាមបណ្តាសហគមន៍។ ក្រសួងចាត់ទុកថា ការពង្រឹងជីវភាពធ្វើឱ្យជីវភាពប្រជាជនកាន់តែប្រសើរឡើង គឺជាស្នូលនៃបេសកកម្មរបស់យើង ដែលផ្តោតសំខាន់លើផ្លូវ ទឹក ភ្លើង និងពង្រឹងដង្ហើមសេដ្ឋកិច្ចដែលមានជាក់ស្តែង។

ថ្លែងក្នុងសិក្ខាសាលា”ទស្សនទានឆ្ពោះទៅការរៀបចំគោលនយោបាយសម្បទានដើម្បីសង្គមនិងសេដ្ឋកិច្ច” ដែលបានធ្វើឡើងនៅទីស្ដីការក្រសួង នាព្រឹកថ្ងៃទី១៥ ខែមករា ឆ្នាំ២០២៦។

ឯកឧត្តមឧបនាយករដ្ឋមន្ត្រី សាយ សំអាល់ បានលើកឡើងថា បានលើកឡើងថា កាលពីក្នុងសម័យសម្ដេចតេជោ ហ៊ុន សែន ជានាយករដ្ឋមន្ត្រី យើងបានអនុវត្តគោលនយោបាយដីសម្បទានសង្គមកិច្ចនេះរួចមកហើយ លុះមកដល់សម័យសម្ដេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី យើងក៏នៅតែបន្តអនុវត្តកិច្ចការនេះប៉ុន្តែមានការពង្រីកវិសាលភាពធំជាងមុន គឺគោលនយោបាយសម្បទានដើម្បីសង្គមនិងសេដ្ឋកិច្ច ដោយមិនត្រឹមតែផ្ដល់ដីដល់អតីតយុទ្ធជនប៉ុណ្ណោះទេ ប៉ុន្តែថែមទាំងផ្ដល់ដីសម្រាប់កងទ័ព កងនគរបាលជាតិ, អតីតកងទ័ព, អតីតនគរបាលជាតិ និងផ្ដល់ជូនដល់អតីតមន្ត្រីរាជការ ហើយនាពេលខាងមុខក៏នឹងអាចផ្ដល់ជូនមន្ត្រីរាជការដែលកំពុងបម្រើការងារផងដែរ ដើម្បីជួយលើកស្ទួយកម្រិតជីវភាពរបស់ពួកគាត់ឱ្យប្រសើរឡើង។ បច្ចុប្បន្នការអនុវត្តគោលនយោបាយសម្បទានដើម្បីសង្គមនិងសេដ្ឋកិច្ច ឬហៅថា LASED បានទទួលលទ្ធផលល្អនិងមានអត្ថប្រយោជន៍ជាច្រើនសម្រាប់សង្គមជាតិ។ ទន្ទឹមនោះក៏បានជួបប្រទះនូវបញ្ហាប្រឈមមួយចំនួនផងដែរ។

ឯកឧត្តមឧបនាយករដ្ឋមន្ត្រី បានឱ្យដឹងថា កាលពីក្នុងអាណត្តិមុនៗ រាជរដ្ឋាភិបាលបានអនុវត្តគោលនយោបាយដីសម្បទានសង្គមកិច្ចដាច់ដោយឡែក ដោយមិនមានការធ្វើសមាហរណកម្មជាមួយនឹងនគរូបនីយកម្មនោះទេ ហើយរាល់ដីសម្បទានទាំងនោះគឺស្ថិតនៅឆ្ងាយពីភូមិឋានដែលមានស្រាប់ ដូច្នេះវាមិនបានផ្ដល់ភាពងាយស្រួលក្នុងការរស់នៅក៏ដូចជាការបង្កបង្កើនផល បង្កើតដង្ហើមសេដ្ឋកិច្ចនោះទេ ប៉ុន្តែបច្ចុប្បន្ននិងទៅអនាគត គម្រោងLASED មិនមែនត្រឹមតែផ្តោតទៅលើការចែកដីនោះទេប៉ុន្តែនឹងផ្ដោតលើការកសាងសហគមន៍នៅនឹងកន្លែង គឺនៅក្នុងភូមិឋានដែលមានស្រាប់ដោយកសាងបំពេញបន្ថែមនូវហេដ្ឋារចនាសម្ព័ន្ធចាំបាច់នានាដើម្បីបង្កើតដង្ហើមសេដ្ឋកិច្ចសម្រាប់អ្នកទទួលផលពីគម្រោងLASEDនេះ។

ឯកឧត្តម សាយ សំអាល់ បានបញ្ជាក់ថា ការជួបពិភាក្សាគ្នាក្នុងសិក្ខាសាលានាពេលនេះគឺដើម្បីវាស់ស្ទង់និងពិនិត្យមើលថាតើកិច្ចការដែលយើងបានអនុវត្តនាពេលកន្លងមកទទួលបានប្រសិទ្ធភាពយ៉ាងណាខ្លះ និងរួមគ្នាគិតគូរជាមួយអាជ្ញាធរខេត្ត ក្រសួងស្ថាប័នពាក់ព័ន្ធ និងអង្គការដៃគូ ប្រែក្លាយកិច្ចការនេះឱ្យទៅជាកម្លាំងសរុបដើម្បីឧត្តមប្រយោជន៍របស់ប្រជាពលរដ្ឋ និងបង្កើតទស្សនទានដើម្បីធ្វើឱ្យការរៀបចំគោលនយោបាយសម្បទានដើម្បីសង្គមនិងសេដ្ឋកិច្ចនេះកាន់តែប្រសើរឡើងថែមទៀត។

សូមជម្រាបជូនថា តាមរយៈ គោលនយោបាយសម្បទានដើម្បីសង្គមនិងសេដ្ឋកិច្ចនេះ ក្រសួងរៀបចំដែនដី នគរូបនីយកម្ម និងសំណង់ កំពុងគិតគូរនូវការធានាគាំពារដល់គុណភាពជីវិតរបស់មន្ត្រីរាជការនិងកងកម្លាំងប្រដាប់អាវុធដែលកំពុងបំពេញការងារនិងក្រោយពេលចូលនិវត្តន៍ឱ្យពួកគាត់ទទួលបាននូវជីវភាពរស់នៅល្អប្រសើរ និងគាំពារដល់គុណភាពជីវិតរបស់ប្រជាពលរដ្ឋទូទៅដែលមិនមែនជាមន្ត្រីរាជការ, មិនមែនជាកងកម្លាំងប្រដាប់អាវុធ ធ្វើយ៉ាងណាបង្កើតដង្ហើមសេដ្ឋកិច្ចដល់ពួកគាត់ឱ្យមានការងារធ្វើ មានប្រាក់ចំណូល សំដៅធានាបាននូវការរស់នៅប្រកបដោយសេចក្តីសុខ សុភមង្គល និងជីវភាពល្អប្រសើរ៕