រាជរដ្ឋាភិបាលកម្ពុជា បានបិទបញ្ចប់នូវក្តីកង្វល់នៅក្នុងសង្គមជាតិទាក់ទិននឹងសុវត្ថិភាពនៃការកាន់កាប់ដីធ្លីរបស់បងប្អូនជនជាតិដើមភាគតិច តាមរយៈការប្រគល់បណ្ណកម្មសិទ្ធិជូនដល់សហគមន៍ជនជាតិដើមភាគតិចនៅតំបន់ភូមិភាគឦសាននៃព្រះរាជាណាចក្រកម្ពុជា

(ក្រចេះ)៖ ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ បានចាត់ទុកការប្រគល់បណ្ណកម្មសិទ្ធិដល់សហគមន៍ជនជាតិដើមភាគតិចនៅក្នុងភូមិស្រែជិះ ឃុំស្រែជិះ ស្រុកអូរគ្រៀងសែនជ័យ ខេត្តក្រចេះ នាពេលនេះ ថាពិតជាមានសារៈសំខាន់ក្នុងការបិទបញ្ចប់នូវភាពមន្ទិលចំពោះការកាន់អចលនទ្រព្យរវាងដីឯកជននិងដីសមូហភាពរបស់បងប្អូនជនជាតិដើមភាគតិច, និងបានបញ្ចប់នូវក្តីកង្វល់ និងភាពមន្ទិលរបស់ភ្នាក់ងារអង្គការសហប្រជាជាតិ និងធនាគារពិភពលោកចំពោះសុវត្ថិភាពនៃការកាន់កាប់ដីធ្លីរបស់បងប្អូនជនជាតិដើមភាគតិច។

ថ្លែងក្នុងពិធីចែកបណ្ណសមូហភាពជូនសហគមន៍ជនជាតិដើមភាគតិច ក្នុងគម្រោងបែងចែកដីសម្បទានដើម្បីសង្គមនិងសេដ្ឋកិច្ច ដំណាក់កាលទី៣ (LASED III) ស្ថិតនៅភូមិស្រែជិះ ឃុំស្រែជិះ ស្រុកអូរគ្រៀងសែនជ័យ ខេត្តក្រចេះ នាព្រឹកថ្ងៃទី២០ ខែមករា ឆ្នាំ២០២៦។

ឯកឧត្តមឧបនាយករដ្ឋមន្ត្រី សាយ សំអាល់ បានឱ្យដឹងថា គម្រោងសម្បទានដើម្បីសង្គមនិងសេដ្ឋកិច្ចដំណាក់កាលទី៣ (LASED III)នោះ គឺបង្កើតឡើងក្នុងគោលបំណងមិនត្រឹមតែផ្ដល់ដីប៉ុណ្ណោះទេ ប៉ុន្តែបច្ចុប្បន្នក្រសួងរៀបចំដែនដី នគរូបនីយកម្ម និងសំណង់ បានពង្រីកវិសាលភាពនៃគម្រោងនេះបន្ថែមទៀតកាន់តែទូលំទូលាយដែលភ្ជាប់ជាមួយនឹងការអភិវឌ្ឍន៍មូលដ្ឋាននិងកសាងហេដ្ឋារចនាសម្ព័ន្ធចាំបាច់បន្ថែមទៀតសម្រាប់បង្កើតដង្ហើមសេដ្ឋកិច្ចដល់ប្រជាពលរដ្ឋផងដែរ។

ឯកឧត្តមឧបនាយករដ្ឋមន្ត្រី សាយ សំអាល់ បានបន្ថែមថា ក្រោមការយកចិត្តទុកដាក់ពីរាជរដ្ឋាភិបាលកម្ពុជា គម្រោងLASED III ក៏ត្រូវបានយកមកអនុវត្តនៅតាមបណ្ដាខេត្តភូមិភាគឦសាននៃប្រទេសកម្ពុជា ក្នុងគោលបំណងបង្កើតដង្ហើមសេដ្ឋកិច្ចសម្រាប់តំបន់នេះនិងជួយលើកស្ទួយជីវភាពរស់នៅរបស់ប្រជាពលរដ្ឋនៅក្នុងភូមិភាគឥសាន្តនេះឱ្យកាន់តែល្អប្រសើរ។ ឯកឧត្តមឧបនាយករដ្ឋមន្ត្រី បានចាត់ទុកការប្រគល់បណ្ណកម្មសិទ្ធិដល់សហគមន៍ជនជាតិដើមភាគតិចនៅក្នុងភូមិស្រែជិះ ឃុំស្រែជិះ ស្រុកអូរគ្រៀងសែនជ័យ ខេត្តក្រចេះ នាពេលនេះ ថាពិតជាមានសារៈសំខាន់ក្នុងការបិទបញ្ចប់នូវភាពមន្ទិលចំពោះការកាន់អចលនទ្រព្យរវាងដីឯកជននិងដីសមូហភាពរបស់បងប្អូនជនជាតិដើមភាគតិច, និងបានបញ្ចប់នូវក្តីកង្វល់ និងភាពមន្ទិលរបស់ភ្នាក់ងារអង្គការសហប្រជាជាតិ និងធនាគារពិភពលោកចំពោះសុវត្ថិភាពនៃការកាន់កាប់ដីធ្លីរបស់បងប្អូនជនជាតិដើមភាគតិច។

ម្យ៉ាងទៀតក៏បានបង្កើននូវភាពជឿជាក់និងភាពងាយស្រួលដល់ធនាគារនិងគ្រឹះស្ថានមីក្រូហិរញ្ញវត្ថុក្នុងការវាយតម្លៃអចលនទ្រព្យរបស់បងប្អូនជនជាតិដើមភាគតិច ឬដីសមូហភាពរបស់ជនជាតិដើមភាគតិចផងដែរ។ ជារួម នេះគឺជាការបិទបញ្ចប់នូវក្តីកង្វល់នៅក្នុងសង្គមជាតិទាក់ទិននឹងសុវត្ថិភាពនៃការកាន់កាប់អចលនទ្រព្យរបស់បងប្អូនជនជាតិដើមភាគតិចនៅក្នុងព្រះរាជាណាចក្រកម្ពុជា។

សូមគូសបញ្ជាក់ផងដែរថា រាជរដ្ឋាភិបាលកម្ពុជាមិនត្រឹមតែទទួលស្គាល់បងប្អូនជនជាតិដើមភាគតិចជាជនជាតិដើមភាគតិចប៉ុណ្ណោះទេ ប៉ុន្តែតែងតែគោរព លើកតម្កើងវប្បធម៌អរិយធម៌ និងទំនៀមទម្លាប់ប្រពៃណីរបស់បងប្អូនជនជាតិដើមភាគតិច រួមទាំងការធ្វើសមាហរណកម្មទាំងសង្គម សេដ្ឋកិច្ច និងនយោបាយជូនដល់បងប្អូនជនជាតិដើមភាគតិច ព្រោះកម្ពុជាគឺជាសង្គមពហុវប្បធម៌ មិនមានការរើសអើង៕