ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ កោតសរសើរនិងវាយតម្លៃខ្ពស់ចំពោះនារីខ្មែរដែលមានលក្ខណសម្បត្តិ គុណសម្បត្តិ និងចរិយាសម្បត្តិល្អប្រពៃ មានភាពវាងវៃ ចេះបត់បែនតាមការវិវត្តនៃសង្គម សេដ្ឋកិច្ចនិងវប្បធម៌

(ភ្នំពេញ)៖ ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ កោតសរសើរនិងវាយតម្លៃខ្ពស់ចំពោះនារីខ្មែរដែលមានលក្ខណសម្បត្តិ គុណសម្បត្តិ និងចរិយាសម្បត្តិល្អប្រពៃ មានភាពវាងវៃ ឆ្លាតវៃចេះបត់បែនតាមការវិវត្តនៃសង្គម សេដ្ឋកិច្ចនិងវប្បធម៌ អាចចូលរួមគ្រប់កោសិកានៃសង្គមជាតិ ដើម្បីធានាបាននូវជីវិតគ្រួសារប្រកបដោយសុភមង្គល និងភាពរុងរឿងក្នុងសង្គមកម្ពុជា។

ក្នុងពិធីអបអរសាទរខួបអនុស្សាវរីយ៍លើកទី ១១៥ ទិវាអន្តរជាតិនារី ៨មីនា(ឆ្នាំ ១៩១០-២០២៦) ក្រោមប្រធានបទ”សន្តិភាពនិងសន្តិសុខសម្រាប់ស្ត្រីនិងគ្រួសារ” ដែលបានធ្វើឡើងនៅទីស្ដីការក្រសួង នាព្រឹកថ្ងៃទី៦ ខែមីនា ឆ្នាំ២០២៦។

ឯកឧត្តមឧបនាយករដ្ឋមន្ត្រី សាយ សំអាល់ បានលើកឡើងថា ក្នុងជីវិតក្រុមគ្រួសារនៅកម្ពុជា ស្ត្រីដែលហៅថាជាមេផ្ទះនាំឱ្យគ្រួសាររុងរឿង មានភាពកក់ក្តៅ ជាមូលដ្ឋានគ្រឹះនៃសង្គមជាតិដែលយើងទាំងអស់គ្នាគួរចូលរួមអបអរសាទរជារៀងរាល់ថ្ងៃមិនមែនត្រឹមតែទិវាសិទ្ធិនារីមួយថ្ងៃប៉ុណ្ណោះទេ។ នៅក្នុងសង្គមកម្ពុជា ស្ត្រីត្រូវបានលើកតម្កើង និងមានគុណតម្លៃពិសេសផ្ទាល់ខ្លួនស្របតាមកត្តាសត្យានុម័តដែលបុរសមិនអាចធ្វើបាន។នៅក្នុងវិស័យសំណង់ មានស្ត្រីដែលមានឯកទេសខាងវិស្វកម្មនិងស្ថាបត្យកម្មជាច្រើន បានចូលរួមក្នុងកិច្ចការអភិវឌ្ឍជាតិ។

ផ្ដើមចេញពីទំនៀមទម្លាប់ប្រពៃណីនិងអ្វីដែលយើងបានធ្វើកន្លងមក និងតទៅអនាគតក្នុងវិស័យរៀបចំដែនដី នគរូបនីយកម្ម និងសំណង់ ឯកឧត្តមឧបនាយករដ្ឋមន្ត្រី សាយ សំអាល់ បានលើកទឹកចិត្តដល់ថ្នាក់ដឹកនាំនិងមន្ត្រីរាជការទាំងបុរសនិងនារី ត្រូវបន្តបង្កើនសមត្ថភាពរបស់ខ្លួន រក្សាលំនឹង និងភាពច្បាស់លាស់ដើម្បីបំពេញការងារចូលរួមកសាងដឹកនាំប្រព័ន្ធការងារនៅក្រសួងរៀបចំដែនដី នគរូបនីយកម្ម និងសំណង់ ឱ្យដំណើរការល្អ ក្នុងនោះត្រូវរួមគ្នារៀបចំដែនដីអោយបានត្រឹមត្រូវដើម្បីធានាបាននូវអាយុជីវិតជាតិក្នុងរយៈពេលយូរអង្វែង, រៀបចំនគរូបនីយកម្មឱ្យបានល្អដើម្បីប្រែក្លាយទីក្រុងឱ្យមានរចនាសម្ព័ន្ធល្អស្អាតប្រកបដោយនិរន្តរភាព និងជួយអោយប្រជាពលរដ្ឋមានជីវភាពល្អប្រសើរ, ចំពោះកិច្ចការសម្បទានដី គឺត្រូវធ្វើឲ្យលើសពីការងារចែកដីចែកផ្ទះ ដោយត្រូវធ្វើយ៉ាងណាឱ្យអ្នកទទួលផលមានជីវិតរស់នៅល្អប្រសើរ, ហើយត្រូវតាមឱ្យទាន់ការវិវឌ្ឍន៍នៃសភាពការណ៍ និងស្វែងរកគំនិតថ្មីៗដើម្បីការអភិវឌ្ឍជាតិមាតុភូមិ។

ឯកឧត្តមឧបនាយករដ្ឋមន្ត្រី សាយ សំអាល់ បានកោតសរសើរនិងវាយតម្លៃខ្ពស់ចំពោះនារីខ្មែរដែលមានលក្ខណសម្បត្តិ គុណសម្បត្តិ និងចរិយាសម្បត្តិល្អប្រពៃ មានភាពវាងវៃ ឆ្លាតវៃចេះបត់បែនតាមការវិវត្តនៃសង្គម សេដ្ឋកិច្ចនិងវប្បធម៌ អាចចូលរួមគ្រប់កោសិកានៃសង្គមជាតិ ដើម្បីធានាបាននូវជីវិតគ្រួសារប្រកបដោយសុភមង្គល និងភាពរុងរឿងក្នុងសង្គមកម្ពុជា៕