តំបន់២ និងតំបន់៣នៃបឹងទន្លេសាប នឹងត្រូវចុះបញ្ជីជាដីរដ្ឋដើម្បីអភិរក្សសម្បត្តិធម្មជាតិដ៏មានតំលៃមហាសាលនេះសម្រាប់ទុកជាមរតកសំរាប់មនុស្សគ្រប់ជំនាន់

(ភ្នំពេញ)៖ ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ បានបញ្ជាក់ថា តំបន់២និងតំបន់៣ ក្នុងតំបន់បឹងទន្លេសាប នឹងត្រូវចុះបញ្ជីជាដីរដ្ឋដោយមិនអនុញ្ញាតឱ្យមានការសុំកាត់ឆ្វៀលដីបន្តទៀតទេដើម្បីកុំឱ្យមានផលប៉ះពាល់បាត់បង់ជីវចម្រុះក្នុងបឹងទន្លេសាប។ ថ្លែងក្នុងកិច្ចប្រជុំអន្តរក្រសួងដើម្បីពិនិត្យវឌ្ឍនភាពការងារចុះបញ្ជីដីនៅតំបន់ទន្លេសាប ដែលបានធ្វើឡើងនៅទីស្ដីការក្រសួង នាថ្ងៃទី៧ ខែសីហា ឆ្នាំ២០២៤។

ឯកឧត្តមឧបនាយករដ្ឋមន្ត្រី សាយ សំអាល់ បានមានប្រសាសន៍ថា ការជួបប្រជុំគ្នានាពេលនេះគឺដើម្បីរួមគ្នាទទួលខុសត្រូវជាប្រវត្តិសាស្ត្រទាក់ទិនទៅនឹងការគ្រប់គ្រងបឹងទន្លេសាប។ ឯកឧត្តមបានគូសបញ្ជាក់ថា កិច្ចការបឹងទន្លេសាបគឺជាកិច្ចការមួយដែលយើងទាំងអស់គ្នាត្រូវហ៊ានសម្រេចចិត្តក្នុងការកំណត់គោលការណ៍នៃការដឹកនាំគ្រប់គ្រងបឹងទន្លេសាបនេះឱ្យបានជាក់លាក់ ដោយមិនអាចបណ្ដែតបណ្ដោយបាននោះទេជៀសវាងប្រឈមនឹងការបាត់បង់។ ចំណុចពិសេសក្នុងការរក្សាអាយុជីវិតរបស់បឹងទន្លេសាបគឺការរក្សារបបទឹក និងព្រៃលិចទឹក ។

ឯកឧត្តម បានបន្ថែមថា ចំពោះការកំណត់ឱ្យមានតំបន់១ តំបន់២ និងតំបន់៣ ក្នុងតំបន់បឹងទន្លេសាប គឺជាការកំណត់ដ៏ត្រឹមត្រូវមួយដើម្បីរក្សាបឹងទន្លេសាបឱ្យនៅគង់វង្ស។ ចំពោះការធ្វើស្រូវរដូវប្រាំងរបស់ប្រជាពលរដ្ឋអាចធ្វើក្នុងតំបន់២បាន ស្របតាមគោលការណ៍ដែលបានកំណត់ និងត្រូវរក្សាទុកតំបន់៣ជាតំបន់អភិរក្ស ប៉ុន្តែបច្ចុប្បន្នកំពុងមានការទន្ទ្រានក្នុងតំបន់៣ នេះ ដូច្នេះនេះគឺជាបញ្ហាដែលយើងទាំងអស់គ្នាត្រូវរួមគ្នាដោះស្រាយ។ បឹងទន្លេសាបមានផលប្រយោជន៍យ៉ាងមហាសាលសំរាប់ប្រទេសជាតិដែលអាចជួយទ្រទ្រង់សេដ្ឋកិច្ច សង្គម និងវប្បធម៌របស់ប្រជាជនខ្មែរគ្រប់រូប ដូចនេះយើងទាំងអស់គ្នាត្រូវរួមគ្នារក្សាការពារធនធានធម្មជាតិដ៏មានតម្លៃនេះអោយបានស្ថិតស្ថេរគង់វង្សទុកជាមរតកសំរាប់មនុស្សគ្រប់ជំនាន់៕