ឯកឧត្តមឧបនាយករដ្ឋមន្រ្តី សាយ សំអាល់ ចែករំលែកទស្សនៈផ្ទាល់ខ្លួនមួយចំនួនដល់សិក្ខាកាម ដើម្បីកសាងប្រទេសជាតិ និងប្រជាជន ក្នុងឱកាសអញ្ជើញជាអធិបតីភាពបើកសិក្ខាសាលាស្តីពី “ទីក្រុងទឹកអង្គរ”

(ភ្នំពេញ)៖ ឯកឧត្តមឧបនាយកមន្ដ្រី សាយ សំអាល់ រដ្ឋមន្ដ្រីក្រសួងរៀបចំដែនដី នគរូបនីយកម្ម និងសំណង់ បានអញ្ជើញជាអធិបតីបើកសិក្ខាសាលាស្តីពី “ទីក្រុងទឹកអង្គរ” ដោយមានការចូលរួមពីគណៈស្ថាបត្យករកម្ពុជា គណៈវិស្វករកម្ពុជា រួមទាំងអាជ្ញាធរជាតិអប្សរា នៅព្រឹកថ្ងៃទី១១ ខែធ្នូ ឆ្នាំ២០២៣នេះ នៅទីស្ដីការក្រសួងរៀបចំដែនដី នគរូបនីយកម្ម និងសំណង់។

ឯកឧត្តមឧបនាយករដ្ឋមន្ត្រីបានលើកឡើងនូវទស្សនៈផ្ទាល់ខ្លួនជាគំនិត ដើម្បីឱ្យសិក្ខាកាមអាចយកជាមូលដ្ឋានក្នុងការគិតគូរពិចារណា គូសវាសប្លង់គោលនៃគំនិតសម្រាប់កសាងប្រទេសជាតិ និងប្រជាជន។

ឯកឧត្តមឧបនាយករដ្ឋមន្រ្តី សាយ សំអាល់ បញ្ជាក់ថា ការងារមួយដែលអាចសម្រេចទៅបាន លុះត្រាតែមានការឯកភាពគ្នាជារួម ទើបមិនមានការបែកបាក់សាមគ្គីភាព និងអាចដំណើការទៅមុខបានដោយរលូន និងបានរម្លឹកអំពីប្រសាសន៍សម្តេចតេជោ ហ៊ុន សែន អតីតនាយករដ្ឋមន្រ្តី ដែលបានជំរុញឱ្យក្រសួងរៀបចំដែនដី នគរូបនីយកម្ម និងសំណង់ ព្រមទាំងអ្នកពាក់ព័ន្ធទាំងអស់ ត្រូវធ្វើយ៉ាងណាបន្ថយគម្លាតរវាងជនបទ និងទីក្រុង ដើម្បីឱ្យស្របតាមគោលនយោបាយយុទ្ធសាស្រ្តបញ្ចកោណរបស់រាជរដ្ឋាភិបាលនីតិកាលទី៧ ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដែលក្នុងនោះមាន មនុស្ស ផ្លូវ ទឹក ភ្លើង និងបច្ចេកវិទ្យាឌីជីថល។

ជាមួយគ្នានេះ ឯកឧត្តមឧបនាយករដ្ឋមន្ត្រី ថ្លែងថា យើងទាំងអស់គ្នាកំពុងតែរស់នៅក្នុងពេលវេលាមួយ ដែលជាឱកាសមាសសំរាប់កម្ពុជាក្នុងការកសាងខ្លួនឯង ស្គាល់ខ្លួនឯងឱ្យបានច្បាស់ ជឿជាក់លើខ្លួនឯង និងបន្តរក្សាសុខសន្តិភាពជារៀងរហូត ដូច្នេះយើងត្រូវតែពូនជ្រុំកសាងមូលដ្ឋានមួយធ្វើយ៉ាងណាឱ្យប្រជាជនកម្ពុជារស់នៅដោយសុភមង្គល និងសេចក្តីថ្លៃថ្នូរ។

ឯកឧត្តមឧបនាយករដ្ឋមន្ត្រី សង្ឃឹមថា សិក្ខាកាមទាំងអស់នឹងពិភាក្សាផ្លាស់ប្តូរមតិយោបល់ និងមានគំនិតគិតគូរបានច្បាស់លាស់សំរាប់ទីក្រុងទឹកអង្គរក្នុងក្រុងសៀមរាប ដើម្បីបន្តរក្សាមរតកដ៏ថ្លៃថ្លាពីបុព្វបុរសខ្មែរ ដែលបានខិតខំប្រឹងប្រែងកសាងក្រុងអង្គរ និងបន្សល់ទុកឱ្យមនុស្សជំនាន់ក្រោយមានមោទនភាពចំពោះការរៀបចំទីក្រុងអង្គរនេះ។

ឯកឧត្តមឧបនាយករដ្ឋមន្រ្តីបានថ្លែងអំណរគុណដល់គណៈស្ថាបត្យករកម្ពុជា និងគណៈវិស្វករកម្ពុជា រួមនិងអាជ្ញាធរជាតិអប្សរាដែលបានរៀបចំសិក្ខាសាលាដ៏មានសារសំខាន់នេះឡើង ហើយឯកឧត្តមឧបនាយករដ្ឋមន្រ្តី សំណូមពរឱ្យបង្កើតជាទម្លាប់នៃការរៀបចំឱ្យមានសិក្ខាសាលាបែបនេះជាបន្តបន្ទាប់ទៀតជាប្រចាំ ចំពោះខេត្តសៀមរាបទាំងមូល។