ឯកឧត្តមឧបនាយករដ្ឋមន្ត្រី៖ ជោគជ័យរបស់សិក្ខាកាមក្នុងវគ្គបណ្ដុះបណ្ដាលបច្ចេកទេសតាក់តែងឯកសារច្បាប់ និងមូលដ្ឋានគ្រឹះនៃបណ្ដឹង ឆ្លើយតបទៅនឹងគោលនយោបាយរបស់រាជរដ្ឋាភិបាល ដើម្បីអប់រំផ្សព្វផ្សាយឱ្យប្រជាពលរដ្ឋបានយល់ដឹងពីច្បាប់

(ភ្នំពេញ)៖ ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានសហភាពសហព័ន្ធយុវជនកម្ពុជា (ស.ស.យ.ក.) រាជធានីភ្នំពេញ បានចាត់ទុក វគ្គបណ្ដុះបណ្ដាលបច្ចេកទេសតាក់តែងឯកសារច្បាប់ និងមូលដ្ឋានគ្រឹះនៃបណ្ដឹង ថាពិតជាមានសារៈសំខាន់ ព្រមទាំងបានឆ្លើយតបទៅនឹងគោលនយោបាយរបស់រាជរដ្ឋាភិបាលកម្ពុជា ដើម្បីអប់រំផ្សព្វផ្សាយឱ្យប្រជាពលរដ្ឋបានយល់ដឹងឱ្យបានស៊ីជម្រៅអំពីច្បាប់ និងការកសាងមូលធនមនុស្ស។

ឯកឧត្តមឧបនាយករដ្ឋមន្ត្រី ថ្លែងនាឱកាសបិទវគ្គបណ្ដុះបណ្ដាលបច្ចេកទេសតាក់តែងឯកសារច្បាប់ជំនាន់ទី១ និងវគ្គមូលដ្ឋានគ្រឹះនៃបណ្ដឹង វគ្គ១ វគ្គ២  វគ្គ៣ និងវគ្គ៤ នៅក្រសួងរៀបចំដែនដី នារសៀលថ្ងៃទី១៩ ខែធ្នូ ឆ្នាំ២០២៣។

ឯកឧត្តមឧបនាយករដ្ឋមន្ត្រី កោតសរសើរ និងវាយតម្លៃខ្ពស់ចំពោះសិក្ខាកាមទាំងអស់ ដែលបានចូលរួមក្នុងវគ្គបណ្ដុះបណ្ដាលនេះ និងបានស្វែងយល់ស៊ីជម្រៅទាក់ទិននឹងច្បាប់ និងលិខិតបទដ្ឋានគតិយុត្តផ្សេងៗ។ ម្យ៉ាងទៀត ការចូលរួមរបស់សិក្ខាកាមទាំងអស់គឺជាធាតុចូលដ៏សំខាន់ ដើម្បីស្វែងរកដំណោះស្រាយលើបញ្ហាណាមួយដោយផ្អែកលើគោលការណ៍ និងផ្អែកលើច្បាប់ ដោយទាមទារឱ្យមានការធ្វើការងារជាក្រុម និងការឯកភាពគ្នាជារួម។

ឯកឧត្តម ក៏បានបានរម្លឹកពីគោលការណ៍គ្រឹះរបស់ ស.ស.យ.ក. ដែលឯកឧត្តម ហ៊ុន ម៉ានី តែងតែចង្អុលបង្ហាញ។ ស.ស.យ.ក. ជាថ្នាលបណ្ដុះមនុស្សជំនាន់ថ្មីដោយពូនជ្រំថែទាំធ្វើយ៉ាងណាបង្កើតបានធនធានមនុស្ស ដែលមានគុណភាពសម្រាប់អភិវឌ្ឍសង្គមជាតិ។ គោលការណ៍គ្រឹះនេះ គឺឆ្លើយតបទៅនឹងយុទ្ធសាស្ត្របញ្ចកោណដំណាក់កាលទី ១ របស់រាជរដ្ឋាភិបាលកម្ពុជានីតិកាលទី៧ ដឹកនាំដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ មូលធនមនុស្ស មានគុណភាពខ្ពស់ និងសុខភាពល្អ គឺជាទ្រព្យសកម្មជាតិដ៏រឹងមាំ សម្រាប់បង្កើនតម្លៃសេដ្ឋកិច្ច លើកកម្ពស់តម្លៃវប្បធម៌ និងបង្កើតគំនិតថ្មីៗ សំដៅធានាចីរភាពកំណើនរយៈពេលវែង និងជវភាពនៃការអភិវឌ្ឍសង្គម-សេដ្ឋកិច្ច។

មុននឹងបញ្ចប់ ឯកឧត្តមឧបនាយករដ្ឋមន្ត្រី បានបញ្ជាក់ពីការប្ដេជ្ញាចិត្តស្មោះត្រង់ចំពោះជាតិមាតុភូមិ ជាថ្នូរទៅនឹងការផ្ដល់យុត្តិធម៌ដល់អ្នកដែលបានលះបង់អាយុជីវិតដើម្បីបុព្វហេតុសុខសន្តិភាព ដែលបានជាបុរេលក្ខខណ្ឌសម្រាប់យុវជនជំនាន់ក្រោយប្រែក្លាយខ្លួនជាធនធានមនុស្សប្រកបដោយសក្តានុពលដើម្បីចូលរួមអភិវឌ្ឍជាតិ៕