ឯកឧត្តមឧបនាយករដ្ឋមន្ដ្រី សាយ សំអាល់ លើកទឹកចិត្តឱ្យធុរជន និងក្រុមហ៊ុនជប៉ុនមកវិនិយោគជាមួយក្រុមហ៊ុនកម្ពុជាឱ្យបានច្រើន ដើម្បីទទួលបានផលប្រយោជន៍នានាពីរាជរដ្ឋាភិបាលកម្ពុជា និងរួមចំណែកអភិវឌ្ឍសេដ្ឋកិច្ចកម្ពុជា

(ភ្នំពេញ)៖ដោយមើលឃើញពីសក្ដានុពលនៃសេដ្ឋកិច្ចរបស់ប្រទេសកម្ពុជា ឯកឧត្តមឧបនាយករដ្ឋមន្ដ្រី សាយ សំអាល់ រដ្ឋមន្ដ្រីក្រសួងរៀបចំដែនដី នគរូបនីយកម្ម និងសំណង់ បានជំរុញឱ្យធុរជន ក៏ដូចជាក្រុមហ៊ុនជប៉ុន មកវិនិយោគជាមួយក្រុមហ៊ុនកម្ពុជាឱ្យបានច្រើន ដើម្បីទទួលបានផលប្រយោជន៍នានាពីរាជរដ្ឋាភិបាលកម្ពុជា និងដើម្បីជាការរួមចំណែកអភិវឌ្ឍសេដ្ឋកិច្ចកម្ពុជាឱ្យកាន់តែរីកចម្រើន។

ឯកឧត្តមថ្លែងក្នុងវេទិការដ្ឋ-ឯកជនលើកទី៤ ស្ដីពីការអភិវឌ្ឍនគរូបនីយកម្មកម្ពុជា-ជប៉ុន ដែលត្រូវបានរៀបចំឡើងនៅទីស្ដីការក្រសួងនាថ្ងៃទី២១ ខែធ្នូ ឆ្នាំ២០២៣នេះ។ វេទិកានេះមានការចូលរួមដោយថ្នាក់ដឹកនាំនៃក្រសួងរៀបចំដែនដី នគរូបនីយកម្ម និងសំណង់កម្ពុជា និងក្រសួងដីធ្លីហេដ្ឋារចនាសម្ព័ន្ធ ដឹកជញ្ជូន និងទេសចរណ៍នៃប្រទេសជប៉ុន ព្រមទាំងសភាពាណិជ្ជកម្មកម្ពុជា សមាគមអ្នកសាងសង់កម្ពុជា សមាគមអ្នកអភិវឌ្ឍន៍លំនៅដ្ឋានកម្ពុជា សមាគមអ្នកវាយតម្លៃអចលនទ្រព្យកម្ពុជា និងក្រុមហ៊ុនវិនិយោគ និងធុរជនកម្ពុជា។

ឯកឧត្តមឧបនាយករដ្ឋមន្ដ្រីថ្លែងអំណរគុណ និងវាយតម្លៃខ្ពស់ចំពោះការរៀបចំវេទិការដ្ឋ-ឯកជនលើកទី៤ ស្ដីពីការអភិវឌ្ឍនគរូបនីយកម្មកម្ពុជា-ជប៉ុននេះ ដែលត្រូវបានរៀបចំឡើងក្នុងគោលបំណងបន្តជំរុញធុរកិច្ច និងវិនិយោគពីប្រទេសជប៉ុនមកកម្ពុជាស្ដីពីការអភិវឌ្ឍគម្រោងនគរូបនីយកម្ម ដោយផ្ដោតលើការអភិវឌ្ឍទីក្រុងឆ្លាត និងការអភិវឌ្ឍអចលនទ្រព្យ ថែមទាំងបានបង្ហាញពីកិច្ចសហប្រតិបត្តិការ និងភាពជឿជាក់របស់អ្នកវិនិយោគជប៉ុនទៅលើសក្តានុពលនៃសេដ្ឋកិច្ចកម្ពុជា ហើយតាមរយៈវេទិកានេះនឹងកាន់តែពង្រឹងបាននូវសាមគ្គីភាព មិត្តភាពនៃប្រជាជាតិទាំងពីរ ពោលគឺកម្ពុជា-ជប៉ុនបន្ថែមទៀត។

ឯកឧត្តមបានបន្ថែមថា ក្រសួងរៀបចំដែនដី នគរូបនីយកម្ម និងសំណង់កម្ពុជា នឹងធ្វើទៅតាមមធ្យោបាយគ្រប់យ៉ាងស្របតាមសមត្ថកិច្ចរបស់ខ្លួន ដើម្បីសហការ ក៏ដូចជាសម្របសម្រួលជូនដល់វិនិយោគិនទាំងអស់ដោយក្តីរីករាយ។

ទន្ទឹមនេះ ឯកឧត្តម សាយ សំអាល់ ក៏បានថ្លែងអំណរគុណយ៉ាងជ្រាលជ្រៅចំពោះការគាំទ្ររបស់រដ្ឋាភិបាល និងប្រជាជនជប៉ុនដែលបានផ្ដល់ជូនប្រជាជនកម្ពុជាតាមរយៈសមិទ្ធផលជាច្រើនដូចជាហេដ្ឋារចនាសម្ព័ន្ធ ផ្លូវ ស្ពាន ប្រព័ន្ធធារាសាស្ត្រ ទឹកស្អាត ការបណ្ដុះបណ្ដាលដល់មន្ត្រីរាជការ រួមនឹងវិស័យជាច្រើនទៀត៕