ឯកឧត្តមឧបនាយករដ្ឋមន្ត្រី សាយ សំអាល់ ជំរុញអាជ្ញាធរខេត្តខេត្តកំពង់ស្ពឺ ប្រើប្រាស់កម្លាំងសរុប ពន្លឿនការងារចុះបញ្ជីដីធ្លី ដើម្បីធានាសុវត្ថិភាពក្នុងការកាន់កាប់ដីធ្លីស្របច្បាប់ជូនប្រជាពលរដ្ឋ

(កំពង់ស្ពឺ)៖ ឯកឧត្តមឧបនាយករដ្ឋមន្ត្រី សាយ សំអាល់ ស្នើកម្លាំងភូមិបាលខេត្ត កម្លាំងមន្ទីររៀបចំដែនដីនគរូបនីយកម្ម សំណង់ និងសុរិយោដីរាជធានីភ្នំពេញ កម្លាំងអ្នកស្ម័គ្រចិត្ត និងសមាជិកសហព័ន្ធសហភាពយុវជនកម្ពុជា  (ស.ស.យ.ក) ចូលរួមប្រើប្រាស់កម្លាំងសរុប ពន្លឿនការងារចុះបញ្ជីដីធ្លីក្នុងភូមិសាស្ត្រខេត្តកំពង់ស្ពឺ ឱ្យមានប្រសិទ្ធភាព និងទទួលបានជោគជ័យតាមការគ្រោងទុក សំដៅផ្តល់ផលប្រយោជន៍ជូនប្រជាពលរដ្ឋ ធានាបាននូវសុវត្ថិភាពក្នុងការកាន់កាប់ដីធ្លីស្របច្បាប់។

ឯកឧត្តមឧបនាយករដ្ឋមន្ត្រី ថ្លែងក្នុងឱកាសប្រគល់វិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋចំនួន ៣ភូមិ ក្នុងភូមិសាស្ត្រខេត្តកំពង់ស្ពឺ នារសៀលថ្ងៃទី១២ ខែមករា ឆ្នាំ២០២៤។

ឯកឧត្តមឧបនាយករដ្ឋមន្ត្រី បានថ្លែងអំណរគុណដល់ក្រុមការងារទាំងអស់ ដែលបានខិតខំប្រឹងប្រែងអស់ពីកម្លាំងកាយចិត្តមិនខ្លាចនឿយហត់ក្នុងការជំរុញការងារចេញបណ្ណសម្គាល់ម្ចាស់អចលនវត្ថុជូនប្រជាពលរដ្ឋឱ្យបានចេញជាផ្លែផ្កានាពេលនេះ ដែលនេះគឺជាកិត្យានុភាពដ៏ធំរបស់ក្រុមការងារទាំងអស់ និងជាកិត្តិនាមរបស់ក្រសួង។

ឆ្នាំ២០២៤ នេះ គឺជាខួបទី៤០ នៃការចេញបណ្ណកម្មសិទ្ធិដីធ្លីជូនប្រជាពលរដ្ឋ ហើយឯកឧត្តមឧបនាយករដ្ឋមន្ត្រី សង្ឃឹមថាការចេញបណ្ណកម្មសិទ្ធិនេះនឹងផ្ដល់សុវត្ថិភាពតាមផ្លូវច្បាប់ជូនប្រជាពលរដ្ឋលើទ្រព្យដែលខ្លួនមាន ហើយទ្រព្យនេះត្រូវបានធានាដោយច្បាប់ និងធ្វើឱ្យទ្រព្យនេះកាន់តែមានតម្លៃខ្ពស់ជាងមុនសម្រាប់ប្រជាពលរដ្ឋយកទៅប្រើប្រាស់ ដើម្បីបង្កើនជីវភាពរបស់ខ្លួនឱ្យកាន់តែប្រសើរឡើង។

មកទល់ពេលនេះ ក្រសួងបានប្រគល់បណ្ណកម្មសិទ្ធិដីធ្លីជូនប្រជាពលរដ្ឋបានប្រមាណ ៥លានបណ្ណរួចរាល់ហើយ ហើយយើងនៅមានប្រមាណ ២លានបណ្ណ ដែលកំពុងត្រូវបានចែកជូនប្រជាពលរដ្ឋជារៀងរាល់ថ្ងៃ។ នៅទូទាំងប្រទេស យើងនៅសល់ប្រមាណជា ៥លានក្បាលដីទៀត ដែលត្រូវវាស់វែង ក្នុងនោះនៅខេត្តកំពង់ស្ពឺ នៅសល់ប្រមាណជា ៤០ម៉ឺន ក្បាលដីទៀត ដែលត្រូវវាស់វែង ហើយនាពេលអនាគត ក្រសួងនឹងរៀបចំសេវាឱ្យបានល្អតាមរយៈការប្រើប្រាស់តាមទូរសព្ទ ដើម្បីសម្រួលដល់ប្រជាពលរដ្ឋអាចយកបណ្ណកម្មសិទ្ធិនេះទៅប្រើប្រាស់បានកាន់តែងាយស្រួល។

សូមជម្រាបថា រាជរដ្ឋាភិបាលកម្ពុជា នីតិកាលទី៧ នៃរដ្ឋសភា បានដាក់ចេញនូវយុទ្ធសាស្រ្តបញ្ចកោណ ដំណាក់កាលទី១ ដែលក្នុងនោះរួមបញ្ចូលការធ្វើកំណែទម្រង់ដីធ្លី និងនគរូបនីយកម្ម ឱ្យកាន់តែស៊ីជម្រៅ ជាមួយនឹងការបង្កើតឱ្យមាននូវគោលនយោបាយដីធ្លី ៣ ចំណុច រួមមាន ការចុះបញ្ជីដីធ្លីមានលក្ខណៈជាប្រព័ន្ធ ការដោះស្រាយវិវាទដីធ្លីក្រៅប្រព័ន្ធតុលាការ និងការផ្ដល់សេវារដ្ឋបាលដីធ្លី ជូនប្រជាពលរដ្ឋប្រកបដោយតម្លាភាព និងប្រសិទ្ធភាពខ្ពស់ សំដៅលើកកម្ពស់កម្រិតជីវភាពរស់នៅរបស់ប្រជាពលរដ្ឋ។

ការងារចុះបញ្ជីដីធ្លី ដើម្បីបន្តផ្តល់បណ្ណកម្មសិទ្ធិដល់ប្រជាជនឱ្យបានលឿន ដើម្បីជាមូលដ្ឋានប្រភពសេដ្ឋកិច្ច និងសុវត្ថិភាពនៃការកាន់កាប់ដីធ្លី ជាអាទិភាពទី៥ នៃទិសដៅអាទិភាពគោលនយោបាយ ១៥ ចំណុច ដែលក្រសួងរៀបចំដែនដី នគរូបនីយកម្ម និងសំណង់ ដាក់ចេញផ្អែកទៅលើអាទិភាពនៃយុទ្ធសាស្រ្តបញ្ចកោណ ក្នុងបញ្ចកោណទី៤ មុំទី៤៕