ក្រសួងរៀបចំដែនដី នគរូបនីយកម្មនិ ងសំណង់ សង្ឃឹមថា ធនាគារអភិវឌ្ឍន៍អាស៊ី (ADB) នឹងរួមចំណែកជួយសម្រួលដល់ការងារចុះបញ្ជីដីធ្លីឱ្យបានចប់សព្វគ្រប់នៅទូទាំងប្រទេសកម្ពុជា

(ភ្នំពេញ)៖ ឯកឧត្តមឧបនាយករដ្ឋមន្ត្រី សាយ សំអាល់ បញ្ជាក់ថា ក្រសួងនឹងរៀបចំទីក្រុងបែបនគរូបនីយកម្ម មានន័យថាទីក្រុងទាំងអស់នឹងក្លាយជាទីក្រុងអភិវឌ្ឍន៍។ រីឯទាក់ទិននឹងការងារចុះបញ្ជីដីធ្លី ឯកឧត្តមឧបនាយករដ្ឋមន្ត្រី បានឱ្យដឹងថា ការចុះបញ្ជីដីធ្លីទទួលបានការសម្របសម្រួលពីក្រសួងសេដ្ឋកិច្ច និងហិរញ្ញវត្ថុនូវថវិកាចំនួន ១៨ ដុល្លារ ក្នុងមួយបណ្ណ ដូច្នេះឯកឧត្តមសង្ឃឹមថាធនាគារអភិវឌ្ឍន៍អាស៊ី (ADB) នឹងអាចពិចារណាក្នុងការចូលរួមចំណែកក្នុងការងារចុះបញ្ជីដីធ្លីឱ្យបានចប់សព្វគ្រប់នៅទូទាំងប្រទេស ពីព្រោះការចុះបញ្ជីដីធ្លីគឺមានសារសំខាន់ណាស់ក្នុងការបញ្ចប់វិវាទដីធ្លី ក៏ដូចជាអភិវឌ្ឍន៍សេដ្ឋកិច្ចក្នុងប្រទេសកម្ពុជាផងដែរ។

នេះជាការថ្លែងរបស់ ឯកឧត្តមឧបនាយករដ្ឋមន្ត្រី ក្នុងជំនួបពិភាក្សាការងារជាមួយតំណាងធនាគារអភិវឌ្ឍន៍អាស៊ី (ADB) នៅទីស្ដីការក្រសួងនាព្រឹកថ្ងៃទី២៩ ខែមករាឆ្នាំ ២០២៤ ។

ជាការឆ្លើយតប តំណាង ADB បានឱ្យដឹងថា ADB ផ្ដោតលើគម្រោងពីរចំណុចគឺ ទី១ សំណើដែលក្រសួងរៀបចំដែនដី នគរូបនីយកម្ម និងសំណង់ បានស្នើពាក់ព័ន្ធនឹងជំនួយបច្ចេកទេសក្នុងការរៀបចំផែនការសម្រាប់ប៉ូលសេដ្ឋកិច្ចនៅក្នុងព្រះរាជាណាចក្រកម្ពុជា ថាតើគួរមានវិធានការយ៉ាងណាខ្លះបន្តទៀតសម្រាប់ជំរុញឱ្យគម្រោងបានដំណើរការទៅមុខ និងទី២ ទាក់ទងនឹងការចូលរួមរបស់ ADB ក្នុងផែនការអភិវឌ្ឍន៍តំបន់ឆ្នេរ ក្នុងនោះដែរតំណាង ADB បានស្នើសុំឱ្យក្រសួងផ្ដល់កិច្ចសហការគាំទ្រដល់ ADB បន្ថែមទៀតចំពោះកិច្ចការនេះ។

ឯកឧត្តមឧបនាយករដ្ឋមន្ត្រី សាយ សំអាល់ យល់ឃើញថាប្រជាពលរដ្ឋកម្ពុជាគ្រប់រូបគួរតែទទួលបានលំនៅឋានរស់នៅសមរម្យ មានប្រាក់ចំណូលសមរម្យសម្រាប់ផ្គត់ផ្គង់ជីវភាព មានអាហារហូបចុកគ្រប់គ្រាន់ មានបរិយាកាសរស់នៅជុំវិញល្អស្អាត និងទទួលបានការសិក្សាអប់រំគ្រប់ៗគ្នា។ ឯកឧត្តមឧបនាយករដ្ឋមន្ត្រី សង្ឃឹមថា នៅឆ្នាំ២០៣០ និងឆ្នាំ២០៥០ ខាងមុខ ចំនួនប្រជាជនកម្ពុជានឹងអាចកើនឡើងដល់ ៣០លាននាក់ដើម្បីរួមគ្នាសម្រេចឱ្យបាននូវគោលដៅអភិវឌ្ឍន៍របស់រាជរដ្ឋាភិបាល៕