ក្រសួងរៀបចំដែនដី នគរូបនីយកម្ម និងសំណង់ បើកកិច្ចប្រជុំអន្តរក្រសួង ដើម្បីពិនិត្យវាយតម្លៃជាបឋមទៅលើការជ្រើសរើសទីតាំងសម្រាប់រៀបចំលំនៅឋានជូនកងទ័ពនិងប្រជាពលរដ្ឋភៀសសឹកនៅតាមបណ្ដោយព្រំដែន

(ភ្នំពេញ)៖ ក្រសួងរៀបចំដែនដី នគរូបនីយកម្ម និងសំណង់ បានបើកកិច្ចប្រជុំអន្តរក្រសួង ដើម្បីពិនិត្យវាយតម្លៃជាបឋមទៅលើការជ្រើសរើសទីតាំងសម្រាប់រៀបចំលំនៅឋានជូនកងទ័ពនិងប្រជាពលរដ្ឋភៀសសឹកនៅតាមបណ្ដោយព្រំដែន ដោយភ្ជាប់ជាមួយការធ្វើសមាហរណកម្ម ទៅនឹងភូមិចាស់ដែលនៅជុំវិញនោះ លើគ្រប់ហេដ្ឋារចនាសម្ព័ន្ធឱ្យមានភាពប្រទាក់ក្រឡាគ្នា ជាប្រយោជន៍បម្រើដល់វិស័យកសិកម្មដើម្បីកសាងជីវភាពរស់នៅរបស់ប្រជាពលរដ្ឋឱ្យប្រសើរឡើង ដោយភ្ជាប់ជាមួយការសាងសង់លេណដ្ឋាននៅតាមលំនៅឋាន ឬសាលារៀនជាដើម ដើម្បីរក្សាសុវត្ថិភាពផងដែរ។

កិច្ចប្រជុំអន្តរក្រសួង ស្ដីពីការជ្រើសរើសទីតាំងក្នុងការរៀបចំផ្ទះកងទ័ពតាមបណ្ដោយព្រំដែន ដែលបានធ្វើឡើងនៅទីស្ដីការក្រសួង នារសៀលថ្ងៃទី២៦ ខែមករា ឆ្នាំ២០២៦។ កិច្ចប្រជុំនេះមានការអញ្ជើញចូលរួមដោយផ្ទាល់ពីឯកឧត្តមនាយឧត្តមសេនីយ៍ គន់ គីម ទេសរដ្ឋមន្ត្រីទទួលបន្ទុកបេសកកម្មពិសេស អនុប្រធាននិងជាអគ្គលេខាធិការសមាគមអតីតយុទ្ធជនកម្ពុជា និងតំណាងក្រសួងសេដ្ឋកិច្ច និងហិរញ្ញវត្ថុ ព្រមទាំងចូលរួមតាមរយៈប្រព័ន្ធអនឡាញពីរដ្ឋបាលខេត្ត និងមន្ទីររៀបចំដែនដី នគរូបនីយកម្ម សំណង់និងសុរិយោដីទាំង៥ខេត្ត រួមមានខេត្តបាត់ដំបង បន្ទាយមានជ័យ ពោធិសាត់ ឧត្តរមានជ័យ និងព្រះវិហារ ផងដែរ។

ឆ្លៀតក្នុងឱកាសនោះ ឯកឧត្តមឧបនាយករដ្ឋមន្ត្រី សាយ សំអាល់ បានឱ្យដឹងថា ការជួបជុំគ្នានាពេលនេះគឺដើម្បីប្រមូលមតិយោបល់បន្ថែមពីអន្តរក្រសួងពាក់ព័ន្ធ, ទៅលើអ្វីដែលយើងបានវាយតម្លៃជាបឋមលើការជ្រើសរើសទីតាំងសម្រាប់រៀបចំលំនៅឋានកងទ័ពនិងប្រជាពលរដ្ឋភៀសសឹកចំនួន ៣ក្រុមគឺ៖ ក្រុមទី១ ជាប្រជាពលរដ្ឋដែលបានភៀសសឹកកាលពីពេលកន្លងមកដែលមិនអាចវិលត្រឡប់ទៅរកលំនៅឋានរបស់ខ្លួនវិញបាន ហើយអាចទៅកាន់ទីតាំងមានសុវត្ថិភាពថ្មីដែលរាជរដ្ឋាភិបាលបានរៀបចំជូន , ក្រុមទី២ គឺជាក្រុមដែលរង់ចាំពេលវេលាណាមួយសមស្របអាចវិលត្រឡប់ទៅរកលំនៅដ្ឋានរបស់ខ្លួនវិញបាន,និង ក្រុមទី៣ គឺជាក្រុមដែលកំពុងស្នាក់នៅមណ្ឌលសុវត្ថិភាពបណ្ដោះអាសន្នក្នុងរយះពេលខ្លីជាងក្រុមទី២។

ឯកឧត្តមឧបនាយករដ្ឋមន្ត្រី បានបញ្ជាក់ថា ក្រុមការងារអន្តរក្រសួងបានដឹងពីទីតាំងដែលបានជ្រើសរើសទាំងនេះរួចមកហើយ និងបានចូលរួមក្នុងការស្វែងរកនិងកំណត់ជាបឋមនូវទីតាំងមួយចំនួននៅតាមបណ្ដោយព្រំដែន ដូច្នេះឯកឧត្តមឧបនាយករដ្ឋមន្ត្រី ក៏បានស្នើសុំមតិយោបល់បន្ថែមទៀតពីអន្តរក្រសួងដើម្បីពិនិត្យមើលថាតើទីតាំងដែលបានជ្រើសរើសទាំងនេះសមស្របក្នុងការរៀបចំជូនដល់ប្រជាពលរដ្ឋភៀសសឹក ឬយ៉ាងណា ។

ឯកឧត្តមឧបនាយករដ្ឋមន្ត្រី បានបន្ថែមថា ការងារបន្ទាប់ដែលត្រូវធ្វើនោះគឺត្រូវកំណត់អំពីសុវត្ថិភាពសុរិយោដីមានន័យថា ជាដីដែលមិនមានពាក់ព័ន្ធកម្មសិទ្ធិរបស់ជនណាម្នាក់ឡើយ,ហើយក្រុមការងាររៀបចំដែនដី នគរូបនីយកម្ម ត្រូវមានភារកិច្ចគូសប្លង់ធ្វើយ៉ាងណាឱ្យទីតាំងថ្មីដែលរាជរដ្ឋាភិបាលបានរៀបចំលំនៅឋានជូនប្រជាពលរដ្ឋភៀសសឹកនេះមានការធ្វើសមាហរណកម្មទៅនឹងភូមិចាស់ដែលនៅជុំវិញនោះ លើគ្រប់ហេដ្ឋារចនាសម្ព័ន្ធដូចជា ផ្លូវថ្នល់, ទឹកស្អាតនិងអគ្គិសនីជាដើម ឱ្យមានភាពប្រទាក់ក្រឡាគ្នា ជាប្រយោជន៍បម្រើដល់វិស័យកសិកម្មដើម្បីកសាងជីវភាពរស់នៅរបស់ប្រជាពលរដ្ឋ ក្នុងនោះក៏ត្រូវគិតគូរអំពីការសាងសង់សំណង់រឹងមាំប្រកបដោយនវានុវត្តន៍ដែលអាចប្រើប្រាស់បានច្រើនយ៉ាង, ដោយភ្ជាប់ជាមួយការសាងសង់លេណដ្ឋាននៅតាមទីតាំងផ្សេងៗដូចជាលំនៅឋាន ឬសាលារៀនជាដើម ដើម្បីរក្សាសុវត្ថិភាពផងដែរ៕