ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ ថ្លែងថា លំនៅឋានមិនគ្រាន់តែជាលំនៅឋានទេ តែជាការកសាងជីវិតនៅក្នុងផ្ទះនោះសម្រាប់ប្រជាជនគ្រប់រូប ហើយការកសាងលំនៅឋាន និងការអភិវឌ្ឍសហគមន៍តំបន់ឆ្នេរ ត្រូវគិតគូរពីសុខុមាលភាព និងជីវភាពរស់នៅប្រកបដោយចីរភាព

(ភ្នំពេញ)៖ ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ បានគូសបញ្ជាក់ថា ការរៀបចំនិងអភិវឌ្ឍលំនៅឋានជូនប្រជាពលរដ្ឋ មិនមែនគ្រាន់តែជាការសាងសង់សំណង់រឹងមាំសម្រាប់ជ្រកកោនប៉ុណ្ណោះទេ ប៉ុន្តែត្រូវធានាឱ្យបាននូវការកសាងជីវភាពរស់នៅដ៏សុខដុមរមនា សមាហរណកម្ម និងភាពធន់នៅក្នុងសហគមន៍ផ្ទាល់។ 

ក្នុងពេលបើកសិក្ខាសាលាពិគ្រោះយោបល់ថ្នាក់ជាតិលើសេចក្តីព្រាងឯកសារស្ដីពីគម្រោងកែលម្អការតាំងទីលំនៅរបស់សហគមន៍ប្រកបដោយសមាហរណកម្ម និងភាពធន់ តាមបណ្ដាខេត្តក្នុងតំបន់ឆ្នេរសមុទ្រនៃព្រះរាជាណាចក្រកម្ពុជា ដែលបានធ្វើឡើងនៅទីស្ដីការក្រសួង នាព្រឹកថ្ងៃទី ២៨ ខែតុលា ឆ្នាំ ២០២៦។

ឯកឧត្តមឧបនាយករដ្ឋមន្ត្រី សាយ សំអាល់ បានគូសបញ្ជាក់ថា ការរៀបចំនិងអភិវឌ្ឍលំនៅឋានជូនប្រជាពលរដ្ឋ មិនមែនគ្រាន់តែជាការសាងសង់សំណង់រឹងមាំសម្រាប់ជ្រកកោនប៉ុណ្ណោះទេ ប៉ុន្តែត្រូវធានាឱ្យបាននូវការកសាងជីវភាពរស់នៅដ៏សុខដុមរមនា សមាហរណកម្ម និងភាពធន់នៅក្នុងសហគមន៍ផ្ទាល់។ 

ឯកឧត្តមឧបនាយករដ្ឋមន្ត្រី បានដាក់ចេញនូវគោលការណ៍យុទ្ធសាស្ត្រគន្លឹះមួយចំនួន សម្រាប់ជាផែនទីបង្ហាញផ្លូវក្នុងការអភិវឌ្ឍភូមិឋាន និងសហគមន៍មូលដ្ឋាន រួមមាន៖
– ការអភិវឌ្ឍជនបទនិងសហគមន៍៖ ត្រូវធានាឱ្យរាល់ភូមិឋានមានប្រព័ន្ធទឹកស្អាត ភ្លើងអគ្គិសនី ផ្លូវថ្នល់ និងសាលារៀនសម្រាប់កូនចៅប្រជាពលរដ្ឋទទួលបានការអប់រំ ព្រមទាំងបង្កើតបរិយាកាសដែលជួយឱ្យប្រជាពលរដ្ឋមានភាពកក់ក្តៅ និងមានទំនុកចិត្តលើសុវត្ថិភាពសង្គម។
– ការលើកកម្ពស់សុខុមាលភាព៖ យកចិត្តទុកដាក់ខ្ពស់លើសុខភាពអនាម័យ និងការរស់នៅប្រកបដោយផាសុកភាព ដើម្បីឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋ។
– ការកសាងសេដ្ឋកិច្ចមូលដ្ឋាន៖ ផ្តោតសំខាន់លើការបង្កើតមុខរបរ និងការបង្កើនប្រាក់ចំណូល ដើម្បីឱ្យប្រជាពលរដ្ឋអាចពឹងផ្អែកលើខ្លួនឯងបានប្រកបដោយចីរភាពក្នុងរយៈពេលវែង។ 

ជាមួយនេះ ឯកឧត្តមឧបនាយករដ្ឋមន្ត្រី ក៏បានអំពាវនាវដល់គ្រប់ភាគីពាក់ព័ន្ធទាំងអស់ ឱ្យបន្តពង្រឹងកិច្ចសហការគ្នាយ៉ាងជិតស្និទ្ធ បន្តជំរុញការអនុវត្តគម្រោងអភិវឌ្ឍន៍ទាំងនេះឱ្យកាន់តែមានប្រសិទ្ធភាពខ្ពស់ ដើម្បីលើកស្ទួយជីវភាព និងគុណភាពនៃការរស់នៅរបស់ប្រជាពលរដ្ឋក្នុងតំបន់ឆ្នេរសមុទ្រកម្ពុជា ឱ្យកាន់តែប្រសើរឡើង។

គួរកត់សម្គាល់ថា បន្ទាប់ពីការចុះបញ្ជីដីបង្ហើយ និងការបង្កើតបរិយាកាសគ្មានវិវាទរួចមក ក្រសួងរៀបចំដែនដី នគរូបនីយកម្ម និងសំណង់ បាននឹងកំពុងផ្តោតការយកចិត្តទុកដាក់លើកិច្ចការលំនៅឋាន និងការងារសម្បទានដើម្បីសង្គម និងសេដ្ឋកិច្ច ដោយបានដាក់ចេញនូវគោលការណ៍ ចំនួន ៣ ជាផែនទីអនុវត្តការងារ រួមមាន៖ បុរីជនបទ ភូមិឋានក្សេមក្សាន្ត និងទ្រនំសុភមង្គល ដើម្បីបង្កលក្ខណៈឱ្យប្រជាជនខ្មែរគ្រប់រូបមានផ្ទះសម្បែងរស់នៅសមរម្យ ជាទ្រនំសុភមង្គល។

ក្រសួងរៀបចំដែនដី នគរូបនីយកម្មនិងសំណង់សូមស្វាគមន៍ចំពោះកិច្ចសហការពីគ្រប់ក្រសួង ស្ថាប័នពាក់ព័ន្ធ រដ្ឋបាលមូលដ្ឋាន និងអង្គការ ដៃគូអភិវឌ្ឍនានា ក្នុងការចូលរួមជាមួយគ្នាដើម្បីជួយប្រជាជនកម្ពុជាឱ្យមានជីវភាពប្រសើរឡើងមួយកម្រិតទៀត ពិសេសប្រជាពលរដ្ឋដែលរស់នៅក្នុងសំណង់មិនរៀបរយ ជាក់ស្តែងបងប្អូននៅក្នុងសំណង់មិនរៀបរយនៅខេត្តកែប។ ពីនេះទៅមុខ សូមផ្តោតការគិតគូរលើការកសាងខឿនសេដ្ឋកិច្ចនៅនឹងមូលដ្ឋាន ហើយអន្តរាគមន៍ជួយប្រជាជនយើងឱ្យចំកន្លែង និងចំគោលដៅ ដែលក្រៅពីដី និងផ្ទះ យើងត្រូវគាំទ្រហេដ្ឋារចនាសម្ព័ន្ធចាំបាច់ផ្សេងទៀតដែលអាចធ្វើឱ្យប្រជាជនមានចំណូល បន្ថយបំណុល មានជីវភាពប្រសើរឡើង ព្រមទាំងចូលរួមកសាងជីវិតមនុស្សតាមរយៈការគិតគូរឱ្យមានអាហារហូបចុកគ្រប់គ្រាន់ធ្វើឱ្យសុខភាពរឹងមាំ ជាការកសាងធនធានមនុស្សសម្រាប់ជាតិ។

សូមជម្រាបជូនថាថា សិក្ខាសាលាពិគ្រោះយោបល់ថ្នាក់ជាតិនាពេលនេះ មានការចូលរួមពីក្រសួងសេដ្ឋកិច្ច និងហិរញ្ញវត្ថុ ក្រសួងបរិស្ថាន ក្រសួងកសិកម្ម និងរុក្ខាប្រមាញ់និងនេសាទ ក្រសួងអភិវឌ្ឍន៍ជនបទ គណៈកម្មធិការជាតិគ្រប់គ្រងគ្រោះមហន្ដរាយ អាជ្ញាធរថ្នាក់ក្រោមជាតិ តំណាងស្ថានទូតចិនប្រចាំកម្ពុជា ដៃគូអភិវឌ្ឍ និងអង្គការមិនមែនរដ្ឋាភិបាល  តំណាង World Bank, តំណាង JICA, តំណាង KOICA, តំណាង UNDP ប្រធានអង្គការ UN-Habitat និងនាយកប្រចាំប្រទេសនៃអង្គការ HFHC៕