ឯកឧត្តមឧបនាយករដ្ឋមន្ត្រី សាយ សំអាល់ ជំរុញដល់យុវជនស្ថាបត្យករជំនាន់ថ្មី ឱ្យយកចិត្តទុកដាក់ខ្ពស់លើយុទ្ធសាស្ត្រអភិវឌ្ឍន៍ទីក្រុងផ្សារភ្ជាប់អត្តសញ្ញាណជាតិ

(ភ្នំពេញ)៖ ឯកឧត្តមឧបនាយករដ្ឋមន្ត្រី សាយ សំអាល់ បានសង្កត់ធ្ងន់ថា វប្បធម៌ និងប្រពៃណី គឺជាឫសគល់ដ៏រឹងមាំ និងជាអត្តសញ្ញាណដ៏ល្អប្រពៃរបស់ជាតិ ដែលយើងគ្រប់គ្នាត្រូវតែចងចាំ និងថែរក្សា ដូច្នេះ ក្រុមស្ថាបត្យករទាំងអស់ ត្រូវយកចិត្តទុកដាក់បញ្ចូលនូវលក្ខណៈសម្បត្តិវប្បធម៌ និងរចនាបថខ្មែរទៅក្នុងគ្រប់គម្រោងអភិវឌ្ឍន៍នានា ដើម្បីធានាថាការរីកចម្រើនថ្មីៗមិនត្រូវបាត់បង់នូវតម្លៃប្រវត្តិសាស្ត្ររបស់ជាតិនោះឡើយ។ 

ក្នុងពិធីចែកពានរង្វាន់ប្រកួតប្រជែងស្នាដៃរៀបចំឧទ្យានកោះនរា ក្រោមប្រធានបទ ” បេះដូងរាជធានី ” នាព្រឹកថ្ងៃទី៦ ខែវិច្ឆិកា ឆ្នាំ២០២៦ នៅទីស្តីការក្រសួង។

ឯកឧត្ដមឧបនាយករដ្ឋមន្ត្រី សាយ សំអាល់ បានអបអរសាទរ កោតសរសើរ និងវាយតម្លៃខ្ពស់ចំពោះស្ថាបត្យករជំនាន់ថ្មីទាំងអស់ ដែលបានចូលរួមយ៉ាងសកម្មក្នុងយុទ្ធនាការប្រកួតប្រជែងស្នាដៃនេះ។ ការប្រកួតប្រជែងនេះ គឺជាយុទ្ធសាស្ត្រធ្វើឱ្យមានបម្រែបម្រួលជាវិជ្ជមាននិងការច្នៃប្រឌិតទំព័រថ្មីនៃសង្គមជាតិយើង ព្រោះវាជាការបើកឱកាសឱ្យយុវជនបង្ហាញពីសមត្ថភាព និងគំនិតច្នៃប្រឌិតក្នុងការអភិវឌ្ឍទីក្រុង។  

ឯកឧត្តមរដ្ឋមន្ត្រី បានគូសបញ្ជាក់ថា ការរៀបចំផែនការអភិវឌ្ឍន៍ទីក្រុងត្រូវតែធ្វើឡើងដោយមានការគិតគូរឱ្យបានស៊ីជម្រៅ វែងឆ្ងាយ និងមានប្រព័ន្ធច្បាស់លាស់ ដោយត្រូវផ្សារភ្ជាប់គ្នារវាងការរីកចម្រើនផ្នែកហេដ្ឋារចនាសម្ព័ន្ធ និងសុខុមាលភាពរបស់ប្រជាពលរដ្ឋ។ ការអភិវឌ្ឍទីក្រុងត្រូវប្រកាន់ខ្ជាប់នូវភាពជាម្ចាស់ការ និងការច្នៃប្រឌិតខ្ពស់ ដោយទាញយកសក្តានុពលដែលមានស្រាប់ក្នុងស្រុកមកអភិវឌ្ឍឱ្យអស់លទ្ធភាព។ ឯកឧត្តមឧបនាយករដ្ឋមន្ត្រី បានបញ្ជាក់ពីសារៈសំខាន់នៃការច្នៃប្រឌិត និងការចូលរួមយ៉ាងផុសផុលរបស់ក្រុមយុវជនជំនាន់ថ្មី ក្នុងការផ្ដល់នូវគំនិតផ្ដួចផ្ដើម និងទស្សនវិស័យថ្មីៗលើការរៀបចំផែនការមេ ស្ថាបត្យកម្ម និងការអភិវឌ្ឍទីធ្លាសាធារណៈនៅកម្ពុជា និងបានកោតសរសើរ វាយតម្លៃខ្ពស់ចំពោះការខិតខំប្រឹងប្រែងរបស់ក្រុមនីមួយៗ ដែលបានយកចិត្តទុកដាក់ស្រាវជ្រាវ និងចងក្រងជាគម្រោងប្លង់ស្ថាបត្យកម្មដ៏មានតម្លៃសម្រាប់បម្រើឱ្យផលប្រយោជន៍សាធារណៈ។  ការប្រកួតប្រជែងស្នាដៃនេះ មិនមែនជាការប្រកួតប្រជែងដើម្បីស្វែងរកអ្នកឈ្នះ ឬអ្នកចាញ់នោះឡើយ ប៉ុន្តែជ័យលាភីពិតប្រាកដគឺ «សង្គមជាតិខ្មែរទាំងមូល» ដែលទទួលបាននូវគំនិតថ្មីៗ វប្បធម៌នៃការគូសវាសរួមគ្នា និងការបម្រែបម្រួលជាវិជ្ជមានសម្រាប់សង្គមជាតិយើង។

ទន្ទឹមនេះ ឯកឧត្តមឧបនាយករដ្ឋមន្ត្រី សាយ សំអាល់ បានលើកទឹកចិត្តដល់យុវជនស្ថាបត្យករទាំងអស់ ឱ្យបន្តខិតខំប្រឹងប្រែងអភិវឌ្ឍសមត្ថភាពបន្ថែមទៀត និងរក្សាស្មារតីនៃការអភិវឌ្ឍសមូហភាព គិតគូរឱ្យបានស៊ីជម្រៅពីបរិបទវប្បធម៌ សេដ្ឋកិច្ច និងសុខុមាលភាពប្រជាពលរដ្ឋ ដើម្បីរួមគ្នាកសាង និងអភិវឌ្ឍរាជធានីភ្នំពេញ ក៏ដូចជាប្រទេសកម្ពុជាឱ្យកាន់តែមានសោភណភាព បៃតង គួរឱ្យរស់នៅ និងកាន់តែរីកចម្រើនរុងរឿងប្រកបដោយចីរភាព។

សូមជម្រាបជូនថា ក្រុមហ៊ុន OCIC ជាក្រុមហ៊ុនធំមួយរបស់កម្ពុជាដែលបានវិនិយោគលើអចលនទ្រព្យច្រើន ហើយក្រុមហ៊ុនបានផ្តួចផ្តើមរគំនិតជាមួយនឹងក្រសួងរៀបចំដែនដី នគរូបនីយកម្ម និងសំណង់ ដើម្បីដាក់ឱ្យមានការប្រកួតប្រជែងលើកិច្ចការស្ថាបត្យកម្មទៅតាមតំបន់អភិវឌ្ឍរបស់ក្រុមហ៊ុន ជាពិសេសនៅកោះនរា ដើម្បីបានធាតុចូលពីសំណាក់ប្រជាជនខ្មែរផង និងក៍ដើម្បីបណ្តុះបណ្តាលធនធានស្ថាបត្យករ និងអ្នករៀបចំខ្មែរផង៕