ក្រសួងរៀបចំដែនដី នគរូបនីយកម្មនិងសំណង់, ក្រសួងធនធានទឹកនិងឧតុនិយម និងអាជ្ញាធរទន្លេសាប ព្រមទាំងក្រសួងពាក់ព័ន្ធ, ប្រជុំពិភាក្សាស្វែងរកការឯកភាពរួមគ្នាលើការរៀបចំប្លង់គោលប្រើប្រាស់ដីក្នុងតំបន់បឹងទន្លេសាប និងបង្កើតខឿនសេដ្ឋកិច្ចក្នុងតំបន់នេះ។

ក្នុងកិច្ចប្រជុំពិភាក្សាលើការរៀបចំប្លង់គោលប្រើប្រាស់ដីក្នុងតំបន់បឹងទន្លេសាប ដែលបានធ្វើឡើងនៅទីស្ដីការក្រសួង នាថ្ងៃទី 3 ខែវិច្ឆិកា ឆ្នាំ 2025 ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់ បានអោយដឹងថា ការជួបជុំគ្នានាពេលនេះគឺដើម្បីកសាងការឯកភាពរួមគ្នាសម្រេចចិត្តនិងទទួលខុសត្រូវឲ្យបានច្បាស់លាស់ក្នុងការកំណត់បែងចែកតំបន់នីមួយៗក្នុងតំបន់បឹងទន្លេសាប, រៀបចំប្លង់គោលនៃការប្រើប្រាស់ដីក្នុងតំបន់នេះ ព្រមទាំងកសាងផែនការនៃការអនុវត្តប្លង់គោលផងដែរ។ ឯកឧត្តមឧបនាយករដ្ឋមន្ត្រីយល់ឃើញថា តាមរយៈកិច្ចប្រជុំនាពេលនេះយើងនឹងមានមូលដ្ឋានដ៏សំខាន់មួយសម្រាប់យើងបោះជំហានទៅមុខ នោះគឺការឯកភាពគ្នា លើផែនការកសាងខឿនសេដ្ឋកិច្ចតំន់បឹងទន្លេសាប អោយក្លាយជា របៀងសេដ្ឋកិច្ច ដើម្បីសន្តិសុខស្បៀង និងសុវត្តភាពម្ហូនអាហារ សម្រាប់កម្ពុជានាពេលអនាគត់ ។

ឯកឧត្តមឧបនាយករដ្ឋមន្ត្រីបានបញ្ជាក់ថា អ្វីដែលបានឯកភាពគ្នាក្នុងកិច្ចប្រជុំនាពេលនេះគឺជាជំហានទី1, ដោយឡែកជំហានទី 2 ក្រុមការងារនឹងចុះទៅពិនិត្យមើលអោយបានច្បាស់លាស់នៅទីតាំងជាក់ស្តែង ហើយនឹងរៀបចំប្លង់គោលនៃការប្រើប្រាស់ដីក្នុងតំបន់បឹងទន្លេសាប, និងត្រូវធ្វើសៀវភៅ”ស” សំរាប់កំណត់គោលដៅអភិវឌ្ឍន៍នៅតាមភូមិឃុំក្នុងបណ្ដាខេត្តនិមួយៗជុំវិញបឹងទន្លេសាប។

ជាមួយនេះ ឯកឧត្តមឧបនាយករដ្ឋមន្ត្រី សាយ សំអាល់ បានសន្យានឹងបន្តជជែកពិភាក្សាជាមួយក្រសួងពាក់ព័ន្ធ ព្រមទាំងអាជ្ញាធរទន្លេសាប នាពេលក្រោយជាបន្តបន្ទាប់ទៀតដើម្បីកំណត់នូវអ្វីដែលជាខឿនសេដ្ឋកិច្ចជាយុទ្ធសាស្ត្រ ដោយបង្កើតឲ្យបាននូវលំហូរចំណូលសេដ្ឋកិច្ចនៅក្នុងតំបន់បឹងទន្លេសាប។