ក្រសួងរៀបចំដែនដី នគរូបនីយកម្ម និងសំណង់ សហការជាមួយធនាគារអភិវឌ្ឍន៍អាស៊ី ADB រៀបចំសិក្ខាសាលាផ្សព្វផ្សាយគោលការណ៍ណែនាំជូនដល់រដ្ឋបាលថ្នាក់ក្រោមជាតិ ដើម្បីឱ្យមានការឯកភាពគ្នាចូលរួមក្នុងការរៀបចំដែនដីនិងនគរូបនីយកម្មទូទាំងប្រទេស

(ភ្នំពេញ)៖ ដើម្បីបង្កើនប្រសិទ្ធភាព និងពន្លឿនការងារនៃការរៀបចំប្លង់គោលនៃការប្រើប្រាស់ដី នាព្រឹកថ្ងៃទី១៨ ខែធ្នូ ឆ្នាំ២០២៥ ក្រសួងរៀបចំដែនដី នគរូបនីយកម្ម និងសំណង់ និងធនាគារអភិវឌ្ឍន៍អាស៊ី (ADB) បានសហការគ្នារៀបចំសិក្ខាសាលាចុងក្រោយ ”ការពិនិត្យលើសៀវភៅណែនាំស្ដីពីការរៀបចំផែនការរូបវន្ត និងក្របខណ្ឌគតិយុត្ត” ដើម្បីផ្សព្វផ្សាយនូវគោលការណ៍ណែនាំជូនដល់រដ្ឋបាលថ្នាក់ក្រោមជាតិ សំដៅឱ្យមានការឯកភាពគ្នាចូលរួមក្នុងការរៀបចំដែនដី និងនគរូបនីយកម្មទូទាំងប្រទេស ដែលនេះគឺសម្រាប់ឧត្តមប្រយោជន៍របស់រដ្ឋបាលថ្នាក់ក្រោមជាតិរៀងៗខ្លួន។

ក្នុងពេលបើកសិក្ខាសាលានេះ ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់ បានចាត់ទុកថា នេះគឺជាការបោះជំហានថ្មីមួយទៀតដ៏មានសារៈសំខាន់ ហើយក៏ជាការបោះជំហានជាយុទ្ធសាស្ត្ររបស់ក្រសួងរៀបចំដែនដី នគរូបនីយកម្ម និងសំណង់ ដោយក្រសួងបានដាក់ចេញនូវគោលនយោបាយយុទ្ធសាស្ត្រ និងបានប្រែក្លាយគោលនយោបាយនេះទៅជាលទ្ធផលដែលបានបង្ហាញក្នុងសិក្ខាសាលានាពេលនេះក្រោមកិច្ចសហការជាមួយធនាគារអភិវឌ្ឍន៍អាស៊ី ADB។ ឯកឧត្តមឧបនាយករដ្ឋមន្ត្រី បានលើកឡើងថា នៅដើមអាណត្តិទី៧ នេះ ក្នុងកិច្ចដំណើរការរបស់ក្រសួង ឯកឧត្តមឧបនាយករដ្ឋមន្ត្រី បានចាប់ផ្ដើមគោលនយោបាយពូនជ្រុំរដ្ឋបាលសាធារណៈទំនើបឱ្យមានភាពវាងវៃ ឆ្លាតវៃ, បញ្ចប់ភាពចម្រូងចម្រាស់នៅក្នុងសង្គមជាតិ បង្កើតបរិយាកាសគ្មានវិវាទតាមរយៈការចុះបញ្ជីដីធ្លីបង្ហើយ, ការដោះស្រាយវិវាទដីធ្លី, ការដោះស្រាយបញ្ហាបុរី, ផ្តល់សេវាគាប់ចិត្តជូនប្រជាពលរដ្ឋ និង រៀបចំលក្ខខណ្ឌនៃការប្រើប្រាស់ដីសម្រាប់តំបន់បេតិកភណ្ឌពិភពលោកអង្គរ និងតំបន់ទន្លេសាប, ព្រមទាំងបានបន្តអនុវត្តកិច្ចការផ្សេងៗជាច្រើនទៀតសម្រាប់បង្កើតដង្ហើមសេដ្ឋកិច្ច ក្នុងគោលដៅធ្វើយ៉ាងណារៀបចំប្រទេសជាតិឱ្យបានល្អដើម្បីកម្ពុជាអាចរស់បានដោយខ្លួនឯង, រស់ជារៀងរហូតនិងតជំនាន់។

ឯកឧត្តមឧបនាយករដ្ឋមន្ត្រី សាយ សំអាល់ បញ្ជាក់ថា ការផ្សព្វផ្សាយសៀវភៅណែនាំស្ដីពីការរៀបចំផែនការរៀបចំដែនដីថ្នាក់ខេត្តនិងសៀវភៅណែនាំស្ដីពីការរៀបចំប្លង់គោលប្រើប្រាស់ដីរាជធានីក្រុងស្រុកខណ្ឌ គឺពិតជាមានសារៈប្រយោជន៍សម្រាប់រដ្ឋបាលថ្នាក់ក្រោមជាតិ ដើម្បីបង្កើនប្រសិទ្ធភាពនិងពន្លឿនការងារនៃការរៀបចំប្លង់គោលប្រើប្រាស់ដីនៅទូទាំងប្រទេស សំដៅជំរុញការអភិវឌ្ឍន៍ប្រទេសជាតិឱ្យរីកចម្រើននិងប្រែក្លាយជាភូមិឋានក្សេមក្សាន្តសម្រាប់ប្រជាពលរដ្ឋរស់នៅប្រកបដោយសេចក្តីសុខ សុភមង្គល មានជីវភាពល្អប្រសើរ មានសុវត្ថិភាព និងភាពកក់ក្តៅ៕