ឯកឧត្តមឧបនាយករដ្ឋមន្ត្រី សាយ សំអាល់បញ្ជាក់ថា ការកសាងខឿនទេសចរណ៍សម្រាប់ខេត្តកែបគឺផ្ដើមចេញពីសហគមន៍ ដែលធ្វើឱ្យប្រាក់ចំណូលរបស់គ្រួសារមានការកើនឡើង, ប្រាក់សន្សំកើនឡើងនិងបំណុលគ្រួសារធ្លាក់ចុះ ហើយ ទឹក ភ្លើង ផ្លូវ និងភូមិឃុំសង្កាត់មានសុវត្ថិភាព គឺជាការវិនិយោគសម្រាប់សេដ្ឋកិច្ចខេត្តកែប

(កែប)៖ ឯកឧត្តមឧបនាយករដ្ឋមន្ត្រី សាយ សំអាល់ ក្នុងនាមជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកែប បានបញ្ជាក់ថា ការកសាងខឿនទេសចរណ៍សម្រាប់ខេត្តកែបគឺផ្ដើមចេញពីសហគមន៍ ដែលធ្វើឱ្យប្រាក់ចំណូលរបស់គ្រួសារមានការកើនឡើង ប្រាក់សន្សំកើនឡើងនិងបំណុលគ្រួសារធ្លាក់ចុះ ហើយ ទឹក ភ្លើង ផ្លូវ និងភូមិឃុំសង្កាត់មានសុវត្ថិភាពគឺជាការវិនិយោគសម្រាប់សេដ្ឋកិច្ចខេត្តកែប។

ថ្លែងក្នុងពិធីបិទសន្និបាតបូកសរុបលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦ របស់រដ្ឋបាលខេត្តកែប នាថ្ងៃទី ៣០ ខែមករា ឆ្នាំ ២០២៦។

ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកែប បានកត់សំគាល់ថា ក្រុមការងារទាំងអស់គប្បីមានមោទនភាពចំពោះខ្លួនឯងដែលបានបំពេញតួនាទីភារកិច្ចចូលរួមយ៉ាងសកម្មក្នុងការងារកសាងជាតិមាតុភូមិអោយបានរឹងមាំ។ ឯកឧត្តមឧបនាយករដ្ឋមន្ត្រី បានចាត់ទុកលទ្ធផលការងារដែលរដ្ឋបាលខេត្តកែបសម្រេចបាន ថាជាដំណើរដ៏ត្រឹមត្រូវសម្រាប់ខេត្ត និងបានស្នើឱ្យមានការឯកភាពគ្នារវាងកងនគរបាល កងរាជអាវុធហត្ថនិងមន្ត្រីក្រុមការងារទាំងអស់ ចូលរួមអនុវត្តគោលនយោបាយភូមិ ឃុំ សង្កាត់មានសុវត្ថិភាពដែលជាការងារអាទិភាពចម្បងបំផុតសម្រាប់ខេត្តកែប ដោយបន្តរក្សាសន្តិសុខសុវត្ថិភាពនៅក្នុងខេត្ត, រួមគ្នាលុបបំបាត់បទល្មើសឆបោកតាមប្រព័ន្ធអនឡាញ (Online Scam), គ្រឿងញៀននិងល្បែងស៊ីសងផ្សេងៗដើម្បីបង្កើតបរិយាកាសល្អប្រសើរនិងភាពកក់ក្តៅសម្រាប់ភ្ញៀវទេសចរណ៍និងប្រជាពលរដ្ឋ ជាឧត្តមប្រយោជន៍សម្រាប់ខេត្តកែប។ជាមួយនេះ មន្ទីរទេសចរណ៍ខេត្តកែបត្រូវសហការជាមួយអាជ្ញាធរខេត្ត ក្នុងការពិនិត្យមើលតម្លៃម្ហូបអាហារនិងកន្លែងស្នាក់នៅ, សម្រាប់អ្នកទេសចរណ៍ដែលមកកំសាន្តក្នុងខេត្តកែប ធ្វើយ៉ាងណាកុំឱ្យមានតម្លៃដែលខ្ពស់ហួសហេតុនាំឲ្យអាប់អោនកេរ្តិ៍ឈ្មោះខេត្តកែបនិងធ្វើឱ្យចំណូលវិស័យទេសចរណ៍ខេត្តធ្លាក់ចុះ។

ខេត្តកែបមានសក្តានុពលធំដែលអាចចិញ្ចឹមគ្រឿងសមុទ្រពាក់កណ្ដាលឧស្សាហកម្មបាន ដូច្នេះត្រូវជំរុញការចិញ្ចឹមគ្រឿងសមុទ្រនេះឱ្យបានច្រើនដើម្បីជួយដល់សេដ្ឋកិច្ចរបស់អ្នកខេត្តកែប។ ទន្ទឹមនេះ ឯកឧត្តមឧបនាយករដ្ឋមន្ត្រី បានឱ្យដឹងថា ឯកឧត្តមបានបង្វែរថវិកាពីគម្រោងដទៃទៀតយកមកអភិវឌ្ឍនៅតាមសហគមន៍នេសាទក្នុងខេត្តកែប ដោយកសាងផ្លូវចូល ចំណតរថយន្ត បន្ទប់ទឹក និង ផ្ទះលំហែ ដើម្បីទាក់ទាញទេសចរណ៍សម្រាប់បង្កើតចំណូលដល់សហគមន៍ក្នុងគោលដៅលើកស្ទួយជីវភាពរបស់ប្រជាសហគមន៍ឱ្យល្អប្រសើរក្រៅពីការប្រកបរបរនេសាទ៕