ក្រសួងរៀបចំដែនដី នគរូបនីយកម្ម និងសំណង់ បង្កើតវប្បធម៌សន្ទនាគ្នាដ៏ល្អជាមួយអង្គការសង្គមស៊ីវិល ក្នុងការពិគ្រោះនិងផ្ដល់យោបល់ស្វែងរកវិធីសាស្ត្រដោះស្រាយបញ្ហារួមគ្នាប្រកបដោយប្រសិទ្ធភាព រួមចំណែកដល់ការកសាងគោលនយោបាយជាឧត្តមប្រយោជន៍សម្រាប់ជាតិ និងគិតគូរបង្កើតខឿនសេដ្ឋកិច្ចលើកស្ទួយជីវភាពរស់នៅរបស់ប្រជាជនកម្ពុជាឱ្យប្រសើរឡើង

(ភ្នំពេញ)៖ ក្រសួងរៀបចំដែនដី នគរូបនីយកម្ម និងសំណង់ បង្កើតវប្បធម៌សន្ទនាគ្នាដ៏ល្អជាមួយអង្គការសង្គមស៊ីវិល ក្នុងការពិគ្រោះនិងផ្ដល់យោបល់ស្វែងរកវិធីសាស្ត្រដោះស្រាយបញ្ហារួមគ្នាប្រកបដោយប្រសិទ្ធភាព រួមចំណែកដល់ការកសាងគោលនយោបាយជាឧត្តមប្រយោជន៍សម្រាប់ជាតិ និងគិតគូរបង្កើតខឿនសេដ្ឋកិច្ចលើកស្ទួយជីវភាពរស់នៅរបស់ប្រជាជនកម្ពុជាឱ្យប្រសើរឡើង។

ក្នុងសិក្ខាសាលាពិគ្រោះយោបល់ “គោលនយោបាយសន្តិសុខសិទ្ធិកាន់កាប់ដីធ្លី ជលផល ព្រៃឈើនិងបរិស្ថាននៅកម្ពុជា” ដែលបានធ្វើឡើងនៅទីស្ដីការក្រសួង នាព្រឹកថ្ងៃទី២៧ ខែឧសភា ឆ្នាំ២០២៦។

ឯកឧត្តមឧបនាយករដ្ឋមន្ត្រី សាយ សំអាល់ បានចាត់ទុកសិក្ខាសាលានាពេលនេះថា មានសារៈសំខាន់និងជាវប្បធម៌សន្ទនាគ្នាដ៏ល្អជាមួយអង្គការសង្គមស៊ីវិល ក្នុងការពិគ្រោះនិងផ្ដល់យោបល់ស្វែងរកវិធីសាស្ត្រដោះស្រាយបញ្ហាប្រកបដោយប្រសិទ្ធភាព រួមចំណែកដល់ការកសាងគោលនយោបាយជាឧត្តមប្រយោជន៍សម្រាប់ជាតិនិងប្រជាជនកម្ពុជា។

ឯកឧត្តមឧបនាយករដ្ឋមន្ត្រី បានលើកឡើងថាបច្ចុប្បន្ន ក្រសួងរៀបចំដែនដី នគរូបនីយកម្ម និងសំណង់ បាននឹងកំពុងដាក់ចេញនូវគោលនយោបាយចុះបញ្ជីដីធ្លីបង្ហើយ និងកំពុងជំរុញពន្លឿនរៀបចំយន្តការថ្មីៗបន្ថែមទៀតដើម្បីឲ្យការងារចុះបញ្ជីដីធ្លីជូនប្រជាពលរដ្ឋនៅទូទាំងប្រទេសបានរួចរាល់ចប់សព្វគ្រប់ក្នុងពេលឆាប់ៗនេះ ដោយក្នុងនោះក្រសួងបានប្រើប្រាស់យុទ្ធសាស្ត្រដូចជា៖
១. បញ្ចេញបណ្ណកម្មសិទ្ធិទាំងអស់ដែលមាននៅក្នុងដៃ,
២. ដីដែលមិនទាន់បានវាស់វែងគឺបានវាស់វែងបញ្ចប់,
៣. បង្ខំចេញបណ្ណ មានន័យថាដីដែលបានវាស់វែងហើយ បានគូសវាសហើយ និងមានសុវត្ថិភាពហើយនោះគឺក្រសួងនឹងខិតខំបញ្ចេញបណ្ណទាំងអស់ឱ្យបានឆាប់រហ័ស ហើយដីទាំងនោះគឺបូករួមទាំងដីឯកជន និងដីរដ្ឋដែលក្នុងនោះមានដីរបស់ក្រសួងកសិកម្ម រុក្ខាប្រមាញ់និងនេសាទ, ក្រសួងបរិស្ថាន, ក្រសួងធនធានទឹកនិងឧតុនិយម, ក្រសួងវប្បធម៌និងវិចិត្រសិល្បៈ និងដីសមូហភាពរបស់បងប្អូនជនជាតិដើមភាគតិច ជាដីសហគមន៍ គឺក្រសួងបាននឹងកំពុងពន្លឿនដំណើរការចាត់ចែងចេញបណ្ណឱ្យទាំងអស់។

ដោយឡែក បញ្ហាជម្លោះដីធ្លី ក្រសួងបានដោះស្រាយបញ្ចប់ជាច្រើនករណី ដោយមកទល់ពេលនេះនៅសល់ត្រឹមតែក្រោម ៥០ ករណីប៉ុណ្ណោះ ហើយក្រសួងនឹងព្យាយាមដោះស្រាយបញ្ហាជម្លោះដីធ្លីដែលនៅសេសសល់នេះបន្តទៀត។

ឯកឧត្តមឧបនាយករដ្ឋមន្ត្រី សាយ សំអាល់ បានថ្លែងអំណរគុណដល់អង្គការសង្គមស៊ីវិលដែលបានចូលរួមក្នុងសិក្ខាសាលានេះនិងបានលើកឡើងពីបញ្ហានានាដើម្បីរួមគ្នាដោះស្រាយ ដោយឯកឧត្តមឧបនាយករដ្ឋមន្ត្រី យល់ឃើញថានេះមិនមែនជាការបន្ទោសបង្អាប់ ឬក៏ដាក់បន្ទុកដល់រាជរដ្ឋាភិបាលនោះទេ ប៉ុន្តែនេះជាការរួមគ្នាដោះស្រាយបញ្ហានិងបំពេញបន្ថែមនូវអ្វីដែលមានការខ្វះខាតកន្លងមក ។ សម្រាប់កិច្ចការទៅមុខទៀត ក្រសួងនឹងយកវេទិកានេះបើកចំហឱ្យមានការចូលរួមពីបណ្ដាសហគមន៍ទាំងអស់នៅក្នុងប្រទេសកម្ពុជាដើម្បីផ្លាស់ប្ដូរបទពិសោធន៍គ្នាទៅវិញទៅមកជាមួយសហគមន៍ដែលមានភាពជោគជ័យក្នុងការបង្កើតដង្ហើមសេដ្ឋកិច្ចដូចជាសហគមន៍ត្រពាំងសង្កែជាដើម សំរាប់ជាគំរូដល់សហគមន៍ដទៃទៀត ដែលនឹងជួយឱ្យជីវភាពរបស់ប្រជាសហគមន៍មានភាពល្អប្រសើរឡើង, មានប្រាក់ចំណូល,មានប្រាក់សន្សំ,និងបន្ថយបំណុលគ្រួសារ។

ឯកឧត្តមឧបនាយករដ្ឋមន្ត្រី សាយ សំអាល់ មានបំណងចង់ឱ្យអង្គសិក្ខាសាលា ឯកភាពគ្នាពិភាក្សារិះរកវិធីសាស្ត្រធ្វើយ៉ាងណាបង្កើតខឿនសេដ្ឋកិច្ចនិងជួយឱ្យជីវភាពរស់នៅរបស់ប្រជាពលរដ្ឋកាន់តែធូរធារ។ ដោយឡែកចំពោះបញ្ហាសិទ្ធិនិងសុវត្ថិភាពក្នុងការកាន់កាប់ដីធ្លី គឺក្រសួងនឹងបន្តដោះស្រាយជូនជាបន្តបន្ទាប់ ហើយនឹងការពារឧត្តមប្រយោជន៍ជូន ស្របតាមគោលនយោបាយជាយុទ្ធសាស្ត្ររបស់សម្ដេចធិបតីនាយករដ្ឋមន្ត្រី ដែលបានផ្ដល់សុវត្ថិភាពក្នុងការកាន់កាប់ដីធ្លីស្របច្បាប់ជូនប្រជាពលរដ្ឋ ដោយធានាបានថាមិនមាននរណាម្នាក់អាចរំលោភបំពានលើសិទ្ធិដីធ្លីស្របច្បាប់នោះឡើយ៕