ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ សង្ឃឹមថា សមាគមសហព័ន្ធអភិវឌ្ឍន៍ដីធ្លីនិងសំណង់កម្ពុជា នឹងធ្វើការយ៉ាងស្អិតរមួត ជាមួយថ្នាក់ដឹកនាំដែលទទួលផែននីមួយៗនៃក្រសួងរៀបចំដែនដី នគរូបនីយកម្ម និងសំណង់ ដើម្បីចូលរួមតាក់តែងលិខិតបទដ្ឋានគតិយុត្តិនិងគោលការណ៍ផ្សេងៗលើវិស័យរៀបចំដែនដី នគរូបនីយកម្ម និងសំណង់ ឆ្លើយតបតាមការវិវត្តន៍ឥតឈប់ឈរនៃសង្គមជាតិ

(ភ្នំពេញ)៖ ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ សង្ឈឹមថាសមាគមសហព័ន្ធអភិវឌ្ឍន៍ដីធ្លី និងសំណង់កម្ពុជា នឹងធ្វើការយ៉ាងស្អិតរមួត ជាមួយថ្នាក់ដឹកនាំ ដែលទទួលផែននីមួយៗនៃក្រសួងរៀបចំដែនដី នគរូបនីយកម្ម និងសំណង់ ដើម្បីចូលរួមតាក់តែងលិខិតបទដ្ឋានគតិយុត្តិនិងគោលការណ៍ផ្សេងៗលើវិស័យរៀបចំដែនដី នគរូបនីយកម្ម និងសំណង់ ឆ្លើយតបតាមការវិវត្តន៍ឥតឈប់ឈរនៃសង្គមជាតិ។

ថ្លែងក្នុងពេលពិភាក្សាការងារជាមួយសមាគមសហព័ន្ធអភិវឌ្ឍន៍ដីធ្លីនិងសំណង់កម្ពុជា នៅទីស្ដីការក្រសួង នាព្រឹកថ្ងៃទី២៨ ខែឧសភា ឆ្នាំ២០២៦ ឯកឧត្តមឧបនាយករដ្ឋមន្ត្រី សាយ សំអាល់ បានគូសបញ្ជាក់ថា យើងទាំងអស់គ្នាត្រូវផ្លាស់ប្ដូរផ្នត់គំនិតថ្មី ត្រូវមានភាពបត់បែនដើម្បីដើរឱ្យទាន់ការវិវត្តន៍នៃសង្គមជាតិ ក៏ដូចជាពិភពលោក។ បច្ចុប្បន្នថ្នាក់ដឹកនាំ និងមន្ត្រីរាជការនៃក្រសួងរៀបចំដែនដី នគរូបនីយកម្ម និងសំណង់ បាននឹងកំពុងតែផ្លាស់ប្ដូរផ្នត់គំនិតថ្មី មានភាពបត់បែនក្នុងការបំពេញការងារជំនាញរបស់ខ្លួនដើម្បីឆ្លើយតបតាមការវិវត្តរបស់សង្គមជាតិនិងលើកស្ទួយជីវភាពប្រជាពលរដ្ឋឱ្យប្រសើរឡើង។

ឯកឧត្តមឧបនាយករដ្ឋមន្ត្រី បានលើកឡើងថា ការរៀបចំដែនដី មិនមែនមានន័យថាយើងគ្រាន់តែកំណត់ផ្ទៃដីដាក់ជាតំបន់អភិរក្ស តំបន់កសិកម្ម ឬ តំបន់ទីប្រជុំជនប៉ុណ្ណោះទេ គឺយើងត្រូវប្រែក្លាយដីឱ្យមានគុណតម្លៃ ប្រសើរជាជាងគិតតែពីតម្លៃដី ចំណែកឯការងារសុរិយោដី មិនមែនគិតគូរត្រឹមតែការវាស់វែងនិងគូសប្លង់ឱ្យស្អាតប៉ុណ្ណោះទេប៉ុន្តែត្រូវគិតគូរអំពីការរៀបចំក្រុងអោយបានល្អ គិតគូរអំពីការបង្កើតខឿនសេដ្ឋកិច្ចសំរាប់ប្រជាពលរដ្ឋ ជួយដល់ប្រជាពលរដ្ឋឲ្យមានប្រាក់ចំណូល ប្រាក់សន្សំនិងកាត់បន្ថយបំណុលគ្រួសារ។ ជារួម លើវិស័យរៀបចំដែនដី នគរូបនីយកម្ម និងសំណង់ គឺត្រូវការទាំងសមត្ថភាពនិងភាពវាងវៃ ក្នុងការអនុវត្តគោលការណ៍និងគោលនយោបាយរបស់ក្រសួង។

ឯកឧត្តមឧបនាយករដ្ឋមន្ត្រី សាយ សំអាល់ សង្ឃឹមថា សមាគមសហព័ន្ធអភិវឌ្ឍន៍ដីធ្លីនិងសំណង់កម្ពុជា នឹងធ្វើការយ៉ាងស្អិតរមួតជាមួយថ្នាក់ដឹកនាំដែលទទួលផែននីមួយៗនៃក្រសួងរៀបចំដែនដី នគរូបនីយកម្ម និងសំណង់ ដើម្បីចូលរួមតាក់តែងលិខិតបទដ្ឋានគតិយុត្តិនិងគោលការណ៍ផ្សេងៗលើវិស័យរៀបចំដែនដី នគរូបនីយកម្ម និងសំណង់ ឆ្លើយតបតាមការវិវត្តន៍ឥតឈប់ឈរនៃសង្គមជាតិ៕