ក្រសួងរៀបចំដែនដី គាំទ្រកិច្ចសហប្រតិបត្តិការជាមួយក្រុមហ៊ុន Power China Kunning Engineering Corporation Limited លើការសិក្សាគម្រោងថាមពល ទឹក និងជំរុញឱ្យសិក្សា បន្ថែមលើវិស័យកសិឧស្សាហកម្មនៅតំបន់ឆ្នេរ

(ភ្នំពេញ)៖ ក្រសួងរៀបចំដែនដី នគរូបនីយកម្ម និងសំណង់ បន្តគាំទ្រកិច្ចសហប្រតិបត្តិការជាមួយក្រុមហ៊ុន Power China Kunning Engineering Corporation Limited របស់ប្រទេសចិន លើការសិក្សាគម្រោងវិនិយោគថាមពលនិងទឹក និងស្នើដល់ក្រុមហ៊ុននេះពិចារណាបន្ថែមលើការសិក្សាគម្រោងវិនិយោគផ្នែកកសិឧស្សាហកម្មនិងការចិញ្ចឹមសត្វ នៅក្នុងបណ្ដាខេត្តភាគខាងត្បូងជាប់តំបន់ឆ្នេរសមុទ្រ និងតំបន់ផ្សេងទៀតក្នុងប្រទេសកម្ពុជា ដើម្បីឱ្យចំគោលដៅនៃការអភិវឌ្ឍពិតប្រាកដ។

នាព្រឹកថ្ងៃទី ៤ ខែសីហា ឆ្នាំ ២០២៦ ក្រុមហ៊ុន Power China Kunning Engineering Corporation Limited របស់ប្រទេសចិន បានចូលជួបសំដែងការគួរសមនិងធ្វើបទបង្ហាញអំពីការសិក្សាបឋមពីគម្រោងវិនិយោគថាមពលនៅខេត្តកំពត ជាមួយឯកឧត្តមឧបនាយករដ្ឋមន្ត្រី សាយ សំអាល់ នៅទីស្ដីការក្រសួង។

ក្នុងជំនួបនេះ ភាគីក្រុមហ៊ុនPower China Kunning Engineering Corporation Limited របស់ប្រទេសចិន បានអោយដឹងថា ក្រុមហ៊ុននេះមានបទពិសោធន៍ជាង ៧០ ឆ្នាំមកហើយចំពោះការងារសិក្សានិងវិភាគទៅលើគម្រោងធំនិងគម្រោងមធ្យមផ្នែកទឹក ថាមពល ផ្លូវថ្នល់ នគរូបនីយកម្មនិងការអភិវឌ្ឍន៍ក្នុងតំបន់។ ជាមួយនេះ ក្រុមហ៊ុនក៏បានសិក្សាគម្រោងមេគង្គឡានឆាងមួយចំនួនពាក់ព័ន្ធនឹងការងារថែរក្សាទឹកផងដែរ ចំពោះប្រទេសកម្ពុជាគឺមានអំណោយផលខ្ពស់សម្រាប់ទន្លេមេគង្គ ដើម្បីធ្វើជាវារីអគ្គិសនីនិងការងារអភិវឌ្ឍន៍ផ្សេងទៀត។ ចំពោះប៉ែកខាងត្បូងនៃប្រទេសកម្ពុជា មានខេត្តចំនួន ៤ ជាប់នឹងសមុទ្រដែលជាចំណុចសំខាន់នៃការអភិវឌ្ឍន៍សេដ្ឋកិច្ចនិងការអភិវឌ្ឍន៍ជាតិរបស់កម្ពុជា។ ក្រុមហ៊ុន ផ្ដោតជាសំខាន់លើការវិនិយោគផ្នែកថាមពលនិងទឹកដើម្បីធ្វើការអភិវឌ្ឍ ដោយបានសហការជាមួយក្រសួងរៀបចំដែនដីនគរូបនីយកម្មនិងសំណង់របស់កម្ពុជា បង្កើតក្រុមការងារកម្ពុជា-ចិនដើម្បីសិក្សាការងារជាមួយគ្នាបន្ថែមទៀត។បច្ចុប្បន្នក្រុមហ៊ុនបានសិក្សាគម្រោងបឋមនៅខេត្តកំពតរួចហើយ ហើយនឹងបន្តប្រមូលទិន្នន័យរបស់ខេត្តទាំង ៤នៅតំបន់សមុទ្រ ដើម្បីធ្វើការវិភាគបន្ថែមទៀត ដោយរំពឹងទុកថាតាមរយៈគម្រោងទាំងនេះនឹងអាចរួមចំណែកអភិវឌ្ឍន៍សេដ្ឋកិច្ចប្រទេសកម្ពុជាឱ្យល្អប្រសើរបាន។ ភាគីក្រុមហ៊ុនសង្ឃឹមថា ក្រសួងរៀបចំដែនដី នគរូបនីយកម្ម និងសំណង់ នឹងគាំទ្របន្ថែមទៀតចំពោះការចុះសិក្សាស្រាវជ្រាវជាបន្តបន្ទាប់នេះ។

ជាការឆ្លើយតប ឯកឧត្តមឧបនាយករដ្ឋមន្ត្រី សាយ សំអាល់ យល់ឃើញថា ក្រៅពីការសិក្សាគម្រោងវិនិយោគថាមពលនិងទឹក ក្រុមហ៊ុន Power China Kunning Engineering Corporation Limited របស់ប្រទេសចិន និងក្រុមការងារថ្នាក់ខេត្ត ស្រុក នៃខេត្តព្រះសីហនុ កំពតនិងកែប លេខាធិការដ្ឋាន គណៈកម្មការឆ្នេរ គួរតែរួមគ្នាគិតគូរនិងយល់ពីគ្នាទៅវិញទៅមកឱ្យបានច្បាស់លាស់អំពីគោលបំណង ដើម្បីដាក់ការសិក្សាលើការវិនិយោគឱ្យចំគោលដៅពិតប្រាកដ។ ឯកឧត្តមឧបនាយករដ្ឋមន្ត្រី បានលើកឡើងថា ចិននិងកម្ពុជា គឺជាដៃគូយុទ្ធសាស្ត្រគ្រប់ជ្រុងជ្រោយ ដែលមានការឯកភាពគ្នាទាំងទិសដៅនិងនយោបាយ។ ទន្ទឹមនេះ ឯកឧត្តមឧបនាយករដ្ឋមន្ត្រី សាយ សំអាល់ បានបញ្ជាក់ថា នៅក្នុងខេត្តភាគខាងត្បូងជាប់តំបន់ឆ្នេរសមុទ្រកម្ពុជា ដូចជាខេត្តព្រះសីហនុ កែប កំពតនិងខេត្តកោះកុង និងតំបន់ផ្សេងទៀតក្នុងប្រទេសកម្ពុជា កិច្ចការដែលមានសក្តានុពលនោះគឺផ្នែកកសិឧស្សាហកម្ម និងការចិញ្ចឹមសត្វមាន់ ទា ជ្រូក គោ ក្របី ដើម្បីនាំចេញទៅផ្គត់ផ្គង់នៅទីផ្សារក្រៅប្រទេស ដូច្នេះក្រុមហ៊ុនអាចពិចារណាវិនិយោគបន្ថែមលើផ្នែកនេះដើម្បីឲ្យចំគោលដៅនៃការអភិវឌ្ឍន៍ពិតប្រាកដ។ ម្យ៉ាងទៀត បច្ចុប្បន្ន យើងកំពុងព្យាយាមរកតម្រាយផ្លូវពីទីក្រុងគន់មីង ប្រទេសចិន មកកាន់ទីក្រុងវៀងចាន់ ប្រទេសឡាវនិងតភ្ជាប់មកកាន់ខេត្តព្រះវិហាររបស់ប្រទេសកម្ពុជា ដើម្បីពង្រីកការតភ្ជាប់ឲ្យកាន់តែទូលំទូលាយងាយស្រួលក្នុងការធ្វើកិច្ចសហប្រតិបត្តិការជាមួយគ្នាផងដែរ៕