ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ ចង្អុលបង្ហាញទិសដៅថ្មីដល់អាជ្ញាធរអប្សរា និងរដ្ឋបាលខេត្តសៀមរាប ក្នុងការថ្លឹងថ្លែងរវាងការអភិរក្សនិងសុខុមាលភាពពលរដ្ឋ ដោយឈរលើយុទ្ធសាស្ត្រ “ការពារប្រាសាទ,លើកស្ទួយជីវភាពពលរដ្ឋ” នៅតំបន់អង្គរ

(ភ្នំពេញ)៖ ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ បានដាក់ចេញនូវទស្សនទាន និងយុទ្ធសាស្ត្រគន្លឹះក្នុងការគ្រប់គ្រង និងអភិវឌ្ឍតំបន់អង្គរ តាមរយៈការថ្លឹងថ្លែងឱ្យមានតុល្យភាពរវាង «ការអភិរក្សមរតកដូនតា» និង «សុខុមាលភាព និងជីវភាពប្រជាពលរដ្ឋ»។

ថ្លែងក្នុងសិក្ខាសាលាផ្សព្វផ្សាយផែនការប្រើប្រាស់ដីភូមិក្នុងតំបន់រមណីយដ្ឋានបេតិកភណ្ឌពិភពលោកអង្គរ ខេត្តសៀមរាប នាថ្ងៃទី១៣ ខែកញ្ញា ឆ្នាំ២០២៦។

ឯកឧត្តមឧបនាយករដ្ឋមន្ត្រី បានគូសបញ្ជាក់ថា ចាប់ពីពេលនេះតទៅ អាជ្ញាធរជាតិអប្សរានឹងបំពេញតួនាទីជា «មជ្ឈមណ្ឌលប្រមូលផ្តុំគោលនយោបាយ យុទ្ធសាស្ត្រ និងយុទ្ធវិធី» តាមរយៈវិធីសាស្ត្រ៖
-ដៃម្ខាង៖ ថែរក្សាការពារមរតកដូនតា និងព្រលឹងបុព្វបុរសខ្មែរ។
-ដៃម្ខាងទៀត៖ ពូនជ្រុំ និងអភិវឌ្ឍតំបន់អង្គរឱ្យក្លាយជា «មរតកមានជីវិត» ដែលមនុស្សអាចរស់នៅ សុខស្រួល មានសុវត្ថិភាព និងប្រកបរបរចិញ្ចឹមជីវិតបាន។

ទាក់ទិននឹងការពង្រឹងសមត្ថភាព និងតួនាទីអាជ្ញាធរដែនដីដើម្បីធានាប្រសិទ្ធភាពនៃការអនុវត្តផែនការការងារដែលដាក់ចេញដោយអាជ្ញាធរអប្សរាដែលជាការងារប្រសូតចេញពីអន្តរក្រសួងនោះ ឯកឧត្តមឧបនាយករដ្ឋមន្ត្រី បានកំណត់បេសកកម្មបន្ថែមជូនរដ្ឋបាលថ្នាក់ក្រោមជាតិរួមមាន៖
អភិបាលក្រុង-ស្រុក៖ ត្រូវទទួលបន្ទុកបន្ថែមលើ កិច្ចការបរទេស និងបច្ចេកទេសបេតិកភណ្ឌ។
គណៈអភិបាលខេត្ត និងអាជ្ញាធរដែនដី៖ ត្រូវដឹកនាំសម្របសម្រួលតាមគោលការណ៍ច្បាប់ ដោយត្រូវមានចំណេះដឹង និងជំនាញទាក់ទិននឹងបេតិកភណ្ឌ និងកិច្ចការអន្តរជាតិ ដើម្បីធានាបាននូវការការពារប្រាសាទផង និងការផ្តល់ភាពកក់ក្តៅដល់ប្រជាពលរដ្ឋផង។

ឯកឧត្តមឧបនាយករដ្ឋមន្ត្រី សាយ សំអាល់ បានបញ្ជាក់ថា ដល់ពេលវេលាហើយដែលអាជ្ញាធរអប្សរា និងអាជ្ញាធរដែនដីត្រូវចងក្រងសហការគ្នាអនុវត្តការងារដោយស្មារតីទទួលខុសត្រូវខ្ពស់ ដោយប្រកាន់យក «យុទ្ធសាស្ត្របន្ធូរបន្ថយ»គឺ៖ធ្វើឱ្យប្រជាពលរដ្ឋអាចទទួលយកបាន និងងាយស្រួលអនុវត្ត, ធានាឱ្យពលរដ្ឋរស់នៅសុខដុមរមនា ក្នុងក្រុមគ្រួសារ និងមានស្ថិរភាពចំណូលពីអាជីវកម្មចិញ្ចឹមជីវិតស្របច្បាប់ក្នុងតំបន់រមណីយដ្ឋាន។

សិក្ខាសាលានេះត្រូវបានរំពឹងទុកថា នឹងក្លាយជាស្ពានចម្លងដ៏សំខាន់ក្នុងការតភ្ជាប់ការយល់ដឹងរវាងបច្ចេកទេសអភិរក្ស និងការពិតជាក់ស្តែងនៃការរស់នៅរបស់ប្រជាពលរដ្ឋក្នុងតំបន់បេតិកភណ្ឌពិភពលោកអង្គរ៕